La criación de nomes de dominiu n'internet va ser lliberalizada pal primer semestre de 2009, al ser aprebáu per unanimidá güei en París pela Corporación pala Concesión de Nomes y Númberos n'Internet (ICANN).
Un equipu de trabayu va presentar el mes que vien, énte'l Conseyu de la ICANN, una versión definitiva del documentu aprebáu güei nel que van detallase les modalidaes pa poner en práutica lo que ya se noma "una revolución xeográfica de la Rede", y que podía tar preparao p'arrancar nel primer semestre del 2009.
Más de 25 persones trabayaron nel documentu pa atropar les posibilidaes d'esta lliberación. En pallabres del presidente de la ICANN, Paul Twomey, "entovía queda munchu trabayu pa finar los detalles pala so puesta en práutica, na que se lleven gastao unos 10 millones d'euros".
Entá hai qu'esclucar cuánto va costar ca estensión nueva de dominiu, y el montu total d'ellaboración definitiva del documentu, que calculen andará al rodiu de los 20 millones d'euros.
Sicasí, nuna entrevista al dixital MailClub.info., Twomey dixo que "una nueva estensión de dominiu va salir por unos 63.500 euros".
Na ICANN aseguren que les nueves estensiones van tener que respetar los derechos de les marques y de les entidaes de comunidaes reconocíes.
Abrese asina una puerta pala reconocencia de la estensión ".ast" que xunte les referencies n'internet de tol dominiu llingüísticu, que ya tien reconocíos los estándares ISO 639-2, ISO-639-3. Nesti sen les que lleven un camín abondo avanzáu y van tar ya preparaos pa en cuanto seya posible el rexistru, van ser les comunidaes de Bretaña ".bzh", de Gales ".cym" y de Galicia ".gal". Va años que Cataluña tien reconocío el dominiu ".cat" pal so ámbetu llingüísticu.
Sedría bono aperiar nel intre, los pegollos pa xestionar la puesta en funcionamientu de la estensión .ast, qu'amestara a sectores de la cultura, de la vindicación llingüistica, sociales, de la comunicación, empresariales... y que fuera quien a trabayar coles instituciones polítiques, cola Universidá y col gobiernu autónomu pa facer rialidá y vidable no económico el proyeutu d'una estensión propia pal nuesu dominiu llingüísticu.
