Unidá Nacionalista diz ser la fuercia nacionalista, d'izquierdes y ecoloxista n'Asturies

La federación nacionalista recuerda que yá existe una fuercia verdaderamente asturiana, ecoloxista y d'izquierda, UNA, y fai un llamáu a la sociedá asturiana comprometida con estos valores pa que collabore nel afitamientu del proyectu

Unidá Nacionalista Asturiana (UNA) a traviés del so portavoz Faustino Zapico esixó-y al diputáu asturianu Valledor que "nun utilice a la nuesa organización como elementu de debate dientro d'IU" y pídi-y que "les carencies en términos de compromisu asturianu, ecolóxicu y social del so partíu, que vemos que cada vuelta son más clares mesmamente pal propiu Valledor, sían trataes ensin utilizar a la nuesa organización y ensin interferir nel procesu de xuntura de la izquierda nacionalista y verde que se ta faciendo n'Asturies alredor d'UNA".

Zapico amestó que dende UNA "entendemos que'l señor Valledor, como bona parte de la sociedá Asturiana, nun tea a gustu con un pautu de gobiernu col PSOE nel qu'IU renunció dafechu a los sos supuestos oxetivos ecoloxistes, asturianistes o d'izquierda" pero si quier camudar esi discursu "tien de facelo nos órganos internos de la so organización y si como paez ser la so llínia nun tien aceptación na dinámica interna d'IU, ello nun-y permite utilizar gratuitamente a terceres organizaciones soberanes y con una dinámica política independiente nesi debate".

Finalmente UNA quiere recalcar el so llamáu a la sociedá asturiana comprometida colos valores sociales, ecolóxicos, igualitarios y asturianos a que s'axunten al proyectu unitariu entamáu por Unidá Nacionalista Asturiana (UNA) el 8 de septiembre de 2008 y qu'anguaño ta medrando n'apoyos n'abondos sectores de la sociedá asturiana.

Zapico indicó que "UNA ta avanzando na construcción d'esa necesaria fuercia asturiana, d'izquierda y ecoloxista. Pero esti procesu ye independiente de les dinámiques políticas nes que s'alcuentra somorguiada IU con unes llastres, unes renuncies y una dependencia federal que torguen que se pueda convertir nesa fuercia que lluche por una Asturies más soberana, más xusta y más sostenible", un espaciu "representa Unidá Nacionalista Asturiana".

Vía| UNA