- Euskaldunizar el conflictu llingüísticu ye una estratexa que vien siendo avezada ente los siguidores del arecismu.
- El comportamientu represor prauticáu pol arecismu, reprimiendo la llingua, imponiéndomos un «Principado» y un Estatutu, nun va a xenerar la sumisión dafechu.
Andecha Astur considera patético dafechu que Fernández de Castro, la cara pública del postrer actu de represión llingüístico vivíu n’Asturies pretenda presentase énte la sociedá asturiano comu víctima en función de pretendíes menacies recibíes comu rempuesta al so comportamientu represor.
Asina mesmo, quier denunciar el so intentu de «Euskaldunizar» el conflictu llingüísticu con afirmaciones comu «agora comprendo perbien dellos de testimonios que mos aporten d’otros llugares» una estratexa que vien siendo avezada ente los seguidores del arecismu y qu’Andecha Astur considera tremendamente pelligrosa, darréu que con ella nun se persigue más qu’incrementar la represión escontra los seutores más concenxaos de la sociedá asturiano na so llucha por llibertaes y drechos democráticos internacionalmente reconocíos.
Más llamentable entá ye que s’escude nel fechu de que la emienda por elli presentada saliere alantre tres una votación democrática «a cara descubierta» comu si non fora evidente que comu consecuencia d’un procesu aparentemente democráticu puen llegar a tomase decisiones antidemocrátiques dafechu y/o a la escontra de los drechos humanos. Aende ta’l casu de les llexislaciones racistes entá vixentes en dellos estaos, la pena muerte, el procesu del III Reich, la direutiva europea d’inmigración...
Ye por too ello polo qu’Andecha Astur fae una llamamientu al profesor Fernández de Castro y a los que s’alcuentre tres elli pa que, yá que nun ye capaz d’aceutar una situación de normalidá democrático, cese nos sos intentos de criminalización y victimismu, qu’en ná aiden y que tan valeros de credibilidá. Toos sabemos quien son los represores y quien les víctimes.Ye más, conocíu’l so posicionamientu políticu con afirmaciones tales comu «yo no puedo respaldar una inclusión que contribuye a reforzar la imagen del asturiano como lengua nacional» consideramos que les pretendíes «menacies ya intimidaciones» por elli denunciaes, puean nun axustase dafechu a la rialidá, pudiendo tar rializaes col úncu finxu de dar fuercia a la so postura política.
A lo cabero, y antemanándomos a previsibles manipulaciones o males interpretaciones del presente escritu, Andecha Astur quier sopelexar una vuelta más el so apueste nidiu y rotundu pol respetu a la democrácia y la vía político y del diálogu comu mecanismos únicamente válidos pa resolver el conflictu asturianu, pero cola mesma rotundidá alvierte que’l comportamientu represor prauticáu pol arecismiu, con miles de mozos obligaos a emigrar ca añu, reprimiendo la llingua, galleguizando l’ocidente asturianu, precarizando’l mercáu y les condiciones llaborales, esfarrapando’l mediu ambiente asturianu, imponiéndomos un «Principado» y un Estatutu d’Autonomía que nun mos permiten votar... nun va a xenerar la sumisión dafechu que con ello se pretende, y finarán por xenerar rempuestes ca vuelta más direutes nel somantu la sociedá asturiano que nun creyemos que seyan n’absoluto deseyables.
