COMUNICÁU de la Xunta pola Defensa de la Llingua.
20 Mayu del 2008.Ente les últimes declaraciones feches por Jesus Gutiérrez sobre la oficialidá de la llingua asturiana, la Xunta pola Defensa de la Llingua Asturiana quier face-y llegar a la opinión pública delles refexones:
1. Facemos un llamáu a la clas política asturiana pa que refugue les declaraciones gravísimes del secretariu xeneral del FSA, onde interpreta los últimos resultaos electorales como una especie de referéndum sobre la oficialidá, inorando tolos estudios sociolóxicos que dexen claro que la mayoría de la población ve con bonos güeyos la oficialidá. Nos últimos comicios foron otres cuestiones, en clave más estatal, les que taben en xuegu, y los votantes nun taben decidiendo oficialidá sí, oficialidá non, como tol mundu sabe. Manipular asina l’exerciciu democráticu de los ciudadanos ye más propio d’un demagogu falsariu, como bien saben munchos militantes, votantes y dirixentes del PSOE asturianu por elecciones anteriores.
2. Ye un fechu gravísmu qu’un cargu de la FSA declare qu’asume la futura inestabilidá del gobiernu asturianu con tal de nun contemplar la oficialidá. La non oficialidá trai como consecuencia la desapaición de la llingua a mediu plazu, fechu sociolóxicu que ye de consensu dientro y fuera d’Asturies ente los especialistes y que los políticos d’otros territorios sabíen de sobra cuando apoyaron unánimemente la oficialidá de les sos llingües. L’aristocracia provinciana de la FSA va a contracorriente: negar derechos en cuenta de reconocelos.
3. N’Asturies tán conculcandose derechos fundamentales universales, amás de los que la Constitución Española reconoz a les llingues propies, y los asturianos y asturianes tán sufriendo l’agraviu comparativu col restu de los ciudadanos del estáu. La FSA tien qu’esplicar por qué nosotros y el nuestru idioma nun tenemos derechu a lo mesmo qu’a los demás-yos reconocen.
4. Por cuenta d’unos intereses y prexuicios políticos primarios, esti representante de la FSA va formar parte de la llista de xente que va tener l’honor tan dudosu de ser responsable de la desapaición de la nuestra llingua. Trenta años d’esa “promoción” que tanto defende yá demostraron que nun valieron pa frenar el procesu de sustitución llingüística. Nun garrar la responsabilidá de poner les bases llegales qu’ayuden a garantizar la tresmisión del asturianu a les xeneraciones venideres ye condenar a la llingua a la desapaición. Nun tamos falando de filosofíes nin de creencies. Ye la realidá.
Vía| Xunta pola Defensa de la Llingua Asturiana
Vía| Europa Press
