Énte’l xuiciu al ciudadanu asturianu Fernando G.R na Audiencia Nacional española (que cellebra la so segunda parte esti 12 de febreru) y el “circu mediáticu” montáu al so alrodiu, Andecha Astur quier espresar lo que vien darréu:
- Denunciamos la campaña de criminalización hacia la nuestra organización al través de les informaciones que se vienen espublizando en prensa escrito, medios dixitales, radios y hasta na televisión pública del “Principado”, onde se calificó a Fernando como miembru d’Andecha Astur y llegando a vincular a miembros d’Andecha Astur con supuestes agresiones a periodistes demientres la primer parte del xuiciu.
- Consideramos que la campaña de criminalización haza Andecha busca criminalizar a la izquierda nacionalista asturiana y al nacionalismu asturianu en xeneral (dalgo a lo que por desgracia tamos mui avezaos los nacionalismos non españoles) y con ello a tolos ciudadanos y ciudadanes d’Asturies con una ideoloxía determinao.
- A la vegada que se criminaliza a tou un movimientu políticu y a miles de ciudadanos y ciudadanes, con esti casu, alcontrámonos con un xuiciu na Audiencia Nacional española a un ciudadanu asturianu, al que-y piden 8 años de cárcele por un delito d’estragos en grau de tentativa, y al que, dende la so detención en 2005, se-y vien faciendo un xuiciu públicu paralelu en prensa cola participación de la Delegación del Gobiernu español n’Asturies, con Antonio Trevín al frente (al que-y tenemos qu’agradecer portaes de periódicu de 2005 como “La policia investiga el entorno de Andecha Astur”) vulnerando’l so drechu a la presunción d’inocencia.
- A Fernando G.R tán xulgándolu en base a la Llei antiterrorista española énte la que caltenemos un posicionamientu públicu contrariu, claru y conocíu, por ser una restricción intolerable a los derechos humanos, igual qu’otres munches organizaciones polítiques, sociales y mesmamente organizaciones como “Human Rights Wacht” o “Amnistia Internacional”.
- A Fernando G.R xúlgalu l’AN, tribunal pal que tamién pedimos la so derogación. Considerámosla como otres muches organizaciones asturianes y del estáu un tribunal d’esceición herederu de los Tribunales d’Orde Públicu franquistas. Una Audiencia calificada por Gregorio Peces-Barba, nada sospechosu de ser un “pelligrosu independentista”, como un "atentado a un derecho fundamental".
- Con too ello, alcontrámonos con una primer parte del xuiciu onde se vulneró’l derechu a la defensa d’un ciudadanu asturianu prohibiéndo-y la xuez Angela Murillo utilizar la so llingua materna pa declarar, pesie a tener concedíu un intérprete pola propia sala, como denunció l’Aconceyamientu de Xuristes pol Asturianu (AXA) recordándo que’l propiu Plenu de la propia AN sentenció n’abril de 2008 que "ye una garantía del drechu a la defensa permitir al acusáu que s'esprese na so llingua materna".
- Si recapitulamos, tamos énte un casu nel qu’un ciudadanu asturianu foi deteníu aplicando-y una llei contraria a los derechos humanos, xulgáu por un tribunal herederu del franquismu y nun xuiciu nel que nun tien garantizáu’l derechu a la defensa. Camentamos qu’esta situación ye denunciable por cualaquier demócrata que se precie.
