Francisco Javier García Valledor, diputáu na Xunta Xeneral pola coalición Izquierda Xunida-Bloque por Asturies-Los Verdes dixo güei na Xunta Xeneral del Principáu, nun alcuentru cola prensa, que diba incumplise'l Pautu firmáu ente la coalición y la FSA-PSOE si se exclúi a los profesores de llingua asturiana de les plantiyes orgániques del profesoráu del Principáu d'Asturies.
Una sentencia de los tribunales ya declaró illegal la situación na que s'atopen los profesores de llingua asturiana.
Nesti sen, el diputáu d'Izquierda Xunida añedió qu'espera seya corrixío colos mecanismos, previstos nel Pautu, pa solucionar diferencies nel senu del Gobiernu.
Inxerir a los profesores d'asturianu nes plantiyes orgániques del profesoráu del Principáu d'Asturies amás de ser la única forma llegal d'iguar la so situación, ye de capital importancia pa la Especialidá de Llingua Asturiana na educación primaria y secundaria.
Llama l'atención que , debío a la presión de los profesionales de la ensiñanza y de les asociaciones de defensa de la llingua, seya García Valledor el que "sal a la palestra", cuando del Pautu de Gobiernu robláu ente Izquierda Xunida y'l PSOE deríbase que los conflictos xurdíos del mesmu, van tener que dirimise nel senu del Gobiernu. Otra cosa sedría que n'esti casu nun existiera conflictu ente'l PSOE ya IX. Deberíen aclaralo les direiciones de la FSA y sobre tou d'IX.
D'otra miente si'l conflictu ye rial, como diz Valledor, si los alcuerdos políticos y los pautos de gobiernu nun son papel moyao, si los reprentantes políticos y el Gobiernu de la Comunidá Autónoma tienen un mínimu de respetu pol ciudadanu d'Asturies, ye d'esixir que seya la portavoz del Gobiernu quien dea la rempuesta afayaíza.
