Esta tardi, énte la sé de la Xunta Xeneral del Principáu, el Conceyu Abiertu pola Oficialidá fizo pública la propuesta qu'apurrirá a los grupos parllamentarios pa sustituyir na reforma del Estatutu d'Autonomía al artículu 4u. endagora en vigor . El testu recueye la cooficialidá de les llingües castellana y asturiana nel ámbitu del Principáu d'Asturies y del "gallego-asturianu" o fala, nel estremu occidental d'Asturies.
Les llingües cooficiales del Principáu d'Asturies son el castellanu y l'asturianu. El gallego-asturianu tamién ye llingua oficial nel so ámbitu territorial.
Tolos ciudadanos tienen derechu a conoceles y usales. Naide va poder ser discrimináu pola mor de la llingua que llibremente escueya y utilice.
Les Alministraciones públiques han garantizar l'usu normal d'estes llingües, amás de la so promoción, enseñanza y presencia amañosa nos medios de comunicación.
Una llei de la Xunta Xeneral del Principáu tien de determinar los criterios del procesu de normalización llingüística.
Fernando Ornosa, portavoz del Conceyu Abiertu pola Oficialidá, dixo tener constancia que Izquierda Xunida-Bloque por Asturies-Verdes va defender esti modelu propuestu y que nel Partíu Popular van estudiar si son quien a asumilu. Dambos partíos recibieron ya el testu de manes del CAO nun aconceyamientu anterior. El PSOE, que siguen negándose a recibir al CAO, va recibir el testu al traviés del Rexistru de la cámara.
Nesti sen, sigún aprebó nel so Congresu, el PSOE defende la bayura y diversidá llingüística en tol Estáu, la inmersión llingüística como esencial pa la convivencia ente les rexones y les naciones d'España, pero niégase a asumir y defender la llingua propia d'Asturies y el so reconocimientu oficial.
