Lo único que busca'l testu de la Ponencia ye derogar la Llei d'Usu.

Polo que recopilamos nos medios, nes noticies d'Axencia y de les aportaciones de los blogueros, el testu iguáu pola ponencia pue ser el que vien darréu:

• L'asturianu y'l gallego-asturiano constituyen una de les manifestaciones más destacaes del patrimoniu llingüísticu d'Asturies y un valir social de respetu, convivencia y entendimientu.

• El Principáu d'Asturies va velar por promover y fomentar el so usu, asina como'l so espardimientu nos medios de comunicación y la enseñanza, respetando en tou casu les variantes llocales y la voluntariedá nel so aprendizax.

• Por Llei del Principáu d’Asturies, que p’aprobase, modificase o derogase requier mayoría de dos tercios de la Xunta Xeneral nun votación final sobre’l conxuntu del testu, regúlase la proteición, l’usu y la promoción del asturianu y del gallego-asturianu.

Nuna primera güeyada y sin ser mas espertu na materia que lo que me da la esperiencia d'años aguantando les trampes, engañifes y falses promeses de los políticos d'esta tierra nel tarrén llingüísticu, creo que se pue dicir ensín miéu a enquivocase que nun hai nengún avance y sí un retrocesu de más de diez años no que tenemos conseguío.

Nel primer párrafu de mano nun declara la llingua cooficial, reconozse el nome de "asturianu" pero nin siquiera se la noma como "llingua propia". Créase una figura nueva, el "gallego-asturianu", que tampoco merez polos ponentes categoría de llingua. Xuridicamente, nulu.

El segundu párrafu, nun merez nin comentariu, ye lo mesmo qu'había nel Estatutu y ya sabemos toos pa que valió.

Col tercer párrafu reculamos direutamente a les catacumbes:

• Una Llei aprobada polos dos tercios de la Xunta Xeneral del Principáu va regular el so usu, enseñanza, proteición y promoción.

derogaría la Llei 1/98 d'Usu del Asturianu y la so sostituición pero otra aprebada per mayoría de dos tercios, o seya por los mismos a los que tanto-yos ofende esta Llei agora en vigor, el únicu preséu que tuviemos al qu'agarramos en toos estos años.

Ta claro qu'el testu ta como va redactáu lo que pretende ye derogar laLlei 1/98 d'Usu del Asturianu que anque nun valió pa muncho yera una esperanza, pero agora van tener la oportúnidá, con soterfuxos, de calcái la sentencia de muerte.

De prosperar esti testu, ensín declaración espresa d'oficialidá, el futuru de la llingua diva ser tan prietu que lo asocedío na Xunta de Facultá de Filoloxía quedaría nuna anéudota, aunque bien paez, dalgunos ya lo víen venir, el primer actu pa lo que mos va a traer el Estatutu.

El PSOE y el PP van de la man nesta estratexa y la sociedá y la hestoria va ponelos al ras a la hora de xulgalos.