Unidá Nacionalista califica la política llingüística de llaceriosa y consecuencia del Pautu PSOE-IX-Bloque

COMUNICÁU D'UNA EN CUENTA DE LES DECLARACIONES DE LA TITULAR DE POLÍTICA LLINGÜÍSTICA

La posición de Consuelo Vega fai patente la belixerancia del PSOE contra la meyora xurídica del asturianu y asitia a IU-BA énte l’espeyu de la so incoherencia ya incapacidad al facer por ser gobiernu y oposición.

Otra vegada una responsable del Gobiernu asturianu, nesti casu la encargada de xestionar la Dirección Xeneral de Política Llingüística, el gran “llogru” d’IU-BA na negocación en materia llingüística, vuelve a truñar contra la oficialidá de la llingua asturiana.

Unidá Nacionalista Asturiana (UNA) camienta que’l fechu de que la responsable directa de la política llingüística diga que nun ye importante pa la supervivencia del asturianu ye un fechu pergrave, porque ta mintiendo y ta contribuyendo, dende’l so cargu, a esparder una de les mentires que’l PSOE lleva intentando inxertar na sociedá asturiana; que la oficialidá ye malo o nun ye necesario pa promocionar de forma afayadiza la llingua asturiana y asegura-y el futuru.

Recordamos que lo más de la sociedá asturiano espresó en delles encuestes una posición favorable a la oficialidá, y que cuando se fai comparanza del asturianu col inglés o col euskera fálase de llingües que, nel primer casu nun oficiales porque nun esiste na lexislación esa figura xurídica como tal, o nel segundu, que gocien d’oficialidá y amás d’un ambiciosu programa de normalización.

Remembramos que la oficialidá nun asegura la supervivencia del idioma, pero ye imprescindible p’algamala, como tol mundu persabe, polo que considerando la situación dramática del asturianu, les declaraciones de Consuelo Vega, propies d’una humorista que nun tien maldita la gracia, namás pueden vese como una broma macabra.

Pa cabu UNA recuerda que’l nomamientu de Consuelo Vega y la política llingüística llaceriosa d’anguaño son les consecuencies d’un pautu de gobiernu robláu ente PSOE ya IU (acompangaos de la so mascota “asturianista” BA), que dexó albentestate a la nuesa llingua, como se sabía dende’l momentu de la firma, polo que rescampla especialmente nesta situación el patéticu espectáculu que tán ufiertándonos tanto’l diputáu Valledor como’l Bloque por Asturies que son corresponsables, pola so incoherencia ya incapacidá, d’esti desastre y faen por disimular criticándose a ellos mesmos –al so gobiernu- y actuando como oposición cuando fan parte d’esti executivu.