Xosé Lluis García Arias, profesor de la Universidá de Oviedo y anterior Presidente de l'Academia de la Llingua Asturiana hasta l'añu 2001, declaró ayeri n'Uviéu que tres la campaña d'ataque ensín precedentes escontra l'asturianu atópase'l Principáu y que tien como causa el debate so la reforma del Estatutu d'Autonomía.
"Nun ye casual qu'aparentemente un espontaniu salga a dicir que non al asturianu y que'l Gobiernu del Principáu nun rechiste", dixo de lo asocedío na Xunta de Facultá onde la enmienda d'un individuu echó abaxo los estudios de gráu d'asturianu.
García Arias intentó, ensín ésitu, presentar un escritu n'asturianu al rector de la Universidá que-y foi refugáu nel rexistru de la institución acádemica por nun tar en castellán y nun ser l'asturianu llingua oficial. Un notariu llevantó acta del fechu pa en casu de tomar midíes llegales.
Sigún García Arias tamos nuna situación ónde "los asturianos somos estranxeros nel propiu país".
Vía|Lva
