30/1/07

Xornaes Europees d'Opera n'Uviéu



M. Caballé ye Desdémona, Uviéu 1983.

La Opera d'Uviéu, xunta teatros de toa Europa, cellebra el domingu 18 de febreru les "Xornaes Europees de la Opera".

Con esti eventu preténdese caltener la llume de cuatru sieglos de representaciones operístiques (ye'l 400 cabudañu de L'Orféu de Monteverdi), que güei lloñe d'amortecer, medren enllenando los teatros y auditorios de tol mundiu desaniciando vieyos prexuicios clasistes y conviértense en fenómenu mediáticu, algamando espacios incluso nos medios non especializaos qu'a vegaes les tresporten a les portaes.

N'Asturies, hai a lo llargo l'añu contaes representaciones d'opera tanto n'Avilés como en Xixón. Casu aparte ye'l d'Uviéu, que mantién la única temporada estable del país gracies al entusiasmu del públicu y onde foi posible allegar en pocos años a tres o cuatro representaciones de ca títulu, amás de producciones propies y coproducciones, proyeiciones cinematográfiques, operes pa rapazos, conciertos de nuevos cantantes y conferencies. Tóo ello a pesar de les continues declaraciones de políticos roceanos con tolo que musicalmente s'allonxe del himnu del partíu, y del escosu sofitu de los muerganismos autonómicos incapaces, non ya de dotar de los medios afayaizos a entidades privaes qu'arrecostinen con programaciones culturales que suplen la inhibición de la propia alministración, sinón tamién incapaces d'aperiar un proyeutu de compañía y teatru públicu col qu'albidrar un futuru granible y en condiciones d'igualdá con otros centros operísticos d'asemeyada tradición.

Tornando a la cellebración de les Xornaes, la Fundación Opera tien previsto pal domingu 18 de febreru nel Teatru Campoamor, una maratón de proyeiciones cinematográfiques de representaciones operistíques ente les 11 la mañana y les 11 la nueche. Pola pantalla grande del teatru pasarán (a falta de la confirmación de la entidá Opera d'Uviéu), les filmaciones de los caberos años que fueron trasmitíes en direutu dende'l Campoamor al Auditoriu cola collaboración de Telecable y toes recoyíes en soporte vidiu. Asina podríin volver a vese l'Aida de Giuseppe Verdi, la Elektra de Richard Strauss o la Lucrezia Borgia de Donizetti. Too ello, como digo, pendiente de que l'Asociación Opera d'Uviéu asoleye'l programa.

Tamién nesta cellebración participen otres ciodaes con dixebraos programes:

  • París.- Representaciones de La Xudía (Halévy), Diariu d'un esapaicíu (Janácek), Don Xuan (Mozart), El castiellu de Barbazul (Bela Bartók).
  • Bruxelles.- Proyeiciones de L'Orféu (Monteverdi), Aida (Verdi), Xulia (Boesmans)
  • Llondres.- Funciones de mañán de Mma. Butterfly (Puccini), El Trovador (Verdi).
Entesacamos del interesante Informe de Prensa de les Xornaes (http://www.operadays.eu/files/press-2-fr.pdf) les pallabres d'un gran compositor del sieglu XX:

"La música desixe del espeutador, una preparación y un esfuerzu, salir de casa, aforrar pa una entrada. Desixe'l mesmu esfuerzu pela so parti que de cualisquier otru vértiz del triangulu; esa santa Trinidá que formen el compositor, l'interprete y l'oyenti".
Benjamin Britten.


Facer alcordanza, que mañana dí 31 de Xineru dase la tercera representación de La Traviata de Giuseppe Verdi (Forte-Jordi-Pons) nel Teatru Campoamor y que será trasmitida en direutu a la pantalla de la Sala Sinfónica del Auditoriu. La Temporada 2006-2007 pieslla el día 2 de febreru cola cuarta representación d'esta mesma obra.

La estrena de la Temporada 2007-2008 allegará'l 15 setiembre cola primer representación de Tristan ya Isolde de Richard Wagner.



16/1/07

Valledor : ensin "alcuerdu d'oficialidá" nun habrá pautu de gobiernu


Como ya dixera nel pasáu mes de payares na Canal 10 de televisión de Xixón (ver ecd), ayeri'l conseyeru de Xusticia refería otra vegada qu'ensin un alcuerdu so la oficialidá de la llingua asturiana, nun sedría posible un nueu pautu de gobiernu ente'l PSOE ya IX.

Amás García Valledor acordóse de los portavoces del PSOE (Migoya, portavoz del gobiernu y Lastra portavoz del partíu na Xunta Xeneral) pa felicitase de velos capacitaos d'a lo menos conxugar el conceutu d'oficialidá, y refirióse a los socialistes como "d'aprendizax lento". Tamién en anteriores declaraciones na Canal 10 habíase referío a "posicionamientos enfermizos pa cola llingua", en referencia direuta a Javier Fernández, secretariu xeneral de la FSA.

Nun mos queda mui claro que ye eso del "alcuerdu d'oficialidá", suena a aquel inventu made in PP "d'oficialidá difería", Valledor debería esplicalo meyor, son munchos años ya y munchos enfotos afogaos.

Delles posibilidaes de formar un gobiernu sedríen:

gobiernu minoritariu del PSOE
gobiernu del PSOE con IX (ensin "alcuerdu d'oficialidá")

gobiernu minoritariu del PP
gobiernu del PP con IX (con/ensin "alcuerdu d'oficialidá")
gobiernu del PSOE cola UAS (con/ensin oficialidá)
gobiernu del PP cola UAS (con/ensin oficialidá)
gobiernu del PP col PSOE o del PSOE col PP (ensin problemes n'Asturies. Nin llinguisticos, nin identitarios, nin estatutarios, nin sociales, nin culturales nin tan siquier políticos nin económicos).

Les soluciones nel mes de mayu... o xunu.



Entama'l Conceyu Universitariu pol Asturianu





Esti ye'l comunicáu del Conceyu Universitariu pol Asturianu del que damos anuncia de siguío:

Acabante fundase, el Conceyu Universitariu pol Asturianu busca meyorar la situación del asturianu y la cultura asturiana dientro de la Universidá d'Uviéu.

Asturies ye una comunidá autónoma billingüe y la
so universidá tien de selo tamién, lo contrario ye da-y
la espalda al territoriu hestóricu onde s'asitia.

Convidamos a tolos miembros de la Universidá d'Uviéu a
trabayar con nós pa meyorar la situación del asturianu
dientro de la Institución.

Asturies ye billingüe, la so universidá tien de selo tamién.


15/1/07

Xuristes pol Asturianu llamenta lo curtio de mires del Tribunal Superior de Xosticia

Referímosnos a la de la Sala de lo
Contencioso-Alministrativu del Tribunal Superior de Xusticia
d´Asturies, so la presidencia y ponencia de don José
María Chamorro González pola que se-y ñega a un
doctorandu´l drechu a presentar la memoria xustificativa de la so
tesis n´asturianu, por más que los estatutos de la
Universidá d´Uviéu sofiten que l´emplegu de
la llingua asturiana «tendrá el tratamiento que establezca
el Estatuto de Autonomía y la legislación complementaria,
garantizándose la no discriminación de quien la
emplee», porque onde l´artículu 4.2 de la llei
1/1998, d´usu y promoción del bable/asturianu, diz que
«se tendrá por válido a todos los efectos el uso
del bable/asturiano en las comunicaciones orales o escritas de los
ciudadanos con el Principado de Asturias», la sentencia quier que
se llea que la tala validez ye namás pa «aspeutos
burocráticos» y, per ende, nun algama a la
presentación de la memoria xustificativa d´una tesis
doctoral, y ello ensin más xustificación que nun seyan
les afirmaciones (que non razones) de que «entiende esta
Sala», «esta Sala identifica» y «a nuestro
juicio» que s´esparden pel so fundamentu de drechu
segundu...

Sentencia llamentable porque l´artículu 10.2,
lliterales a) y b), de la Carta Europea de les Llingües Rexonales
o Minoritaries, tratáu internacional ratificáu por
España en data 2 de febreru de 2001 -siendo ministru
d´Asuntos Esteriores don Josep Piqué i Camps, talu que
reza nel BOE de 15 de setiembre de 2001-, estiende´l compromisu
d´España a permitir y/o fomentar l´emplegu de les
llingües rexonales non sólo a la presentación de
solicitúes o comunicaciones, sinón a toles actividaes que
se desendolquen dientro del «marcu de
l´alministración rexonal o local». Si la sentencia
criticada reparare, cosa que nun fai, na esistencia d´esti testu
qu´acordies cola Constitución española,
artículo 96, ye parte del nuesu ordenamientu internu,
aforraríase los sos «entiende»,
«identifica» y «a nuestro juicio» que nun son
sinón cavilgos o escurrimientos restrictivos y de dalu valir
cuando s´encaren al testu xenerosu d´un tratáu
internacional.

Sentencia llamentable porque, nel mesmu tratáu
internacional, el reinu d´España, col actu de la
ratificación, fai de só les declaraciones del Entamu, nel
que, pente otres coses, afítase que «el derecho a utilizar
una lengua regional o minoritaria en la vida privada y pública
constituye un derecho imprescriptible, de conformidad con los
principios contenidos en el Pacto Internacional de Derechos Civiles y
Políticos de las Naciones Unidas, y de acuerdo con el
espíritu del Convenio del Consejo de Europa para la
Protección de los Derechos Humanos y de las Libertades
Fundamentales». Ye persabío -artículu 10.2 de la
Constitución española- que «les normes que cinquen
a los derechos cimeros y a les llibertaes que la Constitución
reconoz interpretaránse acordies cola Declaración
Universal de los Derechos Humanos y los trataos y pautos
internacionales sobre les mesmes materies roblaos por
España». Poro, la mesma conclusión
d´endenantes: los «entiende»,
«identifica» y «a nuestro juicio» nun son
sinón cavilgos o escurrimientos restrictivos y de dalu valir
cuando s´encaren a un criteriu interpretativu xenerosu impuestu
pola Constitución.

Sentencia llamentable porque nel so Entamu la nuesa
Constitución afita que «la nación española
proclama la so voluntá de protexer a tolos españoles y
pueblos d´España nel exerciciu de les sos
llingües...», y siendo asina que l´Entamu de la
Constitución ye, como poco, un preséu interpretativu de
les normes que cinquen a los drechos fundamentales, los
«entiende», «identifica» y «a nuestro
juicio» nun son sinón cavilgos o escurrimientos
restrictivos de dalu valir cuando s´encaren a un deseyu xenerosu
de tola nación española.

Sentencia llamentable porque la llei d´usu y
promoción del bable/asturianu tien por finalidá
-como´l so propiu nome diz- promover la llingua asturiana,
amás d´amparar el drechu de los ciudadanos al so usu
(artículo 3.a), lo qu´afita xunto cola non
discriminación pol tal motivu (artículu 3.b). Y siendo
tan nidia la so finalidá, y non menos la obligación que
l´artículu 3.1 del Códigu Civil impón a los
xueces respectu a interpretar y aplicar les lleis «atendiendo
fundamentalmente al espíritu y finalidad de aquellas», los
«entiende», «identifica» y «a nuestro
juicio» nun son sinón cavilgos o escurrimientos
restrictivos de dalu valir cuando s´encaren a un criteriu
interpretativu xenerosu impuestu pol Códigu Civil.

Sentencia llamentable porque condena a les costes al recurrente
(que pa nós tien tola razón) por más que la
esistencia d´un votu particular discordante del de la
mayoría indica, polo poco, que l´asuntu tien della
complexidá xurídica.

Sentencia llamentable, al cabu, porque pa llegar a ella hebio que
quitar de la ponencia a un xurista, don Francisco Salto Villén,
que cola so capacidá, dignidá, seriedá y
discreción tien perafitáu prextixu pente la comuña
de xuristes asturianos.

Xose María Estrada Janariz,
Xurde Blanco Puente y Jesús Javier Álvarez Villa, pola Xunta Xestora del Aconceyamientu de Xuristes pol Asturianu

Uviéu

11/1/07

La ópera, el fictio y la inventio.



Nun apara'l desfile d'unos y otros en la prensa pa influyir nuna opinión pública que ya de primeres lo tenía más que nidio, poro, ya deriva, como veníemos anunciando, en zarzuela mesetaria con algún que otru llixu de lo más sofisticao.

Pa ser breve, nun voi dicir un res del artículu de Gabino de Lorenzo entituláu ¿Reparto justo? asoleyáu güei y mira que me prestaría despachame a gusto pero ye qu'el home tien tola razón, tanto no que respeuta a la sovención de la ópera, como cuando s'entruga pol porgüeyu de cuala alministración mira la sra. conseyera Ana Migoya.

Dixebriego dafechu ye lo que mos presenta Paloma Sainz tamién güei nel mesmu mediu. Ya'l entituláu, (Mejorar la ópera sin órdagos insolentes y fictios) déxamos ablucaos. Toi por asegurar que naide, pero naide, emplegaría el términu "fictio" más que Paloma Sainz. Nun voi retruca-y el farol, dicir namás que muchu cultismu nel entamu y munchu populismu mitineru'n tolo demás.

Lo que si quiero comentar del artículu de Paloma Sainz ye una reflexón (seguro que d'ella mesma, esta vez ensin dubia dala) que mos llama l'atención. Ye la siguiente (en castellán, porque nun seya que-y troque´l sintíu):

"Si esos datos (númberu de destinatarios qu'esfruten de la temporada de ópera d'Uviéu) los comparamos con el número de beneficiarios de una biblioteca pública o de un museo o de otras actividades culturales y lo relacionamos con las subvenciones públicas recibidas, seguramente que sería la propia ciudadanía la que abriría otra línea de discusión".

Esto ye'l acabose, doña Paloma, porque dígame vusté, si establecemos rellación y comparanza colos datos de la ópera n'Uviéu, tamién tará comigu'n que la vayamos facer colos de Madrid, Barcelona, Sevilla, Bilbao y Valencia, y de pasu presentámos-yos los resultaos a la ciodadanía pa que abra la llínea de discusión que-y pete. ¿Qué-y paez?. Debiera tener cuidáu coles llínies de discusión que les sos palabres pueden abrir en la ciodadanía porque non sólo pagaría la ópera, sinon munches otres actividades, inclusive puede que operaciones enteres de la alministración politica, sanitaria, de la xosticia, de la educación y muerganismos institucionales al completu cuya utilidad podría ponese n'entedichu per esa mesma ciodadanía que los mantién colos sos impuestos.
Amás de populista y gratuita, esta "reflesión" suya ye cínica porque, ya metía nesti castañéu, debería facer lo posible por d'esplicá-y a la ciodadanía cualos son los temes más afayaízos colos qu'abrir llinies de discusión, sedría un bon niciu demócrático pola so parte. Poro, como nun va ser d'esta..., pallabres vacíes señora candidata.
Hai coses que tan muy bien pa discutiles o espresales en grupín y con una botellina sidre, pero dexales escrites... nun se yo.

Pa tolos los que xustifiquen les desigualdaes (seyan de persones, de comunidaes sociales, polítiques, llinguistiques, culturales) y que paecen creyer que los Drechos de los ciodadanos van lligaos a la fuercia (política) de que se dispón nun determináu momentu, recomiéndoyos lo más allonxáo a la moda super-mega fictio:

"Se vuol ballare signor contino". Mozart. Les Bodes de Figaro.

10/1/07

Opera d'Uviéu. La Traviata (G. Verdi). Díes 27-29-31 de xineru y 2 de febreru. Teatru Campoamor



Violetta Valéry
Cinzia Forte
Alfredo Germont
Ismael Jordi
Giorgio Germont
Joan Pons
Flora Bervoix
M. José Suárez
Barone Douphol
Enrique Sánchez Ramos
Marchese d´Obigny
Juan Manuel Muruaga

Direición musical
Corrado Rovaris

Direición d'escena
Jonathan Miller

Orquesta Sinfónica Ciodá d'Uviéu
Coru de la Ópera d'Uviéu

9/1/07

Actu III. El Caballeru la Rosa (Der Rosenkavalier)



La polémica so la ópera n'Uviéu paez que nun tien fin. Dempués de salir los socialistes ún tres otru intentando catar a vaca escosa, diéron-y la vez al presidente Areces que, total, pa ná.

Agora, Gabino de Lorenzo alcontró'l testigu en suelu y pañolu coles dos manes. Tien tola razón cuando diz que los socialistes tovieron munches oportunidaes pa llucise y dexáronles esnidiase por propiu afatamientu; "oxalá fuereis quien a desdecivos", dixo.

El casu ye que, aprovechando la coyuntura y cual "caballeru de la rosa", promete que sedrá'l hipotéticu gobiernu del PP que surda de les elleciones xenerales nel 2008 el que salve la ópera y l'asitie nel llugar que-y correspuende. Casu contrariu retirarase de la política. Nun diz que vaya dimitir, diz que va "retirase".

Esto del retiru sonábame abondo, si nun hobiere hemeroteques nun se que diba ser de nos, y llévamos al 30 d'avientu pasáu, día nel que un periódicu dá la noticia del "Brindis del Nadal" (¡hala, ya salió la traviata!) y entitulaba asina: "Lorenzo dexa entever que la llexislatura que vien será la cabera" (ver LVA). A esto d'usar la táctica del retiru pa dos casos dixebraos, nel falax financieru nómase "optimizar recursos".

Lo que ta nidio ye que si el PSOE sigue afitando procesos asimétricos (autonomía asimétrica, financiación asimétrica, oficialidá asimétrica, ópera asimétrica, peaxes asimétricos) con toes les comunidaes menos con Asturies, dalguíén va sacar réditu políticu del abandonu y del ningunéu y demostrará que ye porque nun tenemos gaita propia nin nel palcu nin na orquesta.

Tócamos esperar agora a ver quien echa'l telón, porque nin actu, nin cuadru nin epílogu caben ya nesta ópera, salvo que quieran convertila'n zarzuela ( y da-y otra alegría a Gabino y al PP).

En cualquier casu, los responsables de tamañu despropósitu (anque ún de tantos) sábese quien son, los paganos y solmenaos tamién.


8/1/07

Areces: La culpa tienla Aznar




Les sorrealistes declaraciones feches al debalu pol presidente'l principáu so les sovenciones a les óperes d'Uviéu/Bilbao, fan qu'el debate siga allumando y garre puxu.

Yera esperada la salida del presidente a la palestra dempués del circu que montaren Paloma Sainz emponderándose y Fernando Lastra metiendo más ruíu que una mini-moto.

Lo que naide nun podía maxinar yera que la tema podía ponese entovía pior, ya que Vicente Alvarez, écha-y la culpa de la aprebación de los 800.000 euros a la ópera de Bilbao nos presupuestos del estáu pal 2007 a los pactos d'Aznar col Partíu Nacionalista Bascu (PNB). Pero que ye ésto, oh!, ¿será qu'el presidente carez de la memoria?

Esti señor (J.M. "Ansar") yera cabezaleru del PP, partíu que perdió les caberes elleciones y quien les ganó y formo'l gobiernu, que ya va pa tres años, foi ZP (¡al ataque..!), y la enmienda qu'había aprobao'l Senáu (PP + nacionalistes catalanes) aperiando distingos ente Uviéu y Bilbao nesos 8oo.ooo euros, cháronla a rodar caleyón abaxu'l PSOE + nacionalistes bascos (PNB) + nacionalistes gallegos (BNG). Ai!, pa la memoria hai que comer más pescao!.


Podemos falar del restu de les inversiones, como fai el presidente, destinaes a la ciodá d'Uviéu, pero la rialidá ye que nun fai tantos años Uviéu y Bilbao teníin, al empar, la segunda temporada d'opera del Estáu (per calidá, cantantes, númberu d'operes presentáes, númberu de funciones...) a les qu'adelantaba namás Barcelona, y agora per mor de les sovenciones, a Uviéu ya la entepasen el propiu Bilbao, Madrid, y no tocante a poderíu económicu, qu'el artísticu ye más que discutible, Valencia y Sevilla que a golpe tamién de perres públiques pasaron de tener tol prau pacíu a asitiase al ras de los grandes d'Europa. Ni que decir tien, que toes estes ciodaes tienen desllumantes teatros d'opera, espeutaculares auditorios, muséu de les belles artes, d'arte contemporaniu, como poco dos o tres canales de televisión autonómica en llingua propio y dalguna hasta un teatru nacional, tóo ello con aportación estatal.

Vamos tratar llargo d'equí a les elleciones de mayu d'esta mesma tema, peru énte l'autismu del parlamentu español, la rellambida
(dolce) galbana de Paloma Sainz, les bocayaes de Fernando Lastra y les absurdes manifestaciones del presidente, nun queda otra que dicir: ¡¡¡ YE PA DALO A VOCES...!!!


Mariella Devia y Josep Bros. Donizetti. Lucrezia Borgia. Opera d'Uviéu - 2004

Melodrama, griesca y nepotismu

7/1/07

La conseyera cultura xuega coles palabres y pervierti el conceptu d'oficialidá


















Nunes declaraciones a un periódicu de Xixón, la conseyera de cultura dexa afitao el so firme rechazu a la oficialidá de la llingua asturiana. Y una vegada más, col verbu que la carauteriza, enguedeya les palabres pa paicer que diz una cosa cuando en rialidá diz tolo contrario. Por tantu, un engañu y una trola. Esti métodu ye más propio del marketing y de la publicidad, pero tamién lu empleguen dellos políticos pa tapecer el fedor a engañifa de los sos posicionamientos.


Ana Migoya diz que na FSA-PSOE son favoratibles a la proteición, promoción ya'l usu de la llingua como un patrimoniu perimportante y ye llabor de la so conseyería puxar per illo y facilita-yos a los ciodadanos el so emplegu'n llibertá peru ensín oficialidá, porque ésta implica una obligación que sigún ella los asturianos nun tan dimpuestos a asumir.

Y lo que Ana Migoya, conseyera de cultura del principáu d'Asturies, paezmos que quier dicir y nun s'atreve, nun ye quien o nun-y interesa un res, ye que na FSA-PSOE nun son favoratibles a la oficialidá polo qu'esta implicaría d'obligación a la proteición, a la promoción y al usu d'esi perimportante patrimoniu y que lo cual los socialistes nun tan dimpuestos a asumir.

Paez asemeyáo, pero ye tolo contrario. y sobre tóo retrátanos al personax. Claro que reconocer públicamente esti fechu sedría posicionase en contra de lo que diz la Costitución ya'l Estatutu d'Autonomía y esto dexaría a Migoya y a'l partíu de los socialistes n'Asturies nuna mui dificil ya inesplicable posición política complicáo de resolver mesmo colos sos cursinos de marketing llinguísticu.

Que la conseyera mos desplique si esto nun ye ser enemigos de la llingua asturiana, pero favor-y pido que seya nun llinguax menos abegosu y beséu al que mos tien avezaos.

Entrugáme y entrugar cuánto duraríin nel so cargu, en cualisquier otru pueblu estos... nun se como nomalos, qu'entienden la democracia y l'exerciciu de los drechos d'una forma tan peculiar.

Comprendo que la democracia n'Asturies ye entovía moza, faltá-y rodax y qu'el posu cultural de la dictadura nun se pué esborrar d'un plumiazu. Agora bien, por qué n'Asturies se caltienen con tanta fuercia ya incluso trespasaron otra xeneración.

El síndrome del desertor del garabatu sedría la desplicación sociolóxica a un fenómenu que n'Asturies ye endémicu y va pa convertise'n epidemia.



6/1/07

La Opera xúbi-y los colores a la candidata socialista



La Fundación Opera d'Uviéu asoleya güei sábadu nun mediu uvieín, una carta dirixida a la candidata socialista al Conceyu nes prósimes elleciones, na que esmonta toles argumentaciones que nun artículu d'opinión apaecíu díes enantes nel mesmu mediu, la propia candidata Sainz xustificaba la bayura perres de diferencia que nos presupuestos del estáu del añu 2007 (y tamién nos anteriores), se-y apurren a temporáes d'opera'n dixebraes comunidaes y'n concretu a la ópera de Bilbao en comparanza coles que se-y asiñen a la temporada d'ópera d'Uviéu.

Sainz, aficionada a la ópera (sigún éstes y anteriores declaraciones feches al mesmu mediu), dexa entever falta de proyectu cultural, de aiciones de fomentu, de novedaes en títulos, producciones etc. Rescampla cierta dexadez en collaboración de la Opera con otres instituciones de fomentu o ensiñanza de la música, asina como falta d'averamientu a rapazos ya mozos.

Tóes estes apreciaciones de Paloma Sainz ye lo que la propia Opera consigue desmontar cola so carta de rempuesta como si d'un decoráu del Falstaff de Verdi o de la Serva Padrona de Pergolesi se tratare, pieza a pieza ya puntu per puntu, demostrando que se fái éso y muncho más.

Cuántaya, n'aquel famosu llibretu "Construiyendo Asturies", ya Paloma Sainz facía unes declaraciones nes qu'espeyaba qu'el tema musical ye de los sos favoritos; dáquella dixo que yera el gobiernu autonómicu l'únicu braeru sofitu de la ópera.

Tamién tien unes palabres la Fundación Opera d'Uviéu pa unes desnortiaes declaraciones propio de xentecaya, feches pol portavoz del PSOE Fernando Lastra nes que recomendaba a los socios de la Opera d'Uviéu facer aportaciones del so bolsu si queríin una bona temporada. A tóo esto nel escenariu (Congresu los Diputaos) represéntase y dáse-y preste per parte'l PSOE a una suba'n 800.000 euros na sovención a la Asociación Bilbaína d'Amigos de la Opera.

De xuru qu'entovía nun va cayer el telón, retrucará el PSOE, de seguro. Lo deseyable sedría que quien representare'l papel nel prósimu actu seya un poquiñín más sensible que la candidata Sra. Sainz o'l diputáu de la Xunta Xeneral Sr. Lastra pa cola música, cola ópera, cola cultura, cola igualdá, cola verdá y col ciodadanu, seya ésti últimu contribuyente pa cola alministración del estáu o pa cola Diputación Foral de Bizcaya.

Campaña pol puntu.ast pal dominiu llinguisticu asturianu



Ta acabante presentáse la campaña "naguamos pel puntu.ast" que forma parti de la primer aición de la tamién recién "Asociación por un puntu.ast", que ñaz col enfotu d'algamar la aprebación de un nome propiu n'internet pa la llingua y cultura propio del dominiu llinguisticu asturianu.

Garrando como exemplu l'Asociación punt.cat qu'algamó en setiembre de 2005 un dominiu propiu col qu'identificar les manifestaciones culturales nel ámbetu de la llingua catalana, l'asociación puntu.ast diz tar abierta a sofitos de cualisquier siñu.

Habrá qu'esperar que pasen les fiestes y vacancies del Añu Nuevu y reis pa ver si la conseyería cultura o'l propiu gobiernu autónomicu fan daqué declaración al respeutu.
Nos, dámos-yos el nuestru sofitu y falaremos de les sos xeres.