28/6/08

Los estudiantes enzarraos na Universidá dimpuestos a quedase "lo que faiga falta".


Los estudiantes qu'ayeri s'enzarraron nel claustru de la Universidá d'Uviéu manifestáronse dimpuestos a quedase tol tiempu que faiga falta "hasta qu'apaeza una solución" y seyan atendíes les sos reivindicaciones. La protesta surdió escontra la refuga de la especialidá d'Asturianu de la propuesta de títulu de gráu aprebada pola Xunta de Facultá de Filoloxía al traviés d'una enmienda de Félix Fernández de Castro y López-Patiño.

Ún de los mozos enzarraos declaró que fueron 18 los que pasaron la nueche nel claustru y qu'esperarán al llunes a tener la prometía reunión y posible solución al conflictu como-yos prometió el rector de la Universidá.

Casu de que la solución nun seya tal, tan dimpuestos a seguir col enzarru tol tiempu que faiga falta y plantegando además tou tipu de movilizaciones.

De pasu agradecieron a los distintos coleutivos, el granible sofitu que-yos ufren.

La pretenciosa imaxe del narcisismu d'ultraderecha: Rosa Díez.



Rosa Díez va pasar el fin de selmana en Llanes. El so partíu UPyD que tien un únicu diputáu, pero abondes perres, organiza unes xornaes so la organización del Estáu autonómicu que más paecen de desaniciu autonómicu.

UPyD tien un diputáu (per Madrid) nel Congresu, la Sra. Rosa Díez, y nun se-y conoz otra ideoloxía más que'l cultu personalista a la so diputada, la pretensión de vivir eternamente de la política, l'afán protagonista-narcisista de la so vocera, el continuu combayar coles esencies patries del antiguu réxime y la griesca permanente col modelu d'Estáu, coles llingües cooficiales y col nacionalismu que nun seya españolista.

Asina ye que fói llegar a Llanes, y tomála col Gobiernu Vascu, col Estatutu de Cataluña y cola llingua d'Asturies.
Les sos declaraciones so l'asturianu son pa guardales n'antoloxía l'esbabaye:
  • La lengua oficial de Asturias es el español... y no hay nada más que el castellano.
  • Lo demás son dialectos y formas de hablar.
  • La lengua (?) asturiana es un dialecto (?) del castellano.
Ensín aliendu pol esfuerciu intelectual, nun aparó hasta glayar l'eslogan del partíu UPyD:
  • España ha de ser "una".
Entruga: ¿grande y llibre, señora Díez?

27/6/08

"Una solución pal llunes": los enzarraos nel Claustru de la Universidá consiguen que'l rector entaíne.

El grupu de 15 estudiantes enzarraos nel Rectoráu en protesta pola supresión de la especialidá d'asturianu de la propuesta de titulación de grau aprobada pola Xunta de la Facultá de Filoloxía instaláronse nel Claustru, tres caltener una conversación col rector, Vicente Gotor.

En declaraciones a Europa Press, un voceru del grupu, esplicó que'l rector díxo-yos, tres entrar nel Rectoráu, que necesitaba esti fin de selmana pa buscar una solución, tres la crisis surdida pola dimisión d'Ana Cano, ex decana de la Facultá de Filoloxía, de magar la decisión de la Xunta.

Nesti sen, ellos manifestaron al responsable académicu la so intención de "permanecer ellí indefinidamente hasta que se busque una solución". Entós, el rector accedió a permitir que los mesmos s'instalen nos pasiellos del claustru universitariu, onde aseguren que van quedar hasta que s'igüe la cuestión. Los estudiantes destacaron l'actitú "correcta" del rector, y encamentáronlu a "nun mentir" y cumplir "los sos compromisos electorales" pa cola llingua asturiana.

Nel 2009 lliberalícense los nomes de dominiu n'internet. Abiertu el pasu al .ast



La criación de nomes de dominiu n'internet va ser lliberalizada pal primer semestre de 2009, al ser aprebáu per unanimidá güei en París pela Corporación pala Concesión de Nomes y Númberos n'Internet (ICANN).

Un equipu de trabayu va presentar el mes que vien, énte'l Conseyu de la ICANN, una versión definitiva del documentu aprebáu güei nel que van detallase les modalidaes pa poner en práutica lo que ya se noma "una revolución xeográfica de la Rede", y que podía tar preparao p'arrancar nel primer semestre del 2009.

Más de 25 persones trabayaron nel documentu pa atropar les posibilidaes d'esta lliberación. En pallabres del presidente de la ICANN, Paul Twomey, "entovía queda munchu trabayu pa finar los detalles pala so puesta en práutica, na que se lleven gastao unos 10 millones d'euros".

Entá hai qu'esclucar cuánto va costar ca estensión nueva de dominiu, y el montu total d'ellaboración definitiva del documentu, que calculen andará al rodiu de los 20 millones d'euros.
Sicasí, nuna entrevista al dixital MailClub.info., Twomey dixo que "una nueva estensión de dominiu va salir por unos 63.500 euros".

Na ICANN aseguren que les nueves estensiones van tener que respetar los derechos de les marques y de les entidaes de comunidaes reconocíes.

Abrese asina una puerta pala reconocencia de la estensión ".ast" que xunte les referencies n'internet de tol dominiu llingüísticu, que ya tien reconocíos los estándares ISO 639-2, ISO-639-3. Nesti sen les que lleven un camín abondo avanzáu y van tar ya preparaos pa en cuanto seya posible el rexistru, van ser les comunidaes de Bretaña ".bzh", de Gales ".cym" y de Galicia ".gal". Va años que Cataluña tien reconocío el dominiu ".cat" pal so ámbetu llingüísticu.

Sedría bono aperiar nel intre, los pegollos pa xestionar la puesta en funcionamientu de la estensión .ast, qu'amestara a sectores de la cultura, de la vindicación llingüistica, sociales, de la comunicación, empresariales... y que fuera quien a trabayar coles instituciones polítiques, cola Universidá y col gobiernu autónomu pa facer rialidá y vidable no económico el proyeutu d'una estensión propia pal nuesu dominiu llingüísticu.

Un grupu d'estudiantes enzárrense na Universidá y llamen a la sociedá a movilizase pol asturianu.

Un grupu d'estudiantes, en collaboración cola Xunta Pola Defensa de la LLingua Asturiana, ta enzarráu dende les cincu la tardi nel edificiu del Rectoráu de la Universidá d'Uviéu, na cai San Francisco.

Los estudiantes, en coordinación cola Xunta pola Defensa de la Llingua Asturiana y Xunta Moza, quieren, asina, "denunciar la esclusión que per parte de los sectores más retrógrados de la Universidá se ta faciendo, que conderga al idioma a quedar al marxe de la institución académica más importante d'Asturies", según espeyó la Xunta nun comunicáu.

"Esti enzarru, de carácter indefiníu, pretende facer un llamáu a la comunidá universitaria, encabezada pol nuevu Rector Vicente Gotor, asina como al Gobiernu asturianu pa que pongan igua a esta situación crítica que dinamita tol sistema educativu, dexando a Asturies ensin la ferramienta básica pa la formación de profesionales y profesores de llingua asturiana".

A lo cabero, la Xunta pola Defensa de la Llingua Asturiana fizo un llamáu pa que "la comunidá universitaria y la sociedá asturiana tome parte d'esta iniciativa y se movilicen pa preservar los derechos llingüísticos d'Asturies, brutalmente conculcaos tres el determín acientíficu y demagóxicu tomáu na Xunta de Facultá de Filoloxía".

25/6/08

Unanimidá nes crítiques a la decisión de la Xunta de Filoloxía.

Ye una decisión cola que yo nun pueo siguir como decana de nenguna de les maneres. Llaméntolo muncho, paezme mui grave, antiacadémicu, antiuniversitariu y anticientíficu que la Facultá de Filoloxía de la Universidá Asturiana evite que l'asturianu forme parte de la enseñanza reglada y que puea tar presente nes nueves titulaciones de grau, d'acordies col nuevu espaciu européu.
Ana Cano, ex Decana de Filoloxía y Presidenta de l'Academia de la Llingua Asturiana.


Preocupación por esta decisión, nel sen de que la mesma puea conllevar la renuncia per parte de la Universidá, a liderar los estudios sobre la llingua asturiana y da-yos rigor académicu y científicu, porque me paez que ye'l sitiu ideal pa que dende ellí s'impulsen tolos análisis rellacionaos cola Filoloxía Asturiana
Consuelo Vega, Directora Xeneral de Política Llingüistica del Principáu d'Asturies.


Negar qu'haya una titulación d'Asturianu nos planes oficiales d'estudiu cuando sí l'hai d'otres llingües supón nega-y a la nuestra cualquier salida aceptable.
L'aprobación de la enmienda débese a la politización de dellos sectores universitarios que nun admiten la normalidá y que nel estudiu de les llingües minoritaries ven una amenaza pal so estatus personal.
Xunta pola Defensa de la Llingua Asturiana.


Detrás de la decisión hai unos prexuicios acientíficos y ideolóxicos de cálter xacobín sobre la necesidá de que la Universidá d'Uvieu seya una Universidá de y pa la sociedá asturiana.
Conceyu Universitariu pol Asturianu.

Condenamos enérxicamente un fechu que supón una auténtica ofensiva troglodita que tien como oxetivu la eliminación ensin mázcares nin matices, de la llingua y la cultura asturiana a traviés d'una vuelta a les cavernes del neofranquismu españolista. Ye gravísimo que'l votu de 34 persones que respuenden a intereses sectoriales y dacuando mercenarios, y en concreto de dos, Pedro Manuel Suárez y Félix Fernández de Castro, les dos persones que presentaron la propuesta, puean roba-yos a los asturianos y asturianes la posibilidá de cursar estudios na so llingua y torguen la formación del profesoráu de llingua asturiana, y más cuando hai años la Xunta Xeneral nel so conxuntu pidió espresamente por unanimidá l'entamu de los estudios de llingua asturiana na Facultá de Filoloxía.
Unidá Nacionalista Asturiana.

Conderga total a la marxinación que pal asturianu aprobó la Xunta de Facultá de Filoloxía de la Universidá d’Uviéu, al traviés de la enmienda presentada por Fernández de Castro na qu’únicamente taba recoyida la eliminación del asturianu del plan presentáu pol Decanatu. Apoyu públicu a Ana Cano, exDecana d’esta Facultá, mesmo pola so defensa de la dignidá académica de la llingua asturiana, que pola so decisión de dimitir nel so cargu. Solicitú de que Vicente Gotor aclarie si daveres conoz los procesos d’estudiu ya implantación de los nuevos planes d’estudiu tres de la so negativa a pronunciase fai malpenes dos díes. Solicitú de que Vicente Gotor actúe de forma decidida nel conflictu qu’ayeri quedó más abiertu que nunca na Facultá de Filoloxía, respondiendo polos derechos y les realidaes científiques perriba de los intereses personales de los docentes qu’enxamás escondieron les sos inquietúes antiasturianes. Solicitú de que Vicente Gotor, cumpla, en fin y per primer vez dende la so elección, coles sos promeses electorales. Certeza de qu’esti conflictu vien arriendes de la vulneración de los derechos llingüísticos de los asturianos y asturianes que namás tienen na OFICIALIDÁ de la llingua asturiana la so solución efectiva y real.

Fai!

Inaceptable y indignante y pon en cuestión si la Universidá ta al serviciu de la sociedá asturiana o al de los intereses falsos d'un pequeñu grupu de profesores y asítiase frente a la posición del parlamentu asturianu y de la propia llegalidá vixente.
Solicitamos amás la inmediata intervención del rector de la Universidá d'Uviéu pa que se corrixa esta situación absurda y incomprensible, asina como la del conseyeru d'Educación, José Luis Iglesias Riopedre.
Francisco Javier García Valledor, diputáu na Xunta Xeneral d'Izquierda Xunida-Bloque por Asturies-Los Verdes.


Félix Fernández de Castro López-Patiño llidera un frente antiasturianu que provoca una grave situación na Facultá de Filoloxía.
Círculu Lliberal d'Asturies.

Decisión incomprensible y ensin precedentes de la Xunta de la Facultáu de Filoloxía d'asesinar y lliquidar la Llingua Asturiana de la Universidá d'Uviéu
Exiximos güei al presidente del Gobiernu asturianu, Vicente Álvarez Areces, y al rector de la Universidá, Vicente Gotor, que-y devuelvan darréu la dignidá a la Facultá de Filoloxía.
El Gobiernu d'Asturies y el rector de la Universidá, nun puen permitir qu'un grupúsculu de falsos científicos utilicen la Universidá d'Uviéu pa facer política de la manera más miserable y torguen por puru prexuiciu l'estudiu na Universidá Pública de la Llingua propia d'Asturies.
Si se niega a la Universidá, si se niega a la Facultá de Filoloxía, si se niega a la comunidá científica y universitaria, si se niega a los asturianos y asturianes la posibilidá de conocer, estudiar, investigar y afondar na realidá llingüística d'Asturies ta abriéndose la puerta a l intolerancia, l'incumplimientu de los derechos humanos, civiles y democráticos y asitia a Asturies a la puerta d'un conflictu de consecuencies imprevisibles.
Apoyar a la ex decana de la Facultá de Filoloxía, Ana Cano, al so equipu y a tolos profesores que dende la coherencia y la dignidá, defendieron el carácter científicu y el llabor investigador de la Universidá d'Uviéu y supieron poner a la máxima institución académica d'Asturies per delantre de los intereses políticos y personales.
Vamos movilizamos, apoyar y participar en tolos actos de condena y refugu a esta clara violación de derechos, a esti ataque a la dignidá de la Universidá Asturiana.
Facemos responsable al Gobiernu d'Asturies y al rector de les conscuencies de la decisión de la Xunta de la Facultá de Filoloxía.
Sólo la oficialidá de la llingua asturiana pue resolver la situación d'incumplimientu de los derechos humanos, civiles y democráticos que sufren los asturianos y asturianes.
Somos los ciudadanos y ciudadanes los que tenemos derechos llingúísticos, non los territorios o les propies llingües, y equí n'Asturies, en plenu sieglu XXI, tolos nuesos derechos llingüísticos tán pisaos y atacaos.

Bloque por Asturies.

Quiero que piesllen la Facultá de Filoloxía. Nun entiendo que l'Estáu dea un duru de los mios impuestos pa financiar el sueldu d'una asamblea que decide que la mio llingua -que ye la llingua d'un bon puñáu de "clientes" d'esa entidá docente-nun ye digna d'estudiu y respetu. Pidiría tamién el pieslle de la facultá de Xeografía y de la de Xeolóxiques si dixeran -y pa más inri votaran- que la tierra ye plana; o la de Medicina, Bioloxía o Filosofía, si negaran la teoría de la evolución de les especies de Darwin. Una comunidá que niega por motivos políticos que la tierra ye redonda y achaplada pelos polos nun ye una comunidá científica, por munchos estudios científicos que desenvuelvan; una comunidá que niega -por motivos políticos- l'amor pola llingua, quier dicise, la filoloxía, nun ye una comunidá de filólogos. ¿Por qué los mios impuestos van pa financiar el mou y manera d'estos suplantadores?
Xuan Bello, escritor.


L'Aconceyamientu de Xuristes pol Asturianu tres llamentar daveres lo asocedío na Facultá de Filoloxía de la Universidá d’Uviéu y solidarízase cola decana dimisionaria, quier solliñar otros dos aspeutos del problema:
1.- Que nestos fechos tienen la cabera responsabilidá’l Rectoráu y el Gobiernu d'Asturies, porque siendo asina que la Xunta de Facultá aprobó, hai bien d’años, la Especialidá de Filoloxía Asturiana, desdexaron les sos obligaciones pa ponela en marcha, facilitando con ello’l boicotéu sosteníu y foín d’un grupu d’antiasturianistes que tres d’abondos intentos fallíos, al cabu, dieron un golpe efeutivu escontra la llingua asturiana, oxetu de les sos rensíes.
2.- Con esti determín evidénciase’l despreciu que los profesores golpistes, el Rectoráu de la Universidá d’Uviéu y el Gobiernu del Principáu d’Asturies, amuesen pol conteníu de la Carta Europea de les Llingües Rexonales o Minoritaries, tratáu internacional ratificáu por España y parte del denomáu bloque de constitucionalidá na materia, que nel so artículu 8.e) desixe, a tolos poderes públicos, la garantía de que la llingua asturiana pueda ser estudiada na nuesa universidá.

Aconceyamientu de Xuristes pol Asturianu.


Ye ún de los ataques más graves nos munchos que vien soportando la llingua asturiana. Nun somos quién a entender qué clase de filólogos son los que nun tienen más esmolición qu'enzancar l'enanchamientu de los conocimientos llingüísticos de los sos alumnos, quitándo-yos la posibilidá d'estudiar una llingua que ye patrimoniu de tolos asturianos. El que la enmienda cuayara nun ye otra cosa que la confirmación de que los criterios llingüísticos son los que menos pesen na cuestión del asturianu, dexándose guiar por zunes personales y cuestiones que nada tienen que ver cola filoloxía.
Asociación de Trabayadores pola Normalización Llingüística.


24/6/08

Filoloxía diz NON a la Llingua Asturiana y fuercia la dimisión de la decana.

L'adaptación al Espaciu Européu d'Educación Superior fuerza a una reforma de los estudios na que rescamplen los equilibrios de fuerces nel ámbitu universitariu. Asina s'amosó esti día 24 de xunu na facultá de Filoloxía, onde se celebraba una xunta pa definir la estructura xeneral de les futures titulaciones: nella refugóse la creación d'una titulación específica de llingua asturiana n'igualdá de condiciones pa coles que se pongan en marcha de francés o inglés. La votación calificóse d'«histórica» depués de venti años consecutivos d'apoyu a la llingua asturiana na institución académica. La primer consecuencia d'esta decisión foi l'anunciu de la dimisión de l'actual decana de Filoloxía, Ana Cano.

Ver noticia completa en:

17/6/08

Unidá Nacionalista Asturiana remanez como federación de partíos nacionalistes.



L'Auditoriu d'Uviéu agospia esti sábadu 21 de xunu el Congresu fundacional de Unidá Nacionalista Asturiana (UNA), que renaz agora de la tresformación de la coalición eleitoral Unidá en una federación de partíos, sigún informen fontes d'Unidá nuna nota de prensa.

Unidá Nacionalista Asturiana va ser un proyeutu nuevu y recoyerá los cambéos asocedíos lo mesmo na sociedá asturiana que na izquierda nacionalista dende los sos oríxenes nel añu 1988 nel que se xuntaren l'Ensame Nacionalista Astur y la Xunta Nacionalista Asturiana.

La coalición entamada por Izquierda Asturiana, Andecha Nacionaliega, Asturianistes ya independientes, tresfórmase asina nuna federación de partíos con una mesma estructura orgánica, la Xunta Executiva Nacional y la Xunta Xeneral, que sedrán elexíes nel Congresu del sábadu n'Uviéu, onde tamién quedarán aprobaos los Estatutos de la Federación.

Unidá Nacionalista Asturiana pretende ser "la espresión política organizada del nacionalismu asturianu d'izquierdes con vocación d'amestar a les persones y corrientes ideolóxiques y polítiques que seyan a compartir los sos oxetivos".

Tamién nagüen por "construyir el necesariu referente de la izquierda d'Asturies y algamar una presencia relevante na vida política del país".

La Xunta Executiva Nacional va ser la encargada de trabayar pa poner en marcha les agrupaciones a lo llargo'l país "que afonden na construición d'un frente políticu nacional, estable, con fuercia y capacidá de calar na sociedá".

16/6/08

"Hai miéu ente los socialistes a represalies si dan la cara pola oficialidá".

El voceru del Conceyu Abiertu Pola Oficialidá, Fernando Ornosa, dixo güei que la campaña 'Doi la cara pola oficialidá' supera ya les 2.000 semeyes. La campaña consiste na recoyida de semeyes de persones que posen con un cartelu nel que amuesen el so apoyu a la oficialidá del asturianu.

"La promoción por sí sola nun garantiza que tengamos los mesmos derechos que les demás llingües", señaló Ornosa delantre la Xunta Xeneral del Principáu d'Asturies, sé de los conceyos de la Ponencia de Reforma Estatutaria.

Ornosa señaló que'l Conceyu ta redactando un testu pal artículu 4 del Estatutu, solicitáu pol Partíu Popular ya Izquierda Xunida-Bloque por Asturies -Los Verdes, que va dase a conocer pa finales d'esti mes. "Ye un testu de mínimos, perfeutamente asumible, que recueye los puntos básicos pa la cooficialidá del asturianu y del gallego-asturianu nel territoriu del Navia-Eo".

Púnxose de manifiestu que ca vegada son más les persones que fan un decidíu apueste pola oficialidá del asturianu y qu'esti ye'l meyor momentu pa que'l Estatutu d'Autonomía la recueya, asegurando tamién que hai socialistes que nun s'espresen nidia y públicamente favoratibles a la oficialidá por miéu a represalies.


14/6/08

Madrid emplega la doctrina Areces y refuga enseñar l'asturianu na UNED.

El proyeutu d'enseñanza del asturianu nel Centru Universitariu d'Idiomes a Distancia (CUID), dependiente de la UNED, anunciáu el pasáu mes de mayu pol so direutor Mario Menéndez nuna conferencia en Xixón, acaba de ser refugáu en Madrid sigún denuncia nun comunicáu el Sindicatu Unitariu y Autónomu de los Trabayadores de la Enseñanza d'Asturies (SUATEA). El motivu nun ye otru que "LA FALTA D'OFICIALIDÁ DE LA LLINGUA ASTURIANA".

Esta postura per parte de l'Alministración Central vien a afitar les últimes declaraciones del presidente del Principáu Vicente Alvarez Areces na revista Interviu nes que fardaba DE NUN TAR POLA LLABOR DE DAI RANGU D'OFICIALIDÁ AL ASTURIANU PORQUE ASINA L'ALMINISTRACION LLÍBRASE D'USALU Y ENSEÑALU.

Les Alministraciones, la central y l'autonómica, demuestren con fechos, un día sí y otru tamién el so acosu a la llingua asturiana, per mas que s'enllenen la boca cola pallabrería güeco de la voluntariedá, del fomentu y de la proteición.

COMUNICÁU ASOLEYÁU POL SUATEA:

NUEVU ATAQUE A LA LLINGUA ASTURIANA

Dende SUATEA denunciamos que nun salgan pal añu viniente los cursos d'asturianu na UNED dientru del conveniu que tien col CUID (Escuela d'idiomes a distancia).

Esta situación supón una nueva discriminación llingüística pa la Llingua Asturiana, ya que sí que se van siguir dando estudios de Llingues Cooficiales: Catalán, Gallego, Euskera.

Nun bien mal recordar que la Llingua Asturiana s’estudia como tal na Universidá d’Uviéu y que ta reconocida xurídicamente y con presencia reglada nel sistema educativu. Por mor, ye inconcebible qu’en Madrid tiren abaxo la propuesta allegando problemes téunicos, que nun son nin más nin menos que la condición de non Oficial.

La iniciativa de la UNED yera perbona, ya que en nenguna Escuela d’Idiomes s’ufierta la Llingua Asturiana y el Gallego-Asturiano.

Amás la propuesta, nun principiu taba aceutada y agora de bones a primeres nun la aprueben, por mor de problemes teúnicos.

Sicasí, ye evidente qu’esti conflictu ñaz pola situación d’indefensión y desprotección arreyaes a la condición de non oficial de la llingua. Si queremos llograr que l’asturianu tea presente nes escueles d’Asturies en condiciones dignes y de normalidá ye necesario que se-y dea a la nuesa llingua’l rangu llegal que yá tienen el restu les llingües del Estáu: la oficialidá.

La reforma del estatutu d’Autonomía tendría que contemplar la oficialidá del asturianu y del gallego asturiano nel so ámbito pa dexar de ser una materia de segundu orden nel nuesu ordenamientu educativu.

8/6/08

Les mentires del PSOE ya nun engañen a naide.

El testu de la ponencia política pal Congresu de la FSA-PSOE no referente a la llingua asturiana coincide coles declaraciones de los sos dirixentes nel NON A LA OFICIALIDÁ y el NUN TAMOS POLA LLABOR:

201. La lengua asturiana: recuperación, promoción y
voluntariedad
202. Los socialistas asturianos, desde la aprobación de nuestro Estatuto, nos hemos
comprometido con la puesta en marcha de actividades relacionadas con el
asturiano, estableciendo numerosas medidas de promoción del mismo con el
objetivo de favorecer la recuperación, conservación e impulso de nuestra lengua
autóctona.
203. Pensamos que es necesario actuar para consolidar lo realizado hasta el presente y
emprender una acción coordinada y planificada para, desde el respeto a los
principios de libertad y voluntariedad en su uso, se pueda despertar un grado
suficiente de consenso social en la protección de este patrimonio cultural de los
asturianos.
204. Por eso, a partir del estatus otorgado en el vigente Estatuto de Autonomía,
continuaremos comprometidos en el fomento del uso institucional y público del
asturiano y del gallego-asturiano en el ámbito de la Administración y de los
organismos del Principado de Asturias, en la promoción de su uso en los medios de
comunicación y en garantizar la oferta de su aprendizaje en el sistema educativo.


Ponencia



Les Mocedaes Socialistes d'Uviéu piden-yos a los ciudadanos que den la cara per ellos, pa modificar la ponercia marcu que se va presentar al Congresu de la FSA-PSOE:


Desde Juventudes Socialistas de Oviedo / Mocedaes Socialistes d’Uviéu queremos hacer partícipe a la ciudadanía del proceso congresual en el que se encuentra la FSA-PSOE y que culminará con la celebración del 30º Congreso Regional los días 25, 26 y 27 de julio, en Oviedo.

Creemos que más allá de las fronteras del Partido existen opiniones e ideas que pueden fortalecer nuestro proyecto político, y debemos intentar conocerlas.

Por eso, JSO/MSU debatirá aquellas enmiendas a la Ponencia Marco de la FSA-PSOE que nos sean enviadas hasta el próximo sábado día 14 de junio. Las que se aprueben por la mayoría de nuestra militancia, al ser aportaciones que encajen en el proyecto socialista abierto y comprometido que queremos, serán defendidas por JSO/MSU ante la Asamblea del PSOE-Oviedo y el Consejo Regional de Juventudes Socialistas de Asturias. Y las que se aprueben en estos dos órganos mencionados llegarán hasta el30º Congreso Regional de la FSA-PSOE.

¿Qué son las enmiendas?

Es posible que no todo el mundo sepa a qué nos referimos al hablar de enmiendas. Éstas son alteraciones que se realizan al texto de un documento y, en este caso, a la Ponencia Marco de la FSA-PSOE.

Pueden ser de las siguientes clases:

Enmiendas de supresión –> las que eliminan aquellas partes del texto con las que no se esté de acuerdo. Ej. “Enmienda de supresión: suprimir la palabra/frase/párrafo X”

Enmiendas de sustitución –> las que sustituyen partes del texto por otras que puedan resultar más apropiadas. Ej. “Enmienda de sustitución: sutituir Y por X”

Enmiendas de adición –> las que añaden al documento aquellas cuestiones que no estén recogidas en él. Ej “Enmienda de adición: añadir, tras X, A”

Éstos tres tipos de enmiendas son los que recogeremos. Para que nos resulte más fácil el debate de las enmiendas es necesario que se indique el número del párrafo que se está enmendando, así como una breve explicación del motivo por el que se realiza dicha enmienda, a fin de poder argumentar el cambio que se pretenda realizar.

Las enmiendas han de ser remitidas a info@jsoviedo.org

http://www.jsoviedo.org/?p=32




3/6/08

Comunicáu d'AXA: "Areces amuesa despreciu pol ordenamientu xurídicu". "Tarde o temprano l'asturianu sedrá cooficial col castellán".

L’Aconceyamientu de Xuristes pol Asturianu quier espresar la so tristura y vergoña poles declaraciones que fizo’l presidente del Principáu d’Asturies al selmanariu Interviu.

  • Tristura y vergoña énte’l despreciu que’l señor Areces amuesa pol ordenamientu xurídicu cola afirmación de que nin elli nin el PSOE tan pel llabor de permitir l’usu de la llingua asturiana dientro de l’Alministración nin pola obligatoriedá de la so enseñanza, siendo asina qu’entrambes les dos obligaciones tan impuestes a tolos poderes públicos, estatales y rexonales, pelos artículos 10 y 8, respeutivamente, de la Carta Europea de les Llingües Rexonales o Minoritaries, tratáu fechu al amparu del Pautu Internacional de Drechos Civiles y Políticos de les Naciones Xuníes y del Conveniu del Conseyu d’Europa pa la Proteición de los Drechos Humanos y de les Llibertaes Fundamentales, y ratificáu por España nel añu 2001 siendo don Josep Piqué Ministru d’Asuntos Esteriores.

  • Tristura y vergoña énte’l despreciu que’l señor Álvarez Areces amuesa pola Xunta Xeneral, muérganu llexisllativu del país que pente medies del artículu 10 de la Llei 1/98, d’usu y promoción del bable/asturianu, tien proclamao que’l “Principáu d’Asturies garantizará l’enseñanza del bable/asturianu en tolos niveles y graos… dientro del horariu escolar… y como materia integrante del currículu”, arriendes de robláu un “Plan pa la normalización social del asturianu”, col gobiernu del Principáu presidíu pol señor Areces, pel qu’ésti s’obliga, de magar l’añu 2005, a “facilitar progresivamente a los trabayadores del Principáu d’Asturies la conocencia y usu de la llingua asturiana y, nel so ámbitu, del gallego-asturianu”.

  • Tristura y vergoña, pola inorancia qu’amuesa’l señor presidente del Principáu d’Asturies al afitar que nun ta a favor “de la oficialidá nin de la cooficialidá” cuando, por mor del conteníu del artículu 3.1 de la Constitución (“El castellán ye la llingua española oficial del Estáu”), la oficialidá del asturianu sedrá –y tarde o temprano va selo-, cooficialidá col castellán, porque otra cosa nun pue constitucionalmente ser demientres Asturies seya parte d’España.

  • Tristura y vergoña porque midiéndose’l nivel democráticu d’un gobiernu, non pel númberu d’eleiciones ganaes a otros candidatos que participen en condiciones d’absoluta desigualdá, sinón pol respetu a los drechos fundamentales de tola ciudadanía, mesmamente de les minoríes, les declaraciones del Sr. Areces tienen que calificase, como poco, de fonderamente intolerantes y autoritaries.

  • Tristura y vergoña, al cabu, porque’l señor presidente del gobiernu quier responsabilizar de les sos miseries y rensíes al pueblu asturianu acusándolu de tener votao mayoritariamente escontra la oficialidá de la so llingua tradicional, lo que non solo nun ye verdá sinón que, llegáu l’intre de facelo, el resultáu sedría, talu que dicen les encuestes sociolóxiques, perfavoratible. Si lo dulda ¿por qué nun plantega un referendu que ye, de xuru, la más democrática de les consultes que se-y pue facer a la ciudadanía?.

Pola Xunta Direutiva del Aconceyamientu de Xuristes pol Asturianu, n’Uviéu, a 3 de xunu de 2008, robla’l so presidente,
Xosé María Estrada Janáriz.