Nun hai pallabres pa espresar la vergüenza que siento como asturianu al quedar demostrao que la redaición del artículu 4u. que regula l'asturianu nel Estatutu d'Autonomía de 1981 tava basáu en decretos lleis del franquismu convirtiénlos asina en Llei Orgánica.
La vergüenza entá ye más grande al facer comparanza de los decretos col testu que los ponentes del PSOE y del PP pautaron pa la regulación de la llingua d'Asturies nel nuevu testu estatutariu y coles disposiciones agora en vigor:
voluntariedá, númberu d'alumnos, solicitúes de los padres, respetu, amparu, patrimoniu cultural...
Tanto nel testu como nel fondu son tan ximielgos que causen esmolición y dentera. Pretender volver a dayos "rangu democráticu" ye como poco, un insultu y una provocación.
Queda nidio de qué y de quién ye heriede la clas política asturiana y espeya el raigón de los insultos y menosprecios que mos ufren dende cuantayá ca vegada que se fala de la llingua asturiana. Ya sabemos de qu'estratu cultural surden los dirixentes de la FSA-PSOE_PP.
Nun debemos aceutar qu'esta castia política, señardosa col pasáu, redacte les nueses lleis, nun podemos permitiyos que reformen el nuesu Estatutu d'Autonomía y nun podemos consentir que mos sigan gobernando nin qu'agospien nes estructures d'un réxime d'autonomía y democracia respetuosu col estáu de derecho.
