26/2/09

Un Decretu franquista ye l'unicu referente llegal pa la ensiñanza del asturianu.


La Llei Orgánica d'Educación nun preve la ensiñanza del asturianu porque nun ye llingua oficial y la Conseyera d'Alministraciones Públiques y vocera del Gobiernu del Principáu díxolo güei claro:

"La especialidá d'asturianu nun ta reconocida pol Ministeriu d'Educación".

La situación del asturianu ye a toes lluces inconstitucional. La Constitución Española de 1978 nun reconoz namás que llingües oficiales o modalidaes llingüístiques derivaes d'estes y tola llexislación posterior sigui esi dictáu.

Hai que remontase a 1975 p'atopar que la ensiñanza del asturianu sigui basándose nel Decretu 1433/1975 firmáu per Francisco Franco y el entós Ministru d'Educación Cruz Martínez Esteruelas que incorpora con caráuter esperimental, "la ensiñanza de les llingües natives españoles como materia voluntaria".

Esti Decretu foi Derogáu en 1978 pa Cataluña y en 1979 pal País Vascu, Galicia, País Valencianu ya Islles Baleares siendo sostitiyíu hasta la entrada en vigor de los Estatutos, per Reales Decretos que regularon la ensiñanza del idioma en cauna d'elles y que figuren en los enllaces anteriores. Con la Constitución y los Estatutos de Autonomía que fueron entrando en vigor, les Comunidaes citaes declararon la oficialidá de la llingua y normalizando el so usu, emplegu y ensiñanza.

P'Asturies nun se derogó el Decretu 1433/75, tampoco hubo Real Decretu qu'incorporara el asturianu a la ensiñanza como mandaba la Constitución y como se fizo nes demás Comunidaes billingües y tampoco se declaró la oficialidá nel Estatutu d'Autonomía.

La dantesca situación, cuyos responsables hai que buscalos nos representantes políticos tanto del Estáu, como de la Comunidá Autónoma d'Asturies y lluéu del Principáu d'Asturies, mantién al asturianu reguláu pol franquismu mientres les otres llingües del Estáu abracen la llegalidá democrática constitucional y estatutaria.

Tovía más grave ye que, derogada la Llei Xeneral d'Educación franquista y, suponemos, el Decretu 1433/1975, cola entrada en vigor de les sucesives Lleis Orgániques d'Educación que yá sólo regulen les llingues cooficiales,
l'asturianu queda nel llimbu de la llegalidá, nuna situación de desamparu constitucional, estatutaria y con un únicu referente:
el Decretu 1433/1975 firmáu un trenta de mayu per Francisco Franco.

Ver tamién otros enllaces:
La dictadura de Franco ya regulaba l'asturianu lo mesmo que'l PSOE-PP proponen pal Estatutu.
Decretos franquistes foron convertíos en Llei Orgánica al traviés del Estatutu d'Asturies.

No hay comentarios:

Publicar un comentario