La Xunta califica de «propies d'un demagogu irresponsable» les declaraciones del secretariu d'organización de la FSA, que comparó la oficialidá con «creer o nun creer en Dios».La organización de defensa de la llingua pide que'l debate se lleve a una sienda de racionalidá y al campu de los derechos ciudadanos.
Nesti sen, énte les declaraciones de Jesús Gutiérrez sobre la oficialidá de la llingua asturiana la Xunta pola Defensa de la Llingua quier face-y llegar a la opinión pública delles reflexones. Según la organización cívica, comparar a estes altures la opción de la oficialidá pal asturianu y pal gallego-asturiano cola creencia en Dios «ye una argumentación propia d'un demente. Habría qu'entruga-y al secretariu d'organización de la FSA si 'cree nos derechos de los asturianos' o si nun cree nellos, porque ehí ye onde ta'l debate real, y si cree que los y les falantes de la llingua asturiana deben seguir teniendo la suerte de ser ciudadanos de segunda, colos sos derechos universales conculcaos.
A la Xunta pola Defensa de la Llingua Asturiana chóca-y «que ocurrencies demagóxiques y que pretenden crear alarma social seyan l'argumentariu que-y queda a la FSA pa torgar un estautu que recueya la Oficialidá del asturianu. Nesi sen, habrá que entrugar sobre les obligaciones que tienen los políticos y l'alministración pública pa cola ayalga cultural que compartimos toos y toes».
Más allá d'estes opiniones, la Xunta pola Defensa de la Llingua espón que «la llinia de la obligatoriedá de la que fala la FSA nun existe.Ye una pantasma cola que se pretender crear duldes nuna población mayoritariamente favorable a la reconocencia de los derechos llingüísticos, como amuesen toles encuestes. La llinia real ye la del peligru a la estinción llingüística. Cualquier sociedá avanzao, cualquier comunidá d'anguaño, respuende con eficacia y ensin ambaxes faciendo encaxar nel so marcu llegal a la llingua que-y correspuende. Nel casu del marcu llegal español, ye dicir, la Constitución Española, esti encaxe sólo se contempla col estatus de llingua oficial pa les llingües propies. ¿Quier dicir el mierense Jesús Gutiérrez que l'asturianu nun ye la llingua propia d'Asturies? ¿A quién va convencer agora si lo afirma?. ¿La llingua na qu'escriben los nuestros escritores, na que falen munchos ciudadanos cada día, ye menos que les demás llingues españoles?».
Dende la Xunta pola Defensa de la Llingua Asturiana deféndese quel'asturianu merez ser tratáu n'igualdá de condiciones con respectu a les demás llingues y que namás oficialidá garantiza esa igualdá. «Ésta sí ye la garantía de futuru», argumenten nel so comunicáu, «en cuenta de planes de promoción cosméticos a los que tamos avezaos. El debate de la obligatoriedá ye un debate falsu y interesáu, sobre too dientro una sociedá na que obligaciones y derechos van siempre garraos de la mano. Va tiempu, los voceros de la FSA, decíen que la llingua asturiana nun yera tala y que por eso nun podía ser oficial; agora sutripen l'espectru de la obligatoriedá; mañana van vinir con otra cosa. Cualquier argumentu, cualquier idea sacada del peor de los complexos pa col asturianu val pa nun defender, ensin dobleces, una solución en condiciones al problema del desaniciu del idioma».
Por último, la organización cívica de defensa de la llingua afala a los partíos con representación, a les militancies del PSOE, PP, y IU, «a que garanticen que nel próximu estatutu l'dioma asturianu va ser oficial, persabiendo qu'ello ye un puntu de partida, non fin nelli mesmu, del respetu a los derechos fundamentales nos que toos y toes creemos y una manera de caltener pa xeneraciones futures un patrimoniu cultural amenazáu».
