Aréstegui refuga de plano la propuesta d'oficialidá apurrida pol Conceyu Abiertu.

• De nenguna de les maneres el PP va aceutar la propuesta del Conceyu Abiertu pola Oficialidá.
• Nun somos partidarios de la oficialidá nin de la cooficialidá del asturianu polo que nun vamos asumir esti testu.

Si estes declaraciones de Joaquín Aréstegui son confirmaes pol Partíu Popular esfúmense les posibilidaes de qu'el Estatutu recueya la oficialidá de la llingua asturiana, al tar el partíu mayoritariu, el PSOE, tamién a la escontra del so reconocimientu oficial.

Ta por ver si les declaraciones d'Aréstegui son espresión de la voluntá del Partíu Popular y si los que nos últimos meses, sobre too en campaña eleitoral, ficieron allabancies de defensa de la oficialidá del asturianu, como Gabino de Lorenzo o Pilar Fernández Pardo ente otros, tienen daqué que dicir.

El Partíu Popular ta pendiente n'Asturies de la cellebración d'un Congresu nel que, ensín llugar a dubies, el tema de la oficialidá del asturianu tamién tará presente nes posibles candidatures.

Sicasí, los más beneficiaos de les declaraciones d'Aréstegui son nesti momentu los socialistes, qu'andaben más que preocupaos pola postura positiva ante la oficialidá nel Partíu Popular, lo que podía dexalos nuna incómoda situación de soledá na defensa del centralismu y escontra la llingua y la cultura d'Asturies.

Per otra parte, amósase qu'Asturies sigui siendo diferente no que respeuta a llibertaes, derechos y cambéos que se producen nel restu'l Estáu. Equí ni la FSA-PSOE defende derechos, pluralismu nin democracia, nin nel Partíu Popular somos a nortiar, sigún ésto, dengún "viax al centru".