El Gobiernu y el PSOE boicotien la Xunta Estraordinaria de l'Academia.

Ayeri nueve de mayu, Día de les Lletres Asturianes, cellebrose como ye vezu de magar los años, Xunta Estraordinaria de l'Academia de la Llingua Asturiana y la eleición de un nuevu mienbru de númberu qu'esti añu foi Berta Piñán.

La presidenta de la Academia, Ana Cano, nel so discursu oficial refiriose a la propuesta que va apurrir a la Xunta Xeneral del Principáu y a la ponencia de reforma del Estatutu na que platega facer declaración esplícita d'oficialidá del asturianu nel testu estatutariu como ya ficieron cuantayá toles comunidaes con llingua propia del Estáu, "ya nun ye posible siguir calteniendo que se quier un futuru pa la llingua si nun se ponen les midíes llegales precises pa qu'eso puea asoceder"

Tamien tuvo pallabres pal recién elexíu Retor de la Universidá d'Uviéu, Vicente Gotor, al que-y recordó el so lema "Axúntanos la Universidá" y-y pidió qu'asitiara la llingua asturiana nel so llugar dientro la universidá y de les nueves titulaciones europées.

Anunció el Primer Congresu Internacional de la LLingua Asturiana pal mes de payares d'esti añu col entituláu "Más de mil años d'hestoria d'una llingua nel país de los ástures".

Nun dexó pasar Ana Cano la oportunidá de que nes butaques del teatru atopábase José Ramón Pérez Ornia, p'afalar a la Radio y Televisión del Principáu d'Asturies a enanchar la ufierta n'asturianu "tanto no que cinca al númberu y tipu de programes como al tiempu d'emisión y a les bandes horaries. Lo que se fai bien ta, pero hai que dar el saltu a otra mena d'espacios, como los informativos, por exemplu, pol altu valir simbólicu que tienen en cuantes a la normalización social".

Amás del Direutor de la RTPA participaron activamente, unos na manifestación y otros nel actu acádemicu, Noemí Martín, Jesús Iglesias, García Valledor y Rafael Palacios por Izquierda Xunida-Bloque y tamién José Suárez Arias (Felechosa), Reiniero Alvarez y Cristina Coto pol Partíu Popular, tamién representantes d'Unidá, Andecha, Comisiones Obreres, Suatea y UXT.

Per parte del PSOE nun se vio a nengún representante políticu colo qu'espeya qu'esta fuercia política quier mantenese al marxe de les reivincaciones llingüistiques ya incluso de los actos oficiales de l'Academia. Un cargu técnicu del Serviciu de "política llingüistica", paez que representaba al Gobiernu del Príncipáu.

La xornada zarrose coles actuaciones musicales de Llorián García, Nuberu, Dixebra, Llan de Cubel, Carlos Rubiera y Los Berrones.