15/2/09

Andecha nun quier ver a los príncipes españoles per Fontes d'Iviernu

Andecha Astur propón al plenu la Casa Conceyu d’Ayer que se declare “Conceyu antimonárquicu”

Ente la iniciativa del conceyal de cultura Santos Fernandez sofitada tamién pol alcalde Gabriel Perez Villalta d’unviar una carta a los “Principes de Asturias” invitándolos a visitar la estación de esquí de Fontes d’Iviernu pa promocionar asina’l turismu nel conceyu Andecha Astur alvierte al alcalde y al conceyal de cultura de que ye una mala idega porque nin comu ayeranos nin como asturianos tenemos porqué rendir pleitesia a naide y muncho menos a una istitución retrograda y antidemocrática como lo ye la monarquia española.

A Andecha Astur yá nun-y sosprende dende fai munchu tiempu que los cargos públicos del PSOE amuesen tan abiertamente’l so fervor monárquicu anque sí nos prestaría a lo menos que nun tratasen d’implicar a tolos vecinos y vecines na so amuesa de pleitesía a la Corona Española con frases comu la que apaez na misiva: “nuestros vecinos acogerán con todo el cariño a Vuestras Altezas”.

Poro, Andecha Astur píde-y al alcalde del conceyu d'Ayer que rectifique retirando la invitación a los “Principes de Asturias” unviándo-yos una nueva carta a la Casa Real Española y amás píde-y que respalde la moción d’Andecha Astur de declarar Ayer como “Conceyu Antimonarquicu”.

Ayer yá tien una enorme bayura paisaxística, natural, etnográfica y gastronómica que tien valor por sigo mesma y nun necesita d’esa visita “Real” que propón el conceyal Santos Fernandez pa da-y valor al potencial turísticu del conceyu.

P’Andecha Astur la meyor forma de promocionar el turismu ye’l respetu a esos valores naturales y paisaxísticos entamando pol sofitu municipal a la llucha los vecinos de Pel.luno escontra l’actividá de la cantera de Peña Castru que ta provocando un gran impautu ambiental nel entornu del pueblu de Pel.luno, a los pies de Peña Mea, una zona, por cierto, con un altu valor turísticu pal senderismu, la escalada y otros deportes de montaña.