La grave situación na que s’alcuentra l’Asturianu y que señala la UNESCO nos tres Atles asoleyaos nos 13 años últimos, dexa mui claro que la política llingüística desendolcada pol “Principado” nun sirve, nun tien dengún efeutu y nun lleva a que la llingua Asturiana puea salir de la situación de pelligru y del camín de la extinción.
Dende Andecha Astur creyemos que ta más que comporbao que nun se pue seguir per esti camín si se quier salvar la llingua de los asturianos y tamién que la non oficialidá de la llingua respuende a intereses estrictamente políticos y non culturales o científicos.
Como repetimos munchísimes veces, namás la oficialidá de la llingua Asturiana ufre un marcu nel que se pueda intentar salvar la llingua (como demuestra la meyor situación de les llingües, gallegu, vascu y catalán) que ye una parte del patrominiu cultural más importante del Pueblu Asturianu y qu’al traviés de polítiques culturales xenocides los distintos partíos que gobernaron el “Principado” (PSOE-PP-IU) tan llevando a la so extinción y con ella bona parte de la identidá que xunce al pueblu asturianu.
Pa la salvación de la nuesa llingua, esiximos la Oficialidá, como marcu dende’l que desendolcar un planes de normalización con un mínimu de garantíes. Queremos deci-yos claramente a los gobernantes del “Principado” que son responsables de llevar a la llingua a la extinción y de tar faciendo n’Asturies un xenocidiu cultural imperdonable.
