Rossaleda Jazz Quartet Meyor Cantar n'Asturianu de los Premios de la Música

Rossaleda Jazz Quartet col so canciu Na fonte, fízose güei col Premiu al Meyor Cantar n'Asturianu de los Premios de la Música de l'Academia de les Artes y les Ciencies entregaos esta mesma nuechi nel Gran Teatru de Córdoba.

Foron finalistes dientro'l mesmu apartáu, Toli Morilla col so canciu Cuando naide lo ve y el Colectivu Músicos pola Oficialidá con Un Pasu Alantre, canciu producíu pola Xunta pola Defensa de la Llingua pal Día de les Lletres Asturianes del añu pasáu.

Joan Manuel Serrat foi galardonáu col Premiu al Meyor Cantar en Catalán-Valencián y a la hora de recoyer el premiu, refiriose a la pluralidá llingüistica del Estáu pa reivindicar que tamién los cancios en bascu, en gallegu y en catalán podieren participar nel palmarés de los premios mayores. Citó pol so nome a estes tres llingues escaeciendo dafechu l'asturianu, ensin que pasaren nin cinco menutos dende la recoyida del premiu al meyor cantar na llingua d'Asturies.

Barrunto que cuando vien a Asturies combidáu polos sos importantes collacios, nun-y enseñen dala cosa que de la ruta de les marisqueríes de Xixón. ¡Que pena!.

El conseyeru Valledor reclama al Gobiernu español drechos nel usu del asturianu.

Conseyeros de siete comunidaes autónomes coles trasferencies de la Xosticia trasferíes, ente les que s'atopa Asturies, reclamaron el pasáu vienres 16 en Compostela al gobiernu español, el drechu de los ciodadanos al usu del asturianu y de les demás llingues del Estáu nos procedimientos xudiciales.

Sigún Valledor, Conseyeru de Xosticia d'Asturies(Izquierda Xunida-Bloque por Asturies), "instóse a les estituciones con competencies de xosticia a que se garantice'l drechu de los ciodadanos de poder dirixise a los xulgaos ya tribunales na llingua que llibremente escueyan, sigún la normativa de ca comunidá autónoma y los sos planes de normalización llingüistica".

La falta d'oficialidá de la llingua asturiana nun ye torga, sigún Valledor, porque la Llei d'usu y la normativa autonómica obliga a la so proteición y difuxón. Tamién dixo que la Carta Européa de les Llingues Minorizaes reconoz estos drechos a los ciodadanos falantes de llingues que nun son oficiales pero que como l'asturianu tan amparaes per normes llegales autonómiques.

Nun ye la primer vegada que se tomen alcuerdos d'esti cálter referíos a l'alministración de xosticia o a otres estayes del poder políticu o llexislativu pero los réditos recuéyenlos el catalán, el gallegu y el bascu.

Los drechos de los ciodadanos d'Asturies al usu de la llingua propia zapicarán una vegada más escontra la rialidá de la falta de rangu oficial y esborrarálos testeronamente la mareona de la inorancia y el sectarismu intoleranti.
Y demientes la llingua nun seya oficial, Sr. Conseyeru, los asturianos nun podremos exercer los drechos democráticos d'usu de la llingua propia énte estamentos nin de la xosticia nin de res, nin nel estáu nin n'Asturies.
Asina y tóo, el so esfuerciu d'equí a algamar rangu d'oficialidá pal asturianu fáisenos amañosu.

Xuristes tachen a la Conseyera de la Presidencia d'actitúes fosques ya intolerantes

L'Aconceyamientu Xuristes pol Asturianu mantuvo una reunión el xueves día 15 en cuenta d'estudiar el casu de la negativa per parti de la Conseyería de la Presidencia de facer treslláu de los permisos mélicos solicitáos per Xurde Blanco, funcionariu del Seviciu Xurídicu de la mesma, per tar cursaos n'asturianu.
De la reuníon surdió el acuerdu de pidir la dimisión inmediata de la Conseyera de Presidencia María José RAMOS (PSOE), "pola so actitú fosca ya intolerante pa cola llingua asturiana y los funcionarios que fan empregu d'ella". Tamién piden la dimisión del Direutor Xeneral de Rellaciones Estitucionales y del Serviciu Xurídicu y del Xefe de Serviciu Xurídicu que foron los mandáos de la conseyera pa executar «les midíes de cálter discriminatoriu o represor».

Pela parti de l'Alministración, el Direutor Xeneral de Rellaciones Estitucionales y del Serviciu Xurídicu del principáu, Manuel CABALEIRO TEIJEIRO, fizo unes declaraciones nes qu'acusa al lletráu Xurde Blanco d' "unviar escritos n'asturianu nun intentu d'imponer l'usu desta llingua nel Serviciu". Tales declaraciones llamen l'atención cuanto más, al ser el Direutor Xeneral del Serviciu Xurídicu del principáu el que paez desconocer la llexislación alreor de la llingua tanto nel Estatutu d'Asturies, como na Llei d'usu del Asturianu asina como les distintes llexislaciones tanto del Estáu como de la Xunión Européa.

Espeyar tamién que ye esta Conseyería de Presidencia la más roceana al usu de la llingua poniendo-y torgues a la entrega d'ímpresos n'asturianu a los llicitadores nes contrataciones alministratives sigún obliga la Llei de Contratos de les Alministraciones Públiques. Tamién paez que pretendíen espublizar nel Boletín Oficial col so vieyu nome castiellanizáu, los nomes de llugar de pueblos y conceyos, nun respentando la llegalidá toponímica vixente güei.

¿Cuala ye la zuna que lleva a esta actitú predeterminada y fosca pa col nuesu patrimoniu?. La rempuesta tiénenla la llangreana Ramos y el so Direutor Xeneral de Rellaciones Estitucionales y del Serviciu Xurídicu, el gallegu Cabaleiro Teijeiro.

Fuelga xeneral pal xueves 22 nos estitutos d'Asturies

Mozos ya moces de los estitutos de toa Asturies tan llamaos a facer fuelga xeneral el xueves 22 de marzu POL DRECHU A ESTUDIAR N'ASTURIANU y escontra les medíes de la Conseyería d'Educación pa torgar esti drechu. La convocatoria ta entamada pola Xunta Moza col sofitu de Coleutivos de Mocedaes Comunistes (CMC), Mocedá d'Andecha Astur (MAA), Mocedá d'Izquierda Asturiana (MIAS), Xuventú Asturianista y Conceyu Universitariu pol Asturianu (CUPA). A les 12.00 del miudía fadrán una concentración delantre la sé de la conseyería na Plaza España d'Uviéu.

Enllaz: exunta.org

El Gobiernu d'Asturies ordena el pieslle d'un mediu de comunicación.

El viceconseyeru d'Alministraciónes Públiques, Luis Iturrioz (PSOE) unvió una carta al Direutor Xeneral de Retevisión, (sociedá concexonaria encargada de la emisión de les siñales televisives), na que ordena la sospensión de la siñal d'emisión de Teleasturias, cadena de televisión que nun consiguíó una frecuencia nel caberu consursu de llicencies de Televisión Dixital Terrestre (TDT).

Teleasturias sostién que la Llei de TDT permite a les emisores siguir seis meses más n'antena dende la resolución del concursu. el cualu otorgó el pasáu mes de xineru la única llicencia d'emisión d'ambetu autonómicu a la Productora Asturiana de Televisión, S.A. empresa venceyada col grupu de comunicación PRISA.

Ye xeneral la opinión qu'esti pieslle ye prematuru ya illegal polo que Teleasturias presentará querella criminal escontra el Presidente d'Asturies Vicente Alvarez Areces, el Conseyeru y el Viceconseyeru d'Alministraciones Públiques. Amás fan un llamáu a concentrase na Plaza La Escandalera d'Uviéu pa güei vienres a les 13.00 hores. Tamién paez que va haber concentraciones delantre les cases conceyu de toa Asturies.

Nun ye la primer vegada que dende un Gobiernu d'Asturies se tomen midies polítiques escontra medios de comunicación; nel añu 2001 un gobiernu socialista presidíu tamién per Vicente Alvarez Areces, retirába-y a Radio Sele, emisora en llingua asturiana, una llicencia d'emisión comercial llegalmente otorgada per un gobiernu anterior presidíu per Sergio Marqués. Daquella Radio Sele llevó el casu a los tribunales, que fallaron al so favor y a la restitución de la llicencia. La sentencia entagüei ta incumplida per parti'l gobiernu.

Nel casu de Teleasturias, ésta encuéntrase nuna situación "allegal" y nun sedría lo mesmo, lo que se dirime ye si esti "apagón" repentín, ensín dexar pasar los seis meses que marca la Llei de la Televisión Dixital Terrestre, nun se deberá a que Teleasturias ye un mediu críticu col gobiernu y a que les elleciones autonómiques y a conceyos son d'equi a tres meses y la so influencia fora dañible pal presidente y el so partíu.

Nun ye l'unicu problema, tamién tan les repercusiones del xuiciu de Morala y Carnero (CSI) que criminaliza les movilizaciones de la naval y per estenxón toos los conflictos llaborales, les denuncies escontra sindicalistes del SUATEA "per romper un cordón policial", cargues policiales descomanaes escontra los trabayaores de la sanidá, les denuncies y detenciones de contino escontra militantes o manifestantes asturianistes, l'intentu d'esborrar la llingua asturiana de los colexos, estitutos y hasta de la cái, les denuncies per "poner pegarates enes faroles de Llangréu", per pidir la oficialidá de la llingua, per manifestase.... "per insultar a l'autoridá"...

Y a too esto, na canal autonómica de televisión (TPA), nun se fala más que de xornaes gastronómiques, fiestes, "turistes que mos visiten" y demás caxigalines, o seya... EL PAIS FELIZ (El Presidente Areces y la Conseyera de Cultura Ana Migoya tienen vezu referise a Asturies como'l "Parque Temáticu").


Nun sé... "Estáu de sitiu". Película de Costa Gavras.