Unidá Nacionalista pidi al Conceyu Xixón una Comisión d'Investigación pol casu Cabueñes

El voceru de vivienda, Daniel Fernández, énte les últimes informaciones aportaes polos vecinos de Cabueñes, ve inxustificable que Sanjurjo siga nel gobiernu municipal y qu’IU se niege a aclarar lo socedío.

El voceru de vivienda d’Unidá Nacionalista Asturiana (UNA) Daniel Fernández, quixo dexar afitáu’l maltar de la so organización por “la incomprensible continuidá del conceyal Sanjurjo nel Ayuntamientu de Xixón y la negativa d’IU a facer una comisión d’investigación”.

Pal voceru nacionalista “lo único que fizo’l Gobiernu municipal énte l’escándalu de Cabueñes ye mentir ya insultar a los vecinos afectaos, ensin contrastar nengún de los datos aportaos por ellos y qu’amuesen grandes irregularidaes en tol Plan Urbanísticu de Cabueñes” y añadió que “el conceyal Sanjurjo tuvo de rectificar otra vuelta les declaraciones que ficiera nun entamu sobre esti casi, neto yá pasara col tema de los horros de San Andrés de los Tacones, amosando asina una actitú obstruccionista en tol procesu, lo que fai intolerable que siga exerciendo les sos responsabilidaes nel Ayuntamientu”.

D’otru llau la organización tampoco entiende la actitú d’IU nesti pelotazu urbanísticu, que pa Daniel Fernández resulta incomprensible yá que “negase a abrir una comisión d’investigación, namás s’entiende si tienen dalgo qu’esconder o si tán implicaos nel escándalu” y camienta que “la única forma d’acabar con estes sospeches ye abrir esa comisión d’investigación”. Dende’l puntu de vista d’UNA nun pue entendese qu’IU pase de ser “la comparsa política del PSOE a ser cómplice del obstruccionismu nesti escándalu”.

Dende UNA vuelve a pidise a les fueces polítiques de Xixón qu’abran una comisión que trate les polítiques urbanístiques de los caberos años, yá que sobre bien d’elles hai tamién sospeches de xestiones irregulares o poco tresparentes como nel casu de Naval Xixón, Xove, ZALIA, etc. Polo que “la única manera de devolve-yos la confianza a los ciudadanos ye que toles duldes sobre la xestión urbanística queden clares darréu” concluyó Daniel Fernández.