El presidente del PP, Mariano Rajoy, dixo güei en Vitoria nuna xunta con cincuenta cargos del so partíu nel País Vascu que'l PP ta a favor de les llingües, de toes, y de la llibertá nel so emplegu.
Les declaraciones de Rajoy son asemeyaes a les que ya fexeron dellos cargos del PP d'Asturies nes pasaes eleiciones xenerales.
Pilar Fernández Pardo dixo naquel entós na Canal 10 de televisión de Xixón, que'l PP tenía la mesma política llingüística n'Asturies que'n Cataluña y fizo defensa de la oficialidá del asturianu "ensín obligación".
Gabino de Lorenzo nel selmanariu Les Noticies afitó que la oficialidá podía ser la solución al problema del retrocesu del asturianu.
El Partíu Popular n'Asturies aconceyó col Conceyu Abiertu pol Asturianu y cola Fundación Caveda y Nava a los que-yos pidió posibles redaiciones del artículu 4u. pa la reforma del Estatutu d'Autonomía. Tamién l'Acadeia de la Llingua apurrió la so propuesta a la los grupos parlamentarios de la Xunta Xeneral.
La decisión del PP y la so plasmacón estatutaria sabrase a non mucho tardar, pero va ser dempués del Congresu de la FSA-PSOE d'a finales de xunetu.
Nesti sen hai fonda preocupación nel PSOE de que'l PP los dexe " fora de xuegu". Asina se desprende de les declaraciones que vienen faciendo destacaos dirixentes de la FSA. Güei Fernando Lastra, protavoz del PSOE na Xunta Xeneral, apaez na prensa diciendo-y al PP que "nun vaya cayer en postures maximalistes" y pidiendo-y un esfuerciu "pa que les posiciones seyan coincidentes coles opiniones mayoritaries na sociedá". Da que pensar si Fernando Lastra se ta refiriendo (ensín decatase, claro), a la encuenta que Llera Ramo fizo per encargu del Principáu ónde'l 62% de los encuestaos taben pola oficialidá. Encuesta lluéu secuestrada pola Sra. Ana Rosa Migoya y el propiu Principáu.
Fernando Lastra, y dalgún otru, tienen un recorríu políticu curtiu nun hipotéticu escenariu onde l'asturianu seya oficial. Les postures, graves declaraciones y descalificaciones ca vegada más agries y reaccionaries como referise al asturianu como "variante llingüística" foron incluso desautorizáes pol Presidente'l Principáu, Vicente Alvarez Areces en declaraciones a la revista Interviu, nes que dixo que reconocíen que'l asturianu yera una llingüa. Tamién la Ponencia del Congresu de la FSA desautoriza a Fernando Lastra al facer reconocimientu de la llingua anque nun defenda nin facela oficial nin derechos pa los sos falantes.
Asina y too, la Ponencia Política que la FSA-PSOE lleva al so Congresu nun avanza un res nel tratamientu estatutariu pa la llingua asturiana, tampoco ye d'esperar que se presenten modificaciones d'importancia a esa Ponencia no que se refier al estatus llingüísticu del asturianu dada la posición zarrada y reaccionaria de los dirixentes de la FSA pa con too lo que suponga derechos, identidá y autonomismu como se vien espeyando nel procesu de reforma del Estatutu d'Autonomía.
D'equí a poco les propuestes estatutaries serán públiques y será'l momentu d'analizar caúna d'elles. Pel momentu, ensin insultos, ensín descalificaciones y con declaraciones puntuales, personales y más o menos clares, el Partíu Popular tien agora nes sos manes la posiblidá pa iguar un problema (que otros quixeren facer endémicu), que lleva trenta años enllamargando la vida política, social y cultural y torgando los derechos de la sociedá asturiana a la llibre eleición, usu, educación y convivencia na so llingua propia: l'asturianu.
