El Conceyu Abiertu pola Oficialidá empobinó una carta abierta a la militancia socialista que foi repartida ente los delegaos de la FSA aconceyaos nel Auditoriu d'Uviéu con motivu del so XXX Congresu.
Pretendíase per parte del CAO, entidá na que se integren más de trescientes asociaciones culturales, sociales, polítiques y sindicales de tol país, averar el debate so la necesidá de la oficialidá pa la sobrevivencia de la llingua asturiana y abrir un calce de reflexón nes files socialistes asina como tende-yos la man pal diálogu.
Munchu esfuerciu el qu'emplegó el Conceyu Abiertu pola Oficialidá pa tan probes resultaos. El llamáu al diálogu "dende'l respetu al debate internu de los socialistes", foi dafechamente despreciáu polos dirixentes y delegaos asistentes al Congresu y nun mereció nin un segundu d'atención pela parte de so.
Nun paga la pena falar con quien nun quier oyer.
Carta Abierta a los y les militantes de la FSA.
La llingua materna ye una identidá primaria. Lloñe de ser bandera política, ye un vínculu a la tierra asturiana, una forma d'atalantar el mundu global dende lo llocal. Esta llingua ye un patrimoniu de toes y toos los asturianos. Tien que dexar de ser un espaciu de conflictu pa ser una ferramienta normal y normalizada de convivencia ciudadana.
La Llingua Asturiana ye, como'l catalán, el gallego y otres llingües, una llingua romance europea. Tien mil años d'esistencia na Península Ibérica. Ye la llingua hestórica del vieyu reinu d'Asturies y Lleón. Con toles sos variantes dialeutales tien un tueru únicu, dixebrao del castellanu, magar que cercanu. Ye significativo que'l Mirandés, del troncu dialeutal del asturianu, que tien namái 15.000 falantes, seya oficial en Portugal. El gallegu, catalán y otres llingües del estáu español son oficiales. Nun pedimos más que los derechos que se-yos reconocen a otres comunidaes.
La cooficialidá de les llingües de la nuesa comunidá nun ye una imposición, sinón una reconocencia llegal a los falantes y dar validez xurídica a la llingua que llibremente quieran escoyer y usar. L'Estatutu d'Autonomía d'Asturies tien de garantizar la igualdá ente toes y toos los ciudananos. Nun pue discriminar por mor de llingua a ciudadanos coles mesmes obligaciones fiscales, pero ensin iguales derechos civiles.
La UNESCO, nel so Atlas of the World Languages in danger of desappearing qu'espubliza esti Añu Internacional de les Llingües, 2008, recueye la llingua asturiana como llingua en peligru de desapaición, dando-y malpenes dos xeneraciones de vida. La Llei d'Usu, los Planes de Normalización, o les Ordenances Municipales, les actuales normes de proteición, nun fueron quién a parar darréu esti retrocesu permanente, nin la situación d'amenorgamientu o invisibilidá. Namái la equiparación llegal pue garantizar la sobrevivencia de la llingua asturiana, con presencia social nos medios de comunicación, la enseñanza, l'alministración o los espacios públicos.
La Declaración Universal de los Derechos Humanos diz que naide ha ser discrimináu pola so llingua. La Carta Europea de les Llingües Minorizaes, ratificada pol estáu español, la Convención pal Patrimoniu Inmaterial de la UNESCO o la Declaración de los Derechos Llingüísticos afiten que toa llingua tien derechu a ser emplegada polos sos falantes ensin torgues nin discriminaciones. La propia Constitución Española diz que les otres llingües del Estáu serán oficiales d'alcuerdu a los sos Estatutos d'Autonomía. Son derechos fundamentales. Los derechos nun se dan. Reconócense.
Nun somos a entenderr cómo un Partíu Socialista, mayoritariu y gobernante n'Asturies, nel que munchos militantes son dafechu falantes d'asturianu o gallego-asturianu, tenga tala insensibilidá pa con esti bien cultural. Inda más cuando la posición del Congresu Federal y del so Secretariu Xeneral, Jose Luis Rodríguez Zapatero, defende les llingües cooficiales como un valor de convivencia y pluralidá. Si la Oficialidá nun ye imposición pa los socialistes d'otres Comunidaes, hai que destacar la contradición de que n'Asturies sí lo ye.
El Conceyu Abiertu pola Oficialidá (CAO) integrao por más de 300 asociacionnes, culturales, sociales, politiques y sindicales, dende'l respetu al debate internu de los socialistes asturianos, ufre estes considerances a la militancia de la FSA. Esta carta abierta quier ser un puntu d'información y reflexón pa un alderique tan importante p'Asturies. Tendémos-y la mano pal diálogu a la FSA y saludamos a los sos militantes, como asturianos y asturianes. De la vuestra decisión depende la vida o la muerte de la Llingua Asturiana. Feliz Congresu y que seya granible pal futuru d'Asturies.
