SemeyaBanderes francesa, occitana y catalana nel Parlamentu d'El Llinguadoc, en Montpellier.
Güei vienres va constituyíse'n Viella (Valle d'Arán) l'Academia de la Llingua Occitana, muérganu que va tener como oxetivu la codificación del occitanu y sedrá heriede de la llabor desendolcada nos caberos años pol Conseyu de la Llingua Occitana fundáu nel añu 1996.
La llingua occitana ye oficial en Cataluña sigún el Estatutu d'Autonomía que nel so artículu 6, puntu 5 diz: "La llingua occitana, nomada aranés n'Arán, ye la llingua propia d'esti territoriu y ye oficial en Cataluña d'alcuerdu a lo establecío n'esti Estatutu y les lleis de normalización llingüística".
L'Academia ye una iniciativa del Institutu d'Estudios Occitanos y del Conseyu Xeneral d'Arán (muérganu de gobiernu del Valle d'Arán), y va facer llabor cola gramática, la grafía y la toponimia. El plenu de l'Academia van formalu 50 miembros escoyíos ente les rexones occitanes (La Provenza, El Llinguadoc, El Delfináu, La Gascuña, Valle d'Arán...), y representantes de la enseñanza, la edición, el periodismu y otros sectores que trabayen pola llingua.
Al reconocimientu de les instituciones catalanes a la llingua occitana va sumase agora tamién el Estáu Francés que, por aciu d'una reforma constitucional, fadrá reconocimientu expresu de les llingües distintes de la oficial de la República, ente les que s'atopen el bretón, el vascu, el corsu, el catalán o l'alsacianu.
