Énte les últimes declaraciones a la prensa de la Directora Xeneral de Política Llingüística, nes que desvinculaba la situación de non oficialidá cola evidencia de peligru seriu de desapaición de la llingua asturiana destacada nos informes recientes del Conseyu d’Europa y de la UNESCO, la Xunta pola Defensa de la Llingua Asturiana quier treslladar:
1. La Xunta pola Defensa de la Llingua Asturiana quier denunciar como intolerables l’actitú hipócrita y l’exerciciu de trilerismu políticu de la Directora Xeneral de Política Llingüística, Consuelo Vega. Pidimos por ello nuevamente’l so cese inmediatu.
2. Sobre les argumentaciones que la directora emplega pa desvincular la falta d’oficialidá a la situación de peligru seriu de desapaición del idioma:
La comparación de la situación del inglés nos Estaos Uníos cola llingua asturiana por nun ser oficiales nos dos casos ye claramente tendenciosa. La regulación de los derechos y usos llingüísticos ye diferente según l’ordenamientu xurídicu de cada Estáu del mundu.
L’inglés nun ta reconocíu espresamente como llingua oficial na mayoría de los estaos del mundu que se regulen alministrativamente nesa llingua. Sicasí, eso nun implica que l’idioma nun sea’l llegalmente afitao pa tolos usos públicos y alministrativos y que l’usu per parte de la población ta garantizáu y protexíu a tolos efectos. Evidentemente, como sabe perfectamente la señora Consuelo Vega, esto nun tien nada que ver cola situación de los derechos y usos de la llingua asturiana n’Asturies.
Nel casu concretu del Estáu español, la oficialidá ye l’únicu marcu llegal previstu pola Constitución, lo qu’implica que nun esista previsión d’amparu a los derechos llingüísticos si la llingua nun se declara espresamente como oficial. Por eso, a escepción d’Asturies, el restu comunidaes con llingua propia reconocieron les sos llingües como oficiales va más de venticinco años.
Qu’una llingua oficial como’l vascu siga nuna situación de riesgu a pesar de ser oficial indica que’l reconocimientu de la oficialidá ye condición indispensable pero non siempre suficiente pa la sobrevivencia d’un idioma.
La declaración d’oficialidá d’una llingua minorizada nun garantiza la so revitalización y tresmisión xeneracional, simplemente reconoz a los falantes los derechos al usu y al aprendizaxe. Pero, d’otra banda y como ye evidente, la non oficialidá sí ye garantía d’esterminiu del idioma a curtio o mediu plazu. Como tamién persabe la señora Directora Xeneral.
3. La reivindicación de la oficialidá non solo ye llexítima como diz la directora Consuelo Vega, sinon que ye la única postura llexítima nel marcu constitucional del Estáu español.
La oposición política a la oficialidá mantiénse únicamente na negación de la realidá científica, na trampa del non reconocimientu políticu del asturianu como llingua. Dalgo que la directora xeneral de “Política Llingüística” debería conocer perfectamente.
Independientemente de los aciertos y errores de les polítiques llingüístiques que se siguieran nel restu comunidaes con llingua propia, demostróse que’l reconocimientu de la oficialidá valió pa la dignificación y promoción del so patrimoniu cultural y llingüísticu, convirtiendolu nun elementu dinamizador social y económicu de primer orde al que nengún partíu d’eses comunidaes ta dispuestu a renunciar.
N’Asturies por contra vemos como’l nuesu patrimoniu llingüísticu y cultural desapaez ente la prohibición espresa y la promoción institucional del despreciu y la vergüenza.
Esto, y non otra cosa, ye lo que denuncien tolos organismos internacionales pa vergüenza de los nuesos xestores políticos. Por ello, la Xunta pola Defensa de la Llingua Asturiana vuelve a pidir al Gobiernu asturianu la mínima responsabilidá debida pa coles sos funciones y l’abandonu definitivu de la política de la confusión y de la mordaza.
4. La Xunta pola Defensa de la Llingua Asturiana quier entrugar a los grupos políticos que formen l’actual gobiernu asturianu, PSOE y IX-Bloque por Asturies-Verdes, si la campaña anti-oficialidá que ta llevando alantre la Directora de Política Llingüísitica entra dientro del marcu de los alcuerdos del pautu de gobiernu.
La Xunta pola Defensa de la Llingua Asturiana quier emplazar, a les organizaciones polítiques coparticipantes n’esti gobiernu que mantienen públicamente una postura favorable a la oficialidá, a la reflexón sobre la contradicción evidente de participar al mesmu tiempu nun gobiernu que ta faciendo campaña permanente en contra de la oficialidá y en plataformes ciudadanes a favor d’ella.
Encamentamos de cualquier manera al Gobiernu asturianu que dirixa los esfuerzos a trabayar pol beneficiu de la sociedá asturiana, en cuenta de dedicalos a matizar les demandes del movimientu ciudadanu de reivindicación llinguística.
No hay comentarios:
Publicar un comentario