El Principáu apreba les bases pa les convocatories de premios en llingua asturiana

Fomentar la creatividá lliteraria contribúi ensin dulda nenguna a desarrollar el conteníu cultural de la sociedá, sobre manera teniendo en cuenta la importancia de la lliteratura, en cualquier de les tantes de manifestaciones que tien nel nuestru tiempu. Tamién ye bien sabío que la escritura, que surde de la voluntá de creación y comunicación, lleva con ella un trabayu personal importante, una dedicación de tiempu y esfuerzu que, ensin ser midibles no económico porque’l valir propiu de la lliteratura tresciende talos parámetros, sí que se puen reconocer y incentivar polos poderes públicos. Poro, la Conseyería de Cultura y Turismu del Principáu d’Asturies vien convocando de manera añal dellos premios lliterarios dirixíos a afitar, arriquecer y prestixar la llingua y cultura asturianes.

En cumplimientu d’esta finalidá, la Conseyería plantea la convocatoria de los premios que s’indiquen de siguío:

— Premiu “Xosefa Xovellanos” de novela n’asturianu;

— Premiu “Xuan M.ª Acebal” de poesía n’asturianu;

— Premiu “Máximo Fuertes Acevedo” d’ensayu n’asturianu;

— Premiu “María Josefa Canellada” de lliteratura infantil o xuvenil n’asturianu; y

— Premiu “Alfonso Iglesias” de cómic n’asturianu.

Enfotaos, pa detrás, en qu’actuaciones d’esti calter contribúin de manera eficaz a dinamizar l’actividá cultural de la Comunidá Autónoma, y n’especial un aspectu bien importante de la mesma como ye’l de la creación lliteraria.

Fonte| BOPA