El Plenu del miércoles pasáu día 25, aprebó nel Conceyu Cangas del Narcea el Plan de Normalización del Asturianu. El PSOE nun-y dio el so votu favoratible a pesar de calificalu "d'aceutable", por nun ser la llingua asturiana oficial y recoyer el Plan la valoración del conocimientu d'asturianu na contratación.
L'alcalde de Cangas José Manuel Martínez dixo que "l'asturianu entá nun ye oficial por mor de la zuna provinciano" y afitó tamién el sofitu del Conceyu a los empleaos que den solución a les demandes vecinales col so conocimientu d'asturianu y que les Ordenancies afalen l'emplegu de les dos llingües.
El Plan de Normalización del Asturianu 2009-2011 nel Conceyu Cangas del Narcea tamién refier dellos oxetivos a algamar:
- Atender a los ciudadanos na llingua qu'escueyan pa comunicase cola Alministración.
- Asoleyar tolos documentos n'asturianu.
- Enderechar la toponimia oficial del Conceyu.
- Facer por emponderar el conceutu de valir y respetu pol asturianu ente los más mozos.
- Arreyar l'asturianu a la imaxe corporativa del Conceyu.
- Potenciar la formación n'asturianu ente'l personal y valorala nel accesu a los puestos de trabayu n'Alministración del Conceyu.
- Esparder tola documentación turística, cultural y deportiva n'ediciones billingües y facer usu normalizáu del asturianu nos medios de comunicación y na páxina web del Conceyu.
No hay comentarios:
Publicar un comentario