9/7/08

El presidente'l Partíu Popular afita les declaraciones d'Aréstegui no tocante a l'asturianu.

El Presidente'l Partíu Popular Ovidio Sánchez dió sofitu güei, dempués d'un nuevu aconceyamientu de la Ponencia de Reforma l'Estatutu, a les declaraciones feches por Joaquín Aréstegui nes que refugaba la propuesta del Conceyu Abiertu pa facer oficial la llingua asturiana.
  • "Nel PP nun tamos pola oficialidá como nun lo tuviemos nunca, nun hai cambéu algún nesti tema", dixo Ovidio Sánchez, énte les cámares de la TPA.
Zárrense asina, si'l Comité Executivu Rexonal del Partíu Popular nun-y pon remediu, meses de promeses -a lo que paez eleitoralistes-, d'ambigüedaes y de cortexos per parte'l Partíu Popular colos asturianistes (anque seyan d'izquierdes, como dixo Gabino de Lorenzo cuando-yos pidió'l votu), col Conceyu Abiertu pola Oficialidá y la Fundación Caveda y Nava (a les que-yos pidieron informes), y colos medios de comunicación énte los que se presentaron como firmes defensores de la oficialidá (como fizo Pilar Fernández Pardo na Canal 10 de televisión de Xixón y l'alcalde d'Uviéu'n Les Noticies).

La manipulación, falta de respetu y engañifa del Partíu Popular tien que tener una rempuesta nidia, urxente y esixente, de los medios, del Conceyu Abiertu pola Oficialidá y de la Fundación Caveda y Nava.

Naguamos porque la esplicación de Pilar Fernández Pardo y de Gabino de Lorenzo, por dignidá democrática, nun se faiga esperar.