El Senáu aprobó una moción de la Entesa Catalana (socialistes del PSC, Esquerra Republicana ya Iniciativa per Cataluña), que normaliza l'usu oral y escritu de toes les llingües oficiales na so actividá ordinaria. Los senadores socialistes asturianos votaron a favor.
Ente eses llingües atópase l'occitanu, llingua minoritaria francesa falada nel Valle d'Arán por unes 4.000 persones y oficial en Cataluña. Llingua que merez el respetu a los derechos de los sos falantes, como'l restu de les llingües, pero nin mayor nin menor que'l asturianu.
Los senadores del PSOE por Asturies, José Antonio Alonso, José Manuel Cuervo, María Carmen Sanjurjo y Javier Fernández nun paecen tenelo del too claro. La FSA-PSOE, a la que pertenecen, mantién en Asturies una posición belixerante contra la oficialidá de la llingua asturiana nel Estatutu d'Autonomía y la reconocencia de derechos a los sos falantes.
Javier Fernández, ye senador elexíu pola Xunta Xeneral en representación del Principáu d'Asturies, Secretariu Xeneral de la FSA-PSOE y destacáu por ser ún de los enemigos declaraos de la oficialidá y de la propia llingua. Ye'l Presidente de la Comisión de Reglamentu del Senáu, que será la encargada d'aperiar el testu de la Reforma del Reglamentu motivada por esta moción de la Entesa agora aprobada y José ManuelCuervo, tamién senador asturianu, ésti por sufraxu, el vicepresidente primeru de la mesma comisión.
Javier Fernández tien frases glorioses contra l'asturianu y la oficialidá que diba ser interesante que conocieren los senadores de la Comisión de Reglamentu que preside y los sos compañeros de la Entesa Catalana de Progrés, los socialistes del País Valencián, de Euskadi, Galicia...
Na so intervención nel XIV Congresu de les Mocedaes Socialistes d'Asturies dixo esto:
- Preservar la lengua asturiana está bien, pero glorificarla no, porque las raíces de la intolerancia están hincadas en la sobrevaloración de lo propio.
- Los que defienden la oficialidad piensan menos en la lengua como instrumento de comunicación que como instrumento ideológico.
- Rechazamos la imposición que supone la oficialidad.
- Existe un proyecto para poner en marcha el motor de un nacionalismo ideológico en esta región a través de la defensa del carácter oficial de la llingua.
El PSOE y Javier Fernández, torguen n'Uviéu la sobrevivencia de la llingua asturiana, los derechos de los ciudadaos al usu oficial de la llingua propia, al tiempu que'n Madrid favorecen, impulsen, normalicen y salvaguardien los derechos de la llingua francesa occitana, y de les otres llingües oficiales y cooficiales españoles.
Nun vamos dexar de denunciar la doble vara de midir, el cinismu, la hipocresía y la mala fe que s'emplega col asturianu, mientres-y sigan furtiando'l reconocimientu de llingua propia oficial d'Asturies.
Frases pa la hestoria del senador Javier Fernández, Presidente de la Comisión de Reglamentu del Senáu.
