17/3/09

El Conceyu por Otra Función Pública denuncia énte la Xunta Xeneral la esistencia d'una "Alministración paralela".


El Conceyu por Otra Función Pública n'Asturies (COFPA), presentó ayeri llunes nel Rexistru de la Xunta Xeneral del Principáu y dirixíu a la Comisión de Pidimientos, l'Informe Xeneral so la situación de la Función Pública n'Alministración del Principáu d'Asturies.

Preténdese poner nel conocimientu de les Estayes Polítiques Parllamentaries la vulneración per sistema de los principios constitucionales na seleición, accesu y promoción profesional de los emplegaos públicos n'Alministración asturiana.

Asina, nel Informe denúnciase,

  • La esistencia d’una Alministración Pública paralela na que nun se respeta nengún de los principios constitucionales d’accesu al emplegu públicu.
  • La discrecionalidá dafechu de l’Alministración Pública asturiana pa nomar a los componentes de los muérganos de seleición de personal atenta escontra la necesaria imparcialidá ya independencia de los mesmos.

  • El mantenimientu de nomamientos provisionales o en comisión de servicios per plazos mui superiores a los llegalmente establecíos, ensin que se convoquen los preceutivos concursos de méritos, impide a los emplegaos públicos l’exerciciu efeutivu del derechu fonderu a la promoción profesional en condiciones d’igualdá, méritu y capacidá.

  • La inflación de puestos de llibre designación, muncho más pa’allá del calter esceicional y estraordinariu qu’atribuye la llei a esti sistema de provisión, perfai un sistema de promoción profesional manifiestamente clientelar y dependiente del enfotu personal y/o de les influyencies personales, polítiques, corporatives o asemeyaes.

  • L´entamu d’una supuesta carrera profesional horizontal, ensin marcu xurídicu regulador y afitada nun incalificable inxerimientu voluntariu nun sistema que nun esiste, y que ye’l cume d’una política pública de personal de calter clientelista.

  • L'incumplimientu per parte del Gobiernu asturianu de les disposiciones llegales sobre la execución de la ufierta d’emplegu públicu.

  • L'incumplimientu de les disposiciones llegales sobre funcionarios eventuales.


Testu enteru del Informe rexistráu na Xunta Xeneral

Vía | Conceyu por Otra Función Pública n'Asturies (COFPA).


No hay comentarios:

Publicar un comentario