31/5/07

Si fore preciso desplicase


Porque siento que me pisa la memoria

nesti día de mayu esperanzáu,

que voi perder les llaves del to sueñu

y el cantar de los branos y el to nome,

porque mudes van quedar les lletres y la eiría,

porque naide ha guardate del exiliu

nin cantará por ti

les roses de les coses que quiximos.

Porque supi’l nacer que yera’l fin,

qu’un círculu metálicu t’ataba,

porque mal escondíes lo cansao,

namás por eso te viví;

p’apartar de nosotros la mentira,

pa volver otra vez y emocioname,

pa guardate, escribir del to cuerpu

los rasgos de los meses que me dieras.


Nórdica. Lurdes Alvarez.

19/5/07

El Conseyeru d'Educación inventa datos escontra l'asturianu. Trola, trola, trola...



El conseyeru d'Educación del Principáu, el socialista Jose Luis Iglesias Riopedre (Vigo, Galicia 1939) dio una rueda de prensa güei sábadu n'Aviles na que-y ñegó drechos al asturianu pa ser "asignatura obligatoria", porque
"nosotros sabemos que el 85% de los padres y madres de alumnos no están de acuerdo con que sea enseñanza obligatoria".

El datu ye dafechamente inventáu, nun esiste más que na mente calenturienta de los socialistes que nesta campaña eleitoral ya ta a puntu d'amburar y quedar fecha cerella. Si esi datu fora minimamente ciertu, tanto Areces como Migoya, Lastra, Javier Fernández y el propiu Iglesias Riopedre llevaríinlu tatuáu na pelleya.

Empobinámoslos a que nel mitín de mañana domingu se descamisen y digan de qu'estudiu surdió tan científica babayada; n'otru casu vamos pensar que tan apoderándolos los ñervios y contar troles, siñores, en puertes d'eleiciones ye letal.

12/5/07

Autonómiques 2007: UNIDÁ



Iguamos una coalición electoral col envís de defender la identidá asturiana, el nuesu territoriu, el derechu a decidir el nuesu futuru como país y un modelu social, económicu y ecolóxicu verdaderamente afitáu na xusticia social, la defensa de los servicios públicos, la democracia participativa y les polítiques sustentables. Con esta UNIDÁ ufiertámos-y al pueblu asturianu en mayu de 2007 una alternativa electoral que busca tornar les polítiques que condenen a la nuesa mocedá a la emigración, desanicien el nuesu patrinomiu natural y cultural y reducen la calidá democrática de la nuesa sociedá.

  • UNIDÁ pa, ensin renunciar al nuesu programa de máximos, consiguir un estatutu que reconoza’l nuesu estatus como nación, el derechu a decidir el nuesu futuru, la oficialidá de la llingua asturiana y que nos iguale col restu d’estatutos con calter nacional del estáu.
  • UNIDÁ pa evitar que la mocedá asturiano se vea obligao a emigrar pa poder trabayar y pa crear les condiciones, a través de midíes llegales específiques, pa que los que tán fuera d’Asturies puedan volver al so país.
  • UNIDÁ p’algamar un xiru a les polítiques continuistes y oficializar y normalizar socialmente la llingua asturiana utilizándola de forma prioritaria na alministració n y nos medios de comunicación públicos. Potenciación y defensa de la fala del Navia-Eo frente a los intentos espansionistes.
  • UNIDÁ pa denunciar y tornar les polítiques represives y la criminalización de cualquier disidencia que cuestione el pensamiento únicu que se ta imponiendo n’Asturies dende’l gobiernu de la llamada Izquierda Plural.
  • UNIDÁ pa exercer un control real sobre la ordenación del territoriu nel marcu d’una economía productiva, planificada, autosuficiente y non especulativa. Defensa de la costa asturiana frente a la especulación y el procesu de marbellización. Paralización de la construcción de nuevos campos de Golf.
  • UNIDÁ pa defender el Mediu ambiente asturianu cola paralización dafechu de les llinies d’alta tensión en construcción, los ciclos combinaos y los proyectos de banzaos. Política enerxética ensin concesiones basada nun modelu medioambiental con criterios sustentables y centráu nes necesidaes d’Asturies.
  • UNIDÁ pa garantizar una asistencia sanitaria universal, gratuita y de calidá. Inclusión na rede pública de los hospitales de Xove y Les Arriondes. Revisión del criteriu de financiación atendiendo a les particularidaes xeográfiques asturianes.
  • UNIDÁ pa qu’Asturies cunte con un modelu de financiación que reconoza les característiques específiques de la nuesa población. Axencia tributaria propia. Recursos que permitan a les entidaes locales autonomía financiera.
  • UNIDÁ p’apostar pola intermodalidá de tresportes y comunicaciones. Apueste pol ferrocarril como mediu de tresporte públicu de futuru frente a la so privatización. Cambéu del trazáu occidental de l’autovía del cantábricu y esixencia de rescate de la concesión de l’autopista del Güerna. Trespasu a Asturies de la xestión del aeropuerto de Ranón.
  • UNIDÁ pa institucionalizar los procesos de democracia participativa, tanto a nivel local como nacional, dando-y voz y votu a la ciudadanía nes decisiones que-y afecten, impidiendo la impunidá y el despotismu de dellos xestores.
  • UNIDÁ pa diseñar una política de promoción y desarrollu de la industria cultural asturiana. Creación d’un Archivu Nacional Asturianu tres la devolución de los documentos incautaos y estremaos ente distintos museos.
  • UNIDÁ pa construir una escuela pública asturiana y laica con recursos. Eliminación progresiva de los conciertos. Regularización de la situación de los mayestros y mayestres d’asturianu.
  • UNIDÁ pa eliminar la precariedá y la inseguridá nel trabayu y persiguir los abusos llaborales. Priorización del fomentu de la economía productiva, social y solidaria, frente al modelu especulativu, faraónicu y clientelar actual. Impulsu al I+D+i y llucha contra la deslocalización y el dumping social. Reforma fiscal que grave les rentes más altes y penalice los beneficios fiscales especuladores.
  • UNIDÁ pa esixir una nueva ética política pa los cargos públicos cola persecución del favoritismu y l’amiguismu y la tolerancia social a la corrupción. Declaración obligatoria del patrimoniu de tolos cargos políticos.
  • UNIDÁ pa que los medios de comunicación públicos tean al serviciu de la sociedá, y non del gobiernu. Información que nun sirva de intereses particulares a la que se pueda acceder, distribuir, crear y llibremente.
  • UNIDÁ pa potenciar una nueva cultura de consumu basada na sostenibilidá . Potenciación de la cultura del reciclax y la educación pal consumu.
  • UNIDÁ p’apoyar la creación, les artes y la cultura n’Asturies dende la independencia creativa y la potenciación de los y les artistes moces.
  • UNIDÁ p’asegurar el derechu universal a la vivienda dende una concepción sostenible, priorizando la rehabilitación y l’alquiler. Penalización de los pisos vacios. Axencia de venta y alquiler de vivienda de calter públicu.
  • UNIDÁ pa revitalizar del campu asturianu como un apueste de cohesión territorial. Prohibición de les artes de pesca dañibles. Ayudes complementaries pa los modelos d’esplotación agrarios y ganaderos autóctonos asturianos y la l’agricultura y la ganadería ecolóxiques.
  • UNIDÁ p’algamar la plena igualdá de la muyer. Igualdá salarial ente homes y muyeres. Apueste pola coeducación nel ámbitu formativu y persecución de la violencia de xéneru.
  • UNIDÁ pa concretar un marcu normativu eficaz pa la plena integración de les persones con discapacidaes físiques o psíquiques. Planificación xerontolóxica que faiga digna la vida a la xente vieyo.
  • UNIDÁ p’asegurar la educación na igualdá y la non discriminación por opción sexual.
  • UNIDÁ p’algamar una Renta mínima moza. Eliminación de les práctiques abusives na contratación de la mocedá y les práctiques non remuneraes. Política de drogues non basada nel prohibicionismu y política de sexualidá basada na información y el respetu. Política de vivienda específica pa la mocedá.
  • UNIDÁ pa defender al pequeñu comerciu énte les grandes superficies. Midíes de dinamización y modernización del comerciu de proximidá.
  • UNIDÁ pa consiguir la integración de los inmigrantes, col reconocimientu de los sos derechos llaborales y ciudadanos.

UNIDÁ asume’l compromisu coles reivindicaciones de los ecoloxistes, expresaes nel documentu acabante facer públicu poles organizaciones ecoloxistes asturianes.

Autonómiques 2007: IZQUIERDA XUNIDA-BLOQUE POR ASTURIES - LOS VERDES




ESTATUTU PA TOOS DENDE LA IZQUIERDA


-Oficialidá del asturianu
-Drechos Sociales
-Reconocimientu como drechos suxetivos: salú, educación (tamién la superior), prestaciones sociales básiques y accesu a la vivienda
-Másimu nivel competencial

REXENERACIÓN DEMOCRÁTICA:

-Llei Electoral, circunscripción única
-Llimitación al 0,1% los gastos de publicidá institucional

ALMINISTRACIÓN PÚBLICA:

-Llei de Función Pública
-Reduición de la temporalidá

XUSTICIA:

-Plan de modernización.
-Eleición del abogáu del turnu d´oficiu

SEGURIDÁ PÚBLICA:

-Policía Autonómica
LLINGUA, CULTURA Y COMUNICACIÓN:

-Plan de normalización llingüística del asturianu.
-Eleición pol Parlamentu del Direutor del Ente Públicu de Comunicación.
-Llimitación de los gastos de la RTPA al 0,5% del Presupuestu
-Incremento de la pluralidá informativa con nueves llicencies d´TDT

RELACIONES ESTERIORES:

-Llei d´Asturianía
-Incrementu al 1% de la cooperación al desarrollu

MUNICIPALISMU:

-Llei de Réximen Llocal d´Asturies

DESARROLLU ECONÓMICU:

-Creación por Llei del Foru pola Industria
-Plan de Emplegu de la Mocedá pa recuperar les lliendes urbanes
-Puxu y sofitu a los autónomos

SOCIEDÁ DE LA INFORMACIÓN:

-Software llibre

INFRAESTRUCTURES:

-Pauto ente Asturies y l´Estáu pal cumplimientu estrictu nos plazos de les infraestructures pendientes

PROTEICIÓN DEL MEDIU AMBIENTE:

-Conseyería del Mediu Ambiente
-Nueva política de xestión del agua (que se trespasará a Asturies) y de los residuos. NON BANZÁU DE CALIAO, NON A LA INCINERACIÓN

ORDENACIÓN DEL TERRITORIU Y URBANISMU:

-Decálogu pal control urbanísticu y la proteición de la costa
-Creación de Institutu pal desarrollu urbanísticu sostenible que sustituirá a la CUOTA

DESARROLLU RURAL:

-Llei de Desarrollu Rural
-Incrementu del Plan estratéxicu de producción ecolóxica

EDUCACIÓN:

-Apueste pola Escuela Pública, laica y de calidá
-Compromisu por una escuela integraora. Más recursos humanos pa facilitar la integración
Más escueles infantiles de 0 a 3 años. Integración na rede pública del Principáu d´Asturies.

SANIDÁ:

-Modificación del MAPA sanitariu asturianu pa la meyora de la so xestión
-Integración d´Arriondes y Xove nel SESPA como centru de titularidá pública
-Creación del Centru de Investigación Biosanitariu n´Uviéu, como centru de referencia

POLÍTIQUES SOCIALES:

-Duplicación, col pasu la llexislatura, de los recursos públicos destinaos a políticas sociales y de bientar
Incrementu de les rentes garantizaes pol Salariu Social
-Creación d´un Organismu Autónomu xestor de los Centros Sociales Especializaos
-Plan Integral d´Inmigración

VIVIENDA:

-Reconocimientu como drechu suxetivu. Llei Asturiana de Vivienda
-Nueva llínia d´ayudes pa les hipoteques
-Promoción de 16.000 nueves viviendes con dalgún tipu de proteición

IMPULSAREMOS UN NUEVU MODELU DE FINANCIACIÓN P`ASTURIES

FISCALIDÁ:

-Aumento de la progresividá nel tramu autonómico del IRPF
-Creación de nuevos impuestos que graven a los que más tienen
-Una Fiscalidad más social:
Impuestu sobre vivienda desocupada
Impuestu sobre depósitos de les entidaes de créditu
Impuestu sobre solares ensin edificar
Incremento del impuestu de los grandes establecimientos comerciales

8/5/07

Discursu d'Ana Cano, Presidenta de la Academia de la Llingua nel actu del Día de les Lletres.



Ilustrísimes autoridaes, ilustrísimos académicos y académiques, asturianos y asturianes, amigos toos:
Al entamar, otra vuelta, el discursu institucional del Día de les Lletres Asturianes, quiero apurrivos, de mano, el mio agradecimientu más fondu a tolos que nun día tan señaláu vos xuntáis a nós, y acudís, como venís faciendo añu tres añu, al llamáu de l’Academia pa participar nesta Xunta estraordinaria y simbólica que ye, sobre too, un actu de reconocencia a la escritura n’asturianu, pero tamién un día de vindicación llingüística; día que mos val, al empar, pa sentir el vuesu aliendu, pa sentir que l’Academia nun vive de llau a la realidá social, sinón que cunta col sofitu de tantos y tantes ciudadanos y ciudadanes d’Asturies. Munches gracies por tar equí y polo qu’ello significa.
Y gracies, tamién y dende llueu, a les autoridaes y a los representantes de les organizaciones de toa mena que güei mos acompañen y qu’amuesen bien a les clares que la llingua ye de tolos asturianos al marxe de les estremaes conceiciones polítiques o ideolóxiques.
2.
Ún de los actos más importantes de la Institución ye, de xuru, el de l’acoyida de los nuevos miembros. L’Academia tuvo siempre claro qu’acoyimientu talu habría corresponder a esta Xunta estraordinaria, la más importante de toles que facemos a lo llargo l’añu; y ello pola sola razón del so calter públicu, porque a ella tais convidaos tolos asturianos y asturianes como una seña más del rispir académicu por rindir cuentes del so facer y espeyar el so venceyamientu a la sociedá onde alita y a la que se debe.
Esti añu la persona escoyida ye Dª. Marta Mori d’Arriba, doctora en Filoloxía Española pela Universidá d’Uviéu, hasta agora miembru correspondiente de la institución onde nesti día s’inxer como miembru de númberu. Marta Mori ye persona de sobra conocida de toos nós. A los sos méritos docentes como Profesora de Filoloxía Asturiana xune un llabor investigador bultable na estaya de la crítica y la historia lliteraria, asina como na de la didáutica de la llingua y la lliteratura asturiana. A la primera d’estes estayes, la de la investigación lliteraria, correspuenden artículos como «El tema de la naturaleza na poesía asturiana (ss. XVII-XIX)», «El cuentu asturianu del Surdimientu», «La poesía asturiana nel so rodiu social», «L’exiliu interior: el sentimientu de la tierra na poesía asturiana contemporánea» o’l capítulu de la Historia de la Lliteratura Asturiana de l’Academia sobro «El sieglu XVIII». Na segunda, la de la didáutica, inxértense trabayos, roblaos dacuando en xunto con otros autores, como Interculturalidad y diversidad lingüística: estudio de las actitudes lingüísticas en Asturias y sus implicaciones didácticas, «Tratamientu metodolóxicu de la Llingua oral na Enseñanza Secundaria» o’l llibru Xeres y xuegos de llingua oral (pa Educación Secundaria y Bachilleratu) que vien d’espublizar nesti mesmu añu del 2007.
Marta Mori ye, amás de too ello, poeta, reconocida col premiu «Teodoro Cuesta» de poesía nos años 2002 y 2004; autora, amás de numberoses collaboraciones en periódicos, revistes y antoloxíes coleutives, de dos llibros: Pórticu (2003) y El tiempu de la espera (2005). Nún de los poemes del primeru d’ellos Marta úfrenos una visión íntima del nuesu país, enllena de señaldá, tristura y desesperu:
DEL país onde yo vivo,
nun fala naide.
Naide s’ocupa
del pasu sele
que marquen sobre él les estaciones,
nin de cómo l’iviernu
aporta de sutrucu
y s’espurre cásique hasta xunu,
húmedu y cruel.
Naide nun toma cuenta d’esto.
[…]
Naide pa cuntar
el crecimientu ansiosu de les sebes,
l’esbarrumbe esmeralda de les fontes,
l’esnalar sele
y ausente
de la muerte
penriba d’unes cases
de les que naide nunca dixo nada,
y apenes queda nada pa dicir.
Y Marta trabaya coles ferramientes que meyor conoz pa qu’esti país sí tenga la so propia voz y un llugar nel futuru. Toi convencida de qu’asina lo siguirá faciendo y de que’l so llabor engabitará la xera académica con procuru y llealtá. Munches gracies, Marta, pol to exemplu y pol to llabor.
3.
Pero si l’acoyida de Marta Mori ye un motivu pal contentu y la gayola, que mos pue facer albidrar una esperanza pal futuru, otros fechos asocedíos nel añu que güei zarramos, somorguiáronmos na más fonda tristura. La nueche máxica de San Xuan del 2006, al riscar l’alba, Ígor Medio y Carlos Redondo, integrantes de Felpeyu y dos persones bien significatives de la música folk asturiana, colaron pa siempres. Aprucen a nós, con fuercia, los sones y lletres de la so actuación nesti mesmu escenariu’l Día de les Lletres Asturianes de 2003. Y siguirán apruciendo y tando presentes cuantos díes de les lletres festexemos. La so muerte ye una gran perda, dende llueu, pa la música, pero tamién pa la cultura y la llingua d’Asturies.
Y como si ello nun abastare, entá tenemos que llamentar la perda va unos meses, tamién nun accidente aciar, d’otra persona bien querida. Toi refiriéndome a Pablo González, un bon trabayador pola llingua, la cultura y l’asturianidá de la fastera más occidental d’Asturies, la d’Entrambasauguas. Que los versos eonaviegos valgan d’alcordanza y reconocencia a toos ellos:
DESPÓS de peneirar as mías palabras
pra estremar as que sanan das que dolen,
as que quedan nel aire sei que poden
ser semente na terra que llabras.
Despós de secudir a pluma al vento
d’esta llingua sin voz peró con eco,
achégase el sou son sin embelleco
a os tous ouguidos pra que señan cento,
pra que señan miles y se volvan faros,
y roden y beilen al chisgar el oyo
teñindo en clarén noites avesías.
El so trabayu frutiará, de xuru, na tierra que llabraron con tantu ciñu.
4.
Como davezu, el númberu de Lletres Asturianes qu’asoleyamos con motivu d’esti día ta dedicáu monográficamente a la creación lliteraria. Los sos testos amuesen el perbón momentu nel que s’afaya la lliteratura de nueso, y ello magar les dificultaes que lleva apareyao’l ser espresión artística d’una llingua minorizada, lo que la fai entá más valoratible. Los escritores han ser conscientes del papel que xueguen na normalización social, na normativización llingüística y na identificación de los falantes cola propia llingua. Darréu d’ello, han enfotase en manexar dueitamente y con gran procuru l’idioma, de mou y manera que’l resultáu seya impecable, llingüísticamente, y de gran altor, dende la perspeutiva lliteraria. Namái asina algamará la condición artística que precisa pa dar prestixu a la llingua encontiando’l so futuru y ser, amás d’ún de los sos meyores validores, l’espeyu u toos mos podamos mirar con arguyu.
Xunto a la lliteratura, cada vegada más enraigonada na sociedá asturiana como nun podría ser otramiente, hai otru elementu perimportante de la cultura, de gran proyeición social y, arriendes d’ello, clave asina mesmo nel procesu de vindicación y dignificación del idioma ástur: la música. La música asturiana vive un momentu rellumante. Y aprovecho la ocasión que m’ufre la celebración d’esta Xunta estraordinaria, p’anunciavos que voi proponer a l’Academia que con motivu del XXIX Día de les Lletres Asturianes, el del 2008, la institución faiga una reconocencia espresa y pública a los creadores musicales qu’empleguen como ferramienta de trabayu la llingua asturiana. Ellos amerítenlo, dende llueu, pol valir del so llabor, pero tamién porque la so música ye un elementu dinamizador de primer orde de la llingua na sociedá, en cuantes que mediu de comunicación modernu y atractivu; darréu que contribúi al so espardimientu, a que los asturianos y asturianes mos identifiquemos con ella, deprendamos a sentila y a valorala, como daqué cada vegada más y más dafechamente nueso; y porque, en definitiva, contribúi a que seya vidable la so supervivencia nesta Asturies del sieglu XXI.
5.
Ensin dulda ye esti un momentu afayadizu pal balance añal del trabayu desendolcáu pola Academia. Y prestaríame facelo adulces, pero, por nun cansar, porque se sal de lo qu’ha ser un discursu como ésti, y porque en realidá esi llabor yá foi faciéndose públicu al dir produciéndose –ehí tán los actos entamaos, les estremaes publicaciones de la institución, les anuncies, les ruedes de prensa, etc.–, nun voi referime más qu’a delles cuestiones mui puntuales que me paez puen tener mayor interés.
Nesti sen, y dientro de la xera normativa, hai que destacar los númberos 3 y 4 de la coleición «Cartafueyos Normativos» que s’espublizaron esti añu. El primeru d’ellos, dedicáu a La llingua asturiana na Alministración, ufre toa una riestra de modelos d’impresos y documentos d’estremáu calter col envís de dar un pasu más nel llogru d’una llingua alministrativa y xurídica amañosa; col segundu, apelláu Abreviatures, rotulaciones y propuestes d’espresión y llocución, quiximos afitar los usos llingüísticos asturianos n’espacios públicos, alministrativos y cotidianos arreyaos a estayes comunicatives concretes y poco trabayaes hasta agora como son les rotulaciones n’ámbitos públicos, les propuestes d’abreviatures, sigles y símbolos o propuestes d’espresión y llocución.
Otros númberos tán yá enforma avanzaos. Ente ellos, el dedicáu a la terminoloxía d’Internet en llingua asturiana que s’igua en collaboración col Colexu d’Inxenieros n’Informática del Principáu d’Asturies (COIIPA). Con esti y otros cartafueyos previstos sobre terminoloxía científica dirán anovándose, pasu ente pasu, les estremaes estayes del léxicu asturianu, enanchando les posibilidaes espresives y comunicatives del idioma en tolos rexistros y ámbitos, como correspuende a una llingua moderna y culta.
Nun pueo dexar de facer una referencia, curtia a la fuercia, al asoleyamientu del Informe sobre la fala o gallego-asturianu. Una perspeutiva hestórica, social y llingüística, col que l’Academia quier dexar llantada adréi la so posición no que cinca a la realidá llingüística, histórica y social de los conceyos eonaviegos y, darréu d’ello, a la so asturianidá incuestionable.
N’otru orde de coses, ye bien prestoso comunicavos que ta peravanzada la organización del II Conceyu Internacional de Lliteratura Asturiana, que se fairá nel próximu mes de payares, dientro de les Xornaes d’Estudiu qu’añalmente entama l’Academia. Empobináu por Miguel Ramos Corrada, esti II Conceyu surde col enfotu non solo de facer un repasu al desendolcu de la nuesa lliteratura a lo llargo d’esti sexeniu, sinón tamién d’afondar nel conocimientu de les rellaciones ente la música, el folclor y la creación lliteraria y d’espeyar cómo foi la receición de les obres de los nuesos principales autores nes dómines que van dende’l sieglu XVII hasta estos díes. Pa intervenir nes tres estayes mentaes, cuntamos yá con prestixosos investigadores tanto asturianos como españoles ya internacionales. Les actividaes del Conceyu veránse complementaes con actuaciones musicales y la presentación de la so obra polos autores más mozos del nuesu panorama lliterariu. Yo, dende equí y dende agora, convídovos a toos y toes a que vos enxertéis nél, caún y caúna acordies coles sos propies posibilidaes, pa qu’ente toos llogremos que’l II Conceyu Internacional de Lliteratura Asturiana seya tan granible como lo foi’l primeru, celebráu nel 2001.
Asina mesmo, l’Academia sigue alantre cola organización del Conceyu Internacional del 2008, del que yá diemos anuncia’l Día de les Lletres de 2006, y que baxo’l títulu xeneral de «La llingua asturiana, más de mil años nel país de los ástures» cincará, con una metodoloxía científica anovada ya interdisciplinar, estremaos aspeutos históricos y documentales, inxiriendo dalgunos inéditos, de la llingua asturiana y de la propia Asturies.
6.
Pero’l llabor de la Institución trespasa los finxos del trabayu más académicu. L’Academia ha de cumplir col mandáu estatutariu de curiar los derechos llingüísticos de los asturianos. Y ye equí onde la fienda ye más fonda ente lo que son, per un llau, los derechos llingüísticos individuales y, per otru, la so reconocencia y garantía; ente la normativización y anovamientu llingüísticos y les posibilidaes reales y llegales d’emplegu; ente la normativización llingüística y la normalización social efeutiva; ente’l presente y el futuru que queremos pa la llingua y el presente y futuru que mos ufierta l’Alministración y la so política llingüística; ente lo que diz la llexislación n’usu y la so puesta en práutica; ente lo qu’hai que facer y dicen que faen y lo qu’en realidá tán faciendo.
L’Academia llamenta fondamente tener qu’emplegar una bona parte de les sos fuercies en denunciar, una y otra vuelta, fechos tan doliosos como los que se produxeron nos últimos meses, que toos tenemos tan presentes y que cinquen mesmamente al drechu al usu llingüísticu. Pero equí l’Academia tampoco nun ta sola. Asturies cunta con organizaciones que trabayen nel mesmu sen. Cuido que nun actu como esti nun podemos dexar de reconocer y agradecer esti llabor, reconocencia y gratitú que podemos esplicitar en dos d’elles, que mui bien puen representar al conxuntu de los ciudadanos y ciudadanes d’Asturies. Falo del Conceyu Abiertu pola Oficialidá (CAO) y de la Plataforma Cultural Eo-naviega. Al Conceyu Abiertu pola Oficialidá, qu’inxer cásique 200 organizaciones culturales, polítiques y sindicales, por tol trabayu desendolcáu a favor de la oficialidá de la llingua y pola rempuesta social algamada. A la Plataforma Cultural Eo-naviega, qu’axunta un bon númberu d’asociaciones del occidente ástur, pol so llabor de xuntura cola cultura xeneral d’Asturies y pol so inequívocu asitiamientu asturianu énte los intentos de dalgunos por xebrar la cultura de los conceyos eonaviegos de la del restu de los conceyos asturianos.
7.
Tamos nun mes d’eleiciones autonómiques y municipales. L’Academia de la Llingua Asturiana nun va tomar posición política. Enxamás la tomó y nun va facelo agora; pero sí ye consciente de la so responsabilidá. Y la so responsabilidá ye, nesti sen, curiar los derechos llingüísticos de los asturianos tal como fixen los sos estatutos. Y xustamente pa facer vidable esta responsabilidá y siendo conscientes de que l’asturianu enxamás corrió tantu peligru de desapaición como nesti momentu históricu (como afiten los informes de Llera Ramo o de la UNESCO y confirma la perda de tresmisión interxeneracional, por exemplu), l’Academia pidió xuntase con toles opciones polítiques que se presenten n’Asturies a les eleiciones del 27 de mayu. Y toes elles s’aconceyaron con esta presidencia, entamando poles que nun tán agora presentes na Xunta Xeneral, pero tienen el llexítimu enfotu en participar na vida social y parllamentaria d’Asturies, y siguiendo poles fuerces parllamentaries. No que cinca a éstes, los aconceyamientos fueron al máximu altor. Asina, con Jesús Iglesias, coordinador d’Izquierda Xunida d’Asturies; con Ovidio Sánchez, presidente del PP; y con Javier Fernández, secretariu xeneral de la FSA-PSOE.
Y a toos se-yos dixo lo mesmo: que la próxima llexislatura va a ser decisiva pa les posibilidaes de sobrevivencia de la llingua n’Asturies y que, darréu d’ello, habríen esmolecese por allugar nos sos programes eleutorales la llingua y la cultura d’Asturies cola mayor dignidá; y que fueren conscientes de la so responsabilidá hestórica nesti momentu en que de toes toes se xuega’l futuru de la llingua de los asturianos. Tamién se-yos encamentó que, llueu de les eleiciones y con motivu de la igua del Estatutu d’Autonomía d’Asturies, s’apautaren pa da-y al asturianu l’estatus xurídico-oficial necesariu pa encontar dafechu la normalización efeutiva del idioma, porque la oficialidá ye la única garantía real de sobrevivencia del asturianu. Mirái, ye verdá que pue haber xente que camiente daveres qu’ensin oficialidá la llingua pue caltenese y normalizase, pero ello llamentablemente nun ye posible como vimos y pervimos a lo llargo d’estos años. Y pa decatase, basten y sobren dellos exemplos de los de más recién:
•Agora mesmo, nun hai garantíes pa los ciudadanos que quieran empobinase a l’alministración n’asturianu y, lo que ye peor, nun hai nin calces alministrativos nin campañes institucionales pa qu’ello seya posible.
•Nun hai garantíes dafechu pal exerciciu del derechu a recibir enseñances n’asturianu nin n’Educación Infantil, nin na Educación Secundaria, nin nel Bachilleratu; nin tampoco nun les hai nos centros privaos nin nos centros concertaos. Non, equí nun hai garantíes.
•Nun hai garantíes pal derechu al usu del asturianu dientro del sistema educativu, acordies cola llegalidá vixente. De fechu nun hai nin siquiera exemplos de práutica tala.
•Nun hai una mínima presencia digna del asturianu na radio del Principáu, nin na televisión; non, nun hai nin espacios informativos, nin deportivos, nin magacines, nin documentales,... Namái hai amueses de que sí podría habelos si hubiere una verdadera voluntá de proteición a la llingua.... si la hubiere.
•Nun se ve la presencia del asturianu na vida pública, nin na institucional, nin na parllamentaria, nin na universitaria.
Y ye que col actual marcu xurídicu puen dase, como muncho, polítiques de dignificación del usu de la llingua, pero non de normalización porque una llingua namái ye normal cuando tien valir xurídicu. Y ye, qu’amás, l’asturianu, ensin normalización, muerre y ello ye una desgracia p’Asturies, porque, ente otres coses, ello supón qu’Asturies dexa de ser Asturies y hasta nós mesmos dexamos de ser asturianos.
¿Ú les soluciones? Dende llueu, les soluciones p’Asturies tienen que ser les mesmes que les d’otres comunidaes: nun ye posible que la llingua del Estáu que cuerre’l MÁXIMU peligru de desapaición seya la que tenga la MÍNIMA proteición xurídica. Nós tenemos que facer lo mesmo que faen los valencianos (¿va-y mal a Valencia cola so política cultural?) y los navarros (¿nun ye Navarra una comunidá emerxente dende’l puntu de vista económicu?) y los gallegos (¿nun ta saliendo Galicia d’un atrasu secular?) y los catalanes y los vascos y hasta los araneses que tienen la so pequeña llingua, falada por unos pocos miles de ciudadanos (3.814), oficializada dafechu.
Porque la llingua, toles llingües del mundu, nun son namái medios de comunicación (si ello fore asina toos falaríamos inglés) y el so usu nun ye solo un derechu democráticu que la Declaración Universal de Derechos Humanos pon en primer llugar, sinón que ye un instrumentu de xuntura social, d’autoarguyu, de dinamización y de conciencia solidaria. Y Asturies necesita xuntura, autoarguyu y calces de dinamización y solidaridá si quier tener proyeición de futuru.
Nesti procesu hacia la oficialidá l’Academia de la Llingua Asturiana siéntese necesaria y sabrá moderar y axuntar voluntaes. Por eso espardió va yá dos años la «Propuesta d’Alcuerdu Social y Políticu pa la Llingua y la Cultura d’Asturies», de la que se dio anuncia pública nun actu como ésti del añu 2005, y que treslladó llueu a tolos axentes sociales. Pa nós la propuesta sigue siendo valoratible. Inda más, faise agora más necesaria que nunca. Y ello porque plantega les tres entrugues fundamentales pal procesu:
- ¿Qué clas d’oficialidá queremos?
- ¿Qué recursos económicos queremos emplegar pa facela vidable?
- ¿Qué fases queremos poner en práutica nel so desarrollu?
L’Academia, como institución llingüística cimera del Principáu, tien que llevar alantre’l so llabor científicu, ye dicir, tien que normativizar; y tien que llevar alantre’l so llabor tutelar, esto ye, tien qu’esixir, pero tamién y necesariamente tien que ser optimista y treslladar esi optimismu a la sociedá. Sabemos qu’agora mesmo la sociedá asturiana ta madura pa la oficialidá y que la sensibilidá de les estremaes fuerces polítiques ta camudando pa bien de la llingua. Asina se mos dixo nes conversaciones calteníes con elles y asina vos lo tenemos que cuntar.
Nós, dende llueu, aguardamos que na próxima llexislatura la recuperación llingüística n’Asturies y la normalización social de la llingua s’algame dafechu pente medies d’una oficialidá efeutiva y axustada a les nueses necesidaes. Trabayaremos ensin descansu p’algamala. Podéis tener seguranza d’ello.
Y pa poner puntu a esta Xunta estraordinaria, dexáime que tome emprestaos, otra vuelta, los versos de la nueva académica:
ACABÓSE’L tiempu de la sema.
Lloñe queden Nueva York,
les altes torres del deséu,
les murueques del suañu del Coliséu.
enceses de branu y de povisa,
los desiertos de sal,
los afanes
y los encantamientos.
Pasó’l vértigu,
pasaron les promeses.
Agora ye otru tiempu nuevu:
ye’l tiempu del lleldu y de la espera.
Tiempu pa posar
la mirada nos riegos
escucando los biltos.
Tiempu d’arroxar,
de sentar cabo’l fueu
a ver cocer el pan.
Ye un tiempu pa la escucha y l’escaezu.
Acabóse’l tiempu de la espera.
¡Puxa Asturies!


ANA Mª Cano González
Teatru Campoamor d'Uviéu
Vienres 4 de mayu del 2007.

4/5/07

L'Academia celebra güei el Dia de les Lletres



L'Academia de la Llingua Asturiana da anuncia de qu'esti añu l'actu oficial del DÍA DE LES LLETRES ASTURIANES celebraráse'l día 4 de mayu, vienres, a les 20 hores, retomando al Teatru Campoamor como llar históricu de la so celebración.

Na mentada sesión académica tomará posesión como nuevu Miembru de Númberu de l'Academia la Dra. Marta Mori d'Arriba. L'Academia de la Llingua Asturiana quier, d'esti mou, reconocer la fondura de la so contribución científica, lliteraria y docente al procesu de recuperación llingüística n'Asturies y facer posible, al empar, qu'esa valible contribución pueda enanchase col so trabayu dientro de la propia institución.

Abrirá l'actu l'entamu musical de la gaitera Andrea Fernández Joglar al que siguirá la Xunta Estraordinaria de l'Academia de la Llingua Asturiana col discursu institucional de la Presidenta. Los sones del grupu folk TEJEDOR pondrán puntu a esti XXVIII DÍA DE LES LLETRES.

L'Academia de la Llingua Asturiana, siguiendo'l facer entamáu n'ediciones pasaes, encamienta a los asistentes que, na midida de les sos posibilidaes, lleven el traxe asturianu como amuesa del so compromisu col resurdir de lo meyor de les solemnes tradiciones del país.

Llueu del actu académicu habrá una espicha, abierta a la participación de tola xente, nel restaurante "La Gruta", con bailles y música asturiana.

L'Academia de la Llingua Asturiana aguarda cuntar cola to asistencia a estos actos de celebración del XXVIII DÍA DE LES LLETRES ASTURIANES y pide la to collaboración pa esparder una convocatoria, tan trescendente nestos momentos, ente tolos asturianos y asturianes que ven na OFICIALIDÁ l'únicu preséu pa garantizar el futuru y la sobrevivencia del nuesu idioma.

Miguel Ramos Corrada fai un repás a los dos años de vixencia del fracasáu Plan pa la Normalización Social del Asturianu



Cuando la Conseyería de Cultura, Comunicación Social y Turismu fizo públicu, como si d´un gran trunfu se tratare, el so Plan para la Normalización Social del Asturiano 2005-2007 , a los qu´entós diximos qu´ési nun yera´l camín afayadizu pa llograr que la pervivencia del asturianu fora vidable y pa facer posible´l respetu de los derechos llingüísticos de los asturianos, acusáronnos d´estremistes, radicales, talibanes y un llargu etcétera; güei, cuando dempués de dos años fina´l plazu que daba´l mentáu Plan y llega la hora d´esaminar la cuenta de resultaos, alcontrámonos, ente otros, colos fechos siguientes:

1.- A D. Faustino Zapico Alvarez niéga-y la Universidá d´Uviéu la tramitación, por dir en llingua asturiana, de la so tesis El discursu de la periferia; proyectos autonomistes n´Asturies (1808-1983) , a pesar de que nos Estatutos de la mesma, nel so artículu 6, recuéyese que l´emplegu de la nuesa llingua nun podrá dar llugar a discriminación nenguna.

Presentáu recursu nel Tribunal Cimeru de Xusticia del Principáu d´Asturies, refúgase´l mesmu col votu particular d´ún de los maxistraos, lo que dexa claro, una vegada más, que´l sofitu llegal que güei tenemos ye insuficiente.

2.- La Conseyería de Presidencia del Principáu niéga-y a D. Xurde Blanco Puente, funcionariu de los sos servicios xurídicos, la tramitación d´un permisu pa ser sometíu a pruebes médiques nel Hospital Central d´Asturies, por tar n´asturianu la so solicitú.

3.- La Conseyería d´Educación del Principáu niégase a tramitar la petición d´una comisión de servicios del profesor D. Xosé Nel Comba Paz por tar n´asturianu, cuando amás esti profesor venía faciendo usu d´esti derechu, reconocíu esplícitamente nel artículu 4 de la Llei d´Usu del Asturianu, dende l´añu 2004, ensin nenguna torga burocrática.

4.- La propuesta de currículu pa la Educación Primaria y pa la Educación Secundaria Obligatoria da´l calter d´optativa a l´asignatura de Llingua asturiana y Lliteratura , polo que los alumnos que quieran cursar asturianu tendrán qu´escoyer ente ella y otres como Llingua estranxera , Cultura clásica , etc., siendo asina que too ello va a la escontra de lo que s´afita nel artículu 10.3 de la Llei d´Usu, onde se diz que la escoyeta del asturianu como asignatura del currículu en nengún casu podrá valir de motivu de discriminación de los alumnos.

Qué enfotu podemos tener, poro, nesi Plan de Normalización del Asturianu del Gobiernu del Sr. Areces, cuando ye esti mesmu Gobiernu´l que sistemáticamente escaez la normativa llegal sobro la nuesa llingua?

Como vemos nestos cuatro exemplos, ye la propia Alministración la qu´incumple, al refugar de mou esplícitu l´exerciciu de los derechos llingüísticos de los asturianos y al discriminar a los que faen usu de la llingua de so.

Si echamos una güeyada a l´axenda del añu 2007 que la Oficina de Política Llingüística del Gobiernu del Principáu repartió per toa Asturies, afayamos nes so primeres páxines el siguiente testu: "N´Asturies esiste una llexislación en materia llingüística, qu´ofrez un marcu xurídicu a la llingua asturiana y al gallego-asturianu. L´Estatutu d´Autonomía del Principáu d´Asturies (1981, reforma de 1999); la Llei d´Usu y Promoción del Asturianu (1998); el Decretu pol que se regula la Xunta Asesora de Toponimia del Principáu d´Asturies (2002); el Decretu pol que s´establez el procedimientu de recuperación y fixación de la toponimia asturiana (2002); el Decretu pol que s´aprueba´l currículu de Llingua Asturiana d´ESO (2004); el Decretu pol que s´aprueba´l currículu de Llingua Asturiana de Bachilleratu (2004); y los diversos decretos qu´oficialicen los topónimos tradicionales d´Asturies (dende´l 2005). Nel añu 2005 la Xunta Xeneral del Principáu aprobó por unanimidá´l Plan de Normalización Social del Asturianu".

Toes estes bones pallabres esfrónense escontra la realidá de los fechos y ye curioso, cuando se dan casos como los descritos, cuando nun se ye quien a encadarmar amañosamente la llingua asturiana dientro del sistema educativu tanto na Educación Primaria como na Secundaria, que dende´l Gobiernu Asturianu s´ande glayando al altu la lleva que la oficialidá nun ye necesaria, que ye abondo col so Plan, porque n´Asturies hai llibertá d´usu llingüísticu acordies cola llei.

Yá l´Academia de la Llingua Asturiana dexó claro naquel febreru de 2005 qu´una llingua nun se pue normalizar si nun tien validez xurídica nin reconocencia oficial, y qu´amás esi Plan yera un plan que rebaxaba conscientemente´l conteníu de la Llei d´Usu del Asturianu, al dexar de llau aspeutos del so articuláu como la conocencia del asturianu polos empleaos públicos, los problemes de la enseñanza, la presencia del asturianu nos medios de comunicación, etc., y que, poro, tratábase más d´un plan de dignificación del asturianu que d´una verdadera normalización social de la nuesa llingua.

Nun podemos escaecer, per otru llau, que nel tarrén llingüísticu´l Gobiernu del Sr. Areces fai oyíos sordos a lo que se vive na cai y recueyen los trabayos sociollingüísticos, como el II Estudiu Sociollingüísticu p´ Asturies, de xunu de 2002, nos que queda claro´l sofitu mayoritariu de la sociedá a la oficialidá de la llingua asturiana (más del 60%). Ocho de cada diez asturianos caltienen que la llingua propia d´Asturies ye l´asturianu, bable o llingua asturiana, y siete de cada diez nun dulden que l´asturianu ye una llingua como les demás llingües rexonales reconocíes oficialmente n´España, polo que piden un tratu igual al que reciben el restu de llingües peninsulares.

Llegó l´añu 2007 y, a la hora de facer una evaluación del mentáu Plan, solo nos queda añadir una idea que non por repetida ye menos actual nin menos cierta, y ella ye que con esti tipu de midíes nun se pue frayar el peligru de desapaición de la llingua asturiana, denunciáu pola UNESCO en 2001, y que solo la reconocencia de la oficialidá nel Estatutu d´Autonomía d´Asturies ye garantía pa plantegar llueu una planificación vidable que lleve a la normalización social del asturianu.

Miguel R. Corrrada ye escritor, miembru de l'Academis de la Llingua Asturiana y Profesor Titular de la Univerdidá d'Uviéu

Enllaz: lva

2/5/07

La Xunta pola Defensa de la Llingua convoca a manifestase'l vienres 4 de mayu, Día de les Lletres



TESTU DE LA CONVOCATORIA:

Nel mes de mayu n’Asturies vamos vivir un procesu electoral. Nél van escoyese los nuesos representantes na Xunta Xeneral y d’ehí va salir el gobiernu asturianu futuru. La llexislatura que vien va ser la de la reforma del Estatutu d’Autonomía asturianu y tien que ser tamién la de la reconocencia estatutaria de la oficialidá.

Anque haya partíos que nun lo incluyan nos sos programes electorales eso nun va esconder la realidá d’una demanda pola que llevamos lluchando demasiaos años: la reconocencia de la igualdá xurídica de tolos asturianos y asturianes falen la llingua que falen.

Nestos meses postreros la realidá ta demostrando, por si daquién tovía nun se diere cuenta, que nun pue haber garantíes xurídiques si la llingua nun ye oficial: un doctorando al que la Universidá nun-y tramita la tesis por pidilo n’asturianu, un profesor al que l’alministración educativa nun-y almite papeles por tar n’asturianu, un funcionariu al que los sos xefes nun-y acepten impresos cubiertos n’asturianu, etc., etc. Dicir a estes altures -como repiten, un día sí y otru tamién, los cabezaleros de la FSA- que la oficialidá supón imposición y qu’a naide se-y quita d’usar l’asturianu, ofiende a la intelixencia de cualquiera. La única imposición ye la que tán sufriendo los que quieren usar con normalidá, en tolos ámbitos de la vida, la llingua de los sos mayores.

Reconocencia de derechos y non imposición: eso supón la oficialidá. Y asina ye en toles comunidaes del Estáu onde tienen otra llingua propia estremada del castellanu. Nun hai otru camín pa recuperar una llingua minorizada que pierde miles de falantes a cada xeneración que pasa: facela oficial pa que la igualdá xurídica y una política clara de normalización social favorezan el so usu.

Por eso venimos lluchando dende va tantos años. Y nun vamos dexar de facelo porque sabemos que tenemos derechu y nun tamos dispuestos a renunciar nin a danos. Sabemos qu’al reivindicar con arguyu’l nuesu idioma maternu y el derechu que tenemos a usalu y a caltenelu vivu, tamos defendiendo un futuru meyor p’Asturies, un futuru con más llibertaes. Sabemos que, a la fin, los partíos asturianos van tener que tar a l’altura de les demandes democrátiques y reconocer por llei, cola oficialidá, los derechos llingüísticos.

Venimos demostrando dende hai munchos años que’l movimientu de reivindicación llingüística n’Asturies ta vivu y que reclama na cai los derechos que l’asturianu merez. El vienres 4 de mayu, a les siete la tarde, n’Uviéu, va ser una bona ocasión pa facenos oyer. Pa que tu te faigas oyer.