29/1/09

La Xunta d'Escuela de Maxisteriu refuga, per una mayoría achaplante, el plan propuestu pola direición.

La movilización urxente foi decisiva pa llograr qu’esti nuevu ataque a los derechos llingüísticos y educativos llegare a consumase.

Los planes de la dirección de la Escuela Universitaria de Maxisteriu viéronse refugaos por mayoría amplia (48 votos contra la propuesta, 23 a favor).

Nel conceyu de la Xunta d’Escuela hebo varies intervenciones de profesores y representantes d’alumnos qu’amosaron el so maltar ente les actitúes de la Dirección. La propuesta presentada y refugada yera claramente contraria a tolos mandaos llegales que regulen la presencia de la llingua asturiana nel sistema educativu.

El fechu de presentar un programa diseñáu pa da-y gustu a los sectores más retrógrados y nostálxicos del búnker universitariu ta destináu al fracasu porque la sociedá asturiana superó fai bien de tiempu estos prexuicios como demostraron l’alumnáu de la Escuela, el profesoráu y los sindicatos d’enseñanza que tuvieron presentes na concentración qu’entamó a les 11:30.

La Xunta pola Defensa de la Llingua Asturiana quier facer un llamáu a toles persones, instituciones y departamentos involucraos a que s’impliquen en buscar una solución satisfactoria a esta situación.

El resultáu de la votación de güei ye una primer victoria. Sicasí, agora ye’l momentu d’atopar y afitar el sitiu que correspuende a los estudios de llingua asturiana na Escuela de Maxisteriu.

L’equipu rector de la Universidá, el Gobiernu Asturianu y la Conseyería d’Educación tienen la obligación d’intervenir na defensa de les lleis poles que se rixen los derechos educativos de los asturianos.

La realidá llingüística d’Asturies -munchos de los neños y neñes qu’acceden al sistema educativu tienen l’asturianu como llingua materna- obliga a que l’asturianu sea parte esencial de la formación de los mayestros y mayestres, non solo d’aquellos qu’han poner escuela de ll’asignatura de Llingua Asturiana.

Por ello, los nuevos planes d’estudiu han cuntar con una Mención de Llingua Asturiana. Amás d’esto, ha garantizase la presencia digna del asturianu nos programes d’asignatures troncales de los títulos de Educación Infantil y Primaria.

Vía| Xunta pola Defensa de la Llingua Asturiana

Garcia Valledor (IX-Bloque-LV) tacha d'illegal la propuesta de la direición de Maxisteriu .

Francisco Javier García Valledor, diputáu de la coalición IX-Bloque-LV na Xunta Xeneral declaró que ye "imcomprensible que Maxisteriu nun recueya la llingua asturiana como mención " y que d'aprebase la propuesta "el Gobiernu d'Asturies tendría que la refugar por ser illegal"

Unidá Nacionalista (UNA) acusa'l PSOE d'esterminiu la cultura asturiana y a IX-Bloque d'atapalu

El voceru d'Unidá Nacionalista Asturiana (UNA), Faustino Zapico, culpó esta mañana al gobiernu asturianu -como últimu responsable de la situación del enseñu de la llingua- de la nueva agresión a la llingua asturiana que supón la non incluxón del asturianu ente las Menciones de los planes de Maxisteriu que presumiblemente van aprobase mañana.

Según Zapico la formación considera que "nun ye posible que se faiga una operación d’esta mena ensin la connivencia del gobiernu y del conseyeru d’educacion" y que "esti ye un pasu pergrave na política de desaniciu de la llingua asturiana en tolos ámbitos que nun seyan meramente folclóricos, que vien faciendo’l PSOE nos caberos años".

El voceru d’UNA amestó que "amuésase otra vegada qu’IX y Bloque por Asturies non solo nun son a algamar un cambéu na política del PSOE nel ámbitu cultural y llingüísticu sinon que son collaboradores necesarios para llavar la cara a la pretenxón del PSOE de desaniciar cualaquier posibilidá de sobrervivencia de la llingua y pa qu’esti partíu seya a caltener una política empobinada a facer desapaecer la llingua asturiana”.

Zapico apuntó tamién a la incompetencia y la falta de seriedá del equipu rectoral que nun foi a caltener la so promesa de dignificar la presencia del asturianu na Universidá d’Uviéu y manifestó'l so sofitu a toles actividades reinvindicatives que busquen torgar esti nuevu atropellu a la cultura asturiana, que nesti casu afecta a la posibilidá de formación n’igualdá de condiciones del profesoráu de llingua asturiana.

28/1/09

El Bloque por Asturies, inxertáu nel gobiernu qu'abandera la refuga l'asturianu, "llamenta" la illegalidá que va cometese'n Maxisteriu.

El voceru del Bloque por Asturies, Pablo Fernández, consideró güei "llamentable" que la Escuela de Maxisteriu de la Universidá d'Uviéu nun incluya l'asturianu ente les especialidaes que mañana se van someter a votación na Xunta d'esti centru.

En declaraciones a Europa Press, el representante de la organización asitió esta decisión de la direición de la escuela nel contestu de "cambiu de filosofía sobre'l conceutu de la Universidá" qu'al so xuiciu ta introduciendo'l llamáu Plan Bolonia.

"L'Asturianu", señaló, "ye una llingua que sufre una serie de torgues nel ámbitu políticu, y denunciamos que tamién esto tenga una prollongación nel ámbitu de la Universidá". "Dientro d'esta discriminación, en Maxisteriu creemos que l'asturianu va tener qu'acabar nun 'máster', que ye una forma refinada de discriminación, porque'l que quiera estudiar asturianu nel meyor de los casos va tener que pagar un pastón".

Dende'l so puntu de vista ta afondándose na "mentira que se tentó de repetir munches veces, que ye que val más estudiar inglés qu'asturianu", y que "equí lo qu'importa ye'l beneficiu empresarial y económicu".

Nesti sen, mostró l'apoyu del Bloque "a tolos estudiantes na concentración de mañana de la Xunta Pola Defensa y de la Llingua y anunciar que vamos dar la talla nesti terrenu tolo que podamos".

d'europapress

27/1/09

La Xunta Moza denuncia que la Escuela Maxisteriu revuélvese escontra l'asturianu

La dirección de la Escuela de Maxisteriu pretende eliminar a la llingua asturiana de los nuevos planes d’estudios qu’han aprobase pa la so adaptación al conocía Plan Européu de Bolonia.

Amás, esta dirección d’escuela quier facelo a la mayor urxencia, el prósimu xueves 29 va votase la propuesta sobre les menciones qu’han acompañar los estudios troncales d’Educación Infantil y Primaria.

Les menciones de la propuesta de la dirección son: Llingua Española, Matemátiques, Conocimientu del Mediu, Educación Física, Educación Especial y Educación Artística. Nun hai sitiu pa la Llingua Asturiana, colo que de salir alantre los estudios d’asturianu necesarios pa la formación del profesoráu desapaeceríen dafechu.

La Xunta pola Defensa de la Llinga Asturiana y la Xunta Moza valoren esti nuevu ataque como’l más grave d’estos últimos trenta años, yá que de consumase pondría en cuestión la presencia de la llingua asturiana nel sistema educativu.

Concentración de protesta esti xueves en Llamaquique

Por ello, la Xunta pola Defensa de la Llingua Asturiana y la Xunta Moza convoquen d’urxencia una concentración de protesta’l prósimu xueves 29 a les 11:30 delantre la Escuela de Maxisteriu, nel Campus Universitariu de Llamaquique n’Uviéu.

26/1/09

Andecha y Fai! refuguen marafundiar perres nes chapes d'Osborne mentanto'l patrimoniu asturianu esapaez

Comunicáu d'Andecha Astur

Énte la bona anuncia de que l’acabante vendaval baltó cuasi que dafechu el toru d’Osborne de Llanes, Andecha Astur pide a les autoridaes competentes que s’aprofite la circustancia y se proceda a la retirada de los restos de semeyante amuesa de mal gustu y españolismu cañí.

Andecha Astur yá se manifestara nel so momentu escontra la sentencia del Tribunal Supremu del 30 d’avientu de 1977 que-y apurría valir cultural a esti antiguu reclamu publicitariu, expresión del tardofranquismu y de la falta de gustu. Resulta abegoso atalantar les reiteraes inversiones que les autoridaes culturales asturianes vienen rializando nel so caltenimientu (darréu que tradicionalmente vien siendo oxetu d’estremaes «agresiones» pola mor de la refuga social que xenera n’Asturies), pero sedría un auténticu escándalu que tando comu ta’l padremuñu asturianu (hestóricu, arquiteutónicu, etnográficu…) víctima del desenfotu d’ayuntamientos y «Principado» y de la falta presupuestu pa la so conservación, se marafundie ensiquier un euru en recostruyir (el vendaval féxomos el favor de desvencixalu práuticamente dafechu) lo que nun dexa de ser una valla metálica cuyu valir artísticu ye nidiamente nulu, y que políticamente espresa’l más ranciu españolismu na so versión más cañí y «torera», qu’evidentemente nun guarda denguna rellación cola rialidá nin la sensibilidá cultural llanisca en concreto nin asturiana en xeneral.

Concretamente, y si de rializar inversiones en recuperar el padremuñu se trata, Andecha Astur quier remembrar la situación na que s’afaya’l más importante yacimientu paleolíticu llaniscu, la Cueva las H.errerías – La Perea, Llanes- pesi a tar declarada Bien d’Interés Cultural, que s’afaya nunes llamentables condiciones, sigún espeyen informes acabantes, con agua contaminao, basories, pintaes, estalactites rotes y vaciáu de sedimientos.Ehí y non nel patéticu toru d’Osborne ye onde tien d’invertise’l dineru de padremuñu.

Comunicáu de Fai!-Asturies

  • Fai! refuga, en primer llugar, l’estáu d’escepcionalidá llegal en que s’atopen les valles publicitaries del OSBORNE Y CIA S.L., al marxe de la llegalidá vixente nel estáu, qu’ordena la retirada de tou tipu d’anunciu publicitariu nel entornu de les carreteres fuera de los núcleos urbanos. Esti artículu, presente nel Reglamentu Xeneral de Carreteres del MOPTMA (Ministeriu d’Obres Públiques, Transportes y Mediu Ambiente) creó una “escepción” tres d’una sentencia del T.Supremu, que consideraba que les valles publicitaries “han superado su inicial sentido publicitario y se han integrado en el paisaje”, razones que dende Fai! rechazamos fondamente.
  • Consideramos qu’un monumentu n’homenaxe a la tortura animal que representa l’espectáculu de les corríes de toros, reconocida por milenta instituciones y coleutivos internacionales como tal, nun ye almisible nestos tiempos. Una alministración con una mínima sensibilidá humana nun puede siguir dando sofitu y perres a una actividá que tien como únicu enfotu l’asesinatu d’un ser vivu ensin otru aquel que’l lucrativu y recreativu. Un pueblu como l’asturianu, onde la base de la economía foi durante sieglos la ganadería, nin apoya nin entiende la tortura d’un animal como divertimentu.
  • Entendemos como una imposición cultural a la fuerza la promoción añu tres d’añu d’unos “festexos taurinos” que tienen un siguimientu mui minoritariu y desigual nel país y que vienen a responder, una vegada más, a l’intentu de fomentar n’Asturies una cultura inesistente, rancia y mofienta cola qu’esti pueblu enxamás tuvo nada que ver y qu’amás afonda n’estereotipos machistes y clasistes con subvención pública.
  • Fai!, poro, rechaza dafechu cualquier tipu de reparación y reinstauración de la valla publicitaria a cargu de l’alministración coles perres del pueblu asturianu, pidiendo amás la retirada inmediata de los otros cuatro paneles de OSBORNE Y CIA S.L. en Grau, Carreño, El Berrón y Sta. María de Piedramuelle. Abúltanos escandaloso que dende instituciones públiques se fomenten y defendan con perres de toes y toos los intereses comerciales d’una marca privada o los propios “festexos taurinos” y, con ello, se dea apoyu esplícitu a postures d’imposición cultural y maltratu animal como estes. Asinamesmo, insta a les autoridaes a siguir exemplos de dalgunos conceyos asturianos y declarar Asturies como un país antitaurín y garante de los derechos de los animales

25/1/09

El Botín de l'Alministración Pública Asturiana

Un de los problemes estructurales más graves que carez Asturies ye’l de la politización de les sos Alministraciones Públiques pente medies del procesu conocíu como “clientelismu”, fenómenu que s’afita nuna seleición de personal per criterios se sometimientu que non de méritu y capacidá.

Cuando’l cáncanu xorrez fasta abarcar a tolos niveles y estayes de lo público, fína dafechu la operatividá d'una de les principales ferramientes pa la toma de decisiones nes sociedaes modernes.

Pa pone-y toles torgues posibles a esti mísere cáncanu ñació’l Conceyu por Otra Función Pública n’Asturies, anguañu presidíu pol xurista Xabiel Álvarez Villa, el mesmu que presentará’l so trabayu

“EL BOTÍN DE L’ALMINISTRACIÓN PÚBLICA ASTURIANA”

nel Llar de la Sociedá Cultural Xixonesa

(Cai Belmonte, 4 entesuelu-drecha. Xixón)

el XUEVES 29 de XINERU a les 20 hores.

Dende la Secretaría del Aconceyamientu de Xuristes pol Asturianu cónvidase a tolos asociaos y amigos a participar nesti perimportante foru.


21/1/09

La situación d'illegalidá de la llingua asturiana dexa a los cineastes ensin un euru nes sovenciones del Estáu

Con cargu al Presupuestu del 2008 les partíes pa producciones en llingües cooficiales dótense 2.500.000 euros que xubirán a los 10.500.000 nel exerciciu 2009.

El Boletin Oficial del Estáu númberu 17 d'ayeri martes 20 de xineru espubliza una Resolución de la Secretaría Xeneral Téunica na que se da anuncia a los convenios de collaboración ente'l Ministeriu de Cultura y les Comunidaes Autónomes de Cataluña, Valencia, Islles Baleares, Galicia y País Vascu que recueye les condiciones y compromisos que-y son aplicables al fomentu, la producción, distribución y promoción de la industria cinematográfica y audiuvisual en llingües cooficiales distintes al castellán.

Los proyeutos na llingua catalana de Baleares y Cataluña y na de Valencia, van dotase con un total de 1.721.500 euros. En Galicia van recibir 652.500 euros y los del País Vascu 126.000. Estes partíes con un montu total de 2.500.000 euros correspuenden a los Presupuestos Xenerales del 2008. Pal añu 2009 el fondu pa la promoción de trabayos en llingües cooficiales, va ser de 10.500.000 euros. Los proyeutos n'asturianu nun van recibir nin un euru d'estes partíes.

Queda asina n'entedichu tol ordenamientu xurídicu que supuestamente protexe la llingua asturiana (Constitución Española, Estatutu d'Autonomía, Llei d'Usu y Proteición del Asturianu y Carta Européa de les Llingues Minoritaries), ensin que los gobiernos del Estáu, del Principáu, la Xunta Xeneral nin los representantes políticos faigan traza de poné-y igua.

Afáyase, una vegada más, que l'estatus de la llingua asturiana ye de situación predemocrática, de reprexón y d'illegalidá manifiesta.

19/1/09

El BOPA va siguir asoleyándose namás qu'en llingua castellana


Güei termina'l recorríu del Boletín Oficial del Principáu d'Asturies en "formatu papel", mañana la versión ellectrónica dixital va convertise na única oficial y tará na rede tolos díes hábil.

Tamién va ser la versión castellana la única oficial ya que nun se va asoleyar n'asturianu.

El Decretu 218/2008 de 29 d'avientu col que s'apreba'l Reglamentu del Boletín Oficial del Principáu d'Asturies encabeza les disposiciones del númberu correspondiente al llunes 19 de xineru de 2009 y nel so artículu 5 diz lo que vien darréu:

Artículo 5.—Lengua:

  • El BOLETÍN OFICIAL del Principado de Asturias se publica en castellano, sin perjuicio de lo previsto en el artículo 5 de la Ley 1/1998, de 23 de marzo, de uso y promoción del bable/asturiano y en las demás normas que lo regulen.

Pa que naide nun se llame a engañu, facer notar que la referencia a la Llei 1/1998 d'Usu y Promoción del Asturianu fáise, como avecen los gobiernos socialistes d'Asturies dende cuantayá, por "imperativu llegal" como tienen demostrao. Pallabrería llegal que nun pierde ocasión de referise a una Llei que va pa once años ensin desendolcu reglamentariu.

La Llei d'Usu y Promoción del Asturianu surdía del gobiernu presidíu por Sergio Marqués col sofitu del Partíu Asturianista ye, xunta la Carta Européa de les Llingües Minoritaries, l'únicu preséu llegal del que se dispón n'Asturies pa la defensa de la llingua del país. Dambes normes, con un plantegamientu xurídicu curiosu, diben obligar a los gobiernos español y asturianu al reconocimientu de la so oficialidá. La derogación de la llei va ser prioritaria na prósima llexislatura y va dexanos nuna indefenxón total.

Vamos falar claro, reprímese'l drechu de los asturianos al usu de la so llingua propia. L'Estáu español y el Principáu d'Asturies PROHIBEN la llingua asturiana y ésti sí ye un fechu diferencial d'Asturies.

15/1/09

AXA escalifica l'actuación de l'Audiencia nel "casu Fer". Ser catalán garantiza drechos, ser asturianu NON

Una discriminación incalificable

14 d’abril de 2008. El Plenu de l’Audiencia Nacional anula’l xuiciu siguíu énte’l Xulgáu Central de lo Penal (con sede en Madrid) escontra dos mozos catalanes condergaos a 15 meses de prisión por un delitu d’inxuries a la Corona (quemaren una semeya de los reis). L’anulación tien l’orixe en torgar a los acusaos l’emplegu del catalán, lo que’l Plenu califica como infracción a la tutela xurídica efeutiva y al procesu debíu porque, talu que proclama na sentencia, “ye una garantía del drechu a la defensa permitir al acusáu que s’esprese na so llingua materna”.

13 de xineru de 2009. A un mozu asturianu (Fernando González, “Fer”), pal que pidi’l fiscal una pena d’ocho años de prisión, ñéga-y la Estaya Cuarta de lo Penal de l’Audiencia Nacional l’emplegu de la so llingua materna, l’asturianu, na so defensa.

Nel Aconceyamientu de Xuristes pol Asturianu (AXA) nun fuimos pa dar cola pallabra afayadiza (y non faltosa) pa calificar la discriminación llingüística y l’actitú de la xueza. Poro, remítimonos a los fechos que, d’otramiente, falen solos.

Por embargu si qu’espresamente-y encamientamos a l’Audiencia Nacional que garantice dafechu’l drechu a la defensa del acusáu asturianu y al gobiernu y parllamentu español qu’entame, d’una vez, a cumplir los compromisos que pa cola llingua asturiana alquirió nel añu 2001 cola robla de la Carta Europea de les Llingües Rexonales o Minoritaries y, al empar, colos mandaos al respeutu del Comité de Ministros d’Asuntos Esteriores del Conseyu d’Europa, camín amañosu pa cortar pela freba con esta castra de neciures.

12/1/09

L'Audiencia Nacional impidi a un procesáu el drechu a declarar na so llingua.

El xuiciu que se sigui na Audiencia Nacional escontra Fer, Fernando G., foi aplazáu güei pal 29 xineru al negase la xueza a que l'acusáu ficiera usu de la so llingua, l'asturianu.

La maxistrada refugó el drechu del acusáu a espresase na so llingua a pesar d'allegar la defensa incumplimientu constitucional sigún l'artículu 24, y atopase na sala una traductora d'asturianu a la espera de poder exercer el llabor.


La xueza encargada del casu refirióse a la llingua asturiana como "non cooficial" y dixo tamién que si ella falare en castúo "naide nun la diba entender".

Nun ye ésti el primer casu que por mor de la llingua se prevoca indefenxón xurídica nos tribunales españoles, cuantayá dávense casos coles llingües catalana, vasca y gallega. Angüañu, esto solucionóse pa les citaes llingües, pero a lo que paez, l'asturianu per nun esfrutar del reconocimientu d'oficialidá, ye una llingua prohibida y los sos falantes son obligaos a escoyer ente'l so idioma maternu ol drechu a defendese.

El xuiciu escontra Fer, abriráse de nuéu el 29 de xineru y l'asturianu, la llingua propia d'Asturies, "oficial o non ye cosa d'ellos" (dixo Fernando na cabera entrevista), tará xunta él nel escañu l'Audiencia.