C O M U N I C Á U
L’Aconceyamientu de Xuristes pol Asturianu (AXA) y la Xunta pola Defensa de la Llingua Asturiana (XDLA) dan anuncia güei del entamu d’una rellación de collaboración formal ente les dos organizaciones, pa llevar alantre en común campañes pa la defensa de los derechos llingüísticos n’Asturies.
La primera d’estes campañes ye una consecuencia directa del Informe del Comité d’Espertos del Conseyu d’Europa que recomendaba al gobiernu español l’apertura d’un diálogu colos falantes d’asturianu pa meyorar l’estatus llegal del idioma. Siguiendo esta recomendación, dende AXA y XDLA va promovese dende güei una iniciativa empobinada a recoyer apoyos ente’l texíu asociativu asturianu rellacionáu cola llingua p’articular la interlocución de la comunidá de falantes de llingua asturiana col estáu español y col propiu conseyu d’Europa, y trabayar asina de forma organizada pola meyora del nivel de reconocimientu llegal de la llingua asturiana, como recomienda’l propiu Conseyu d’Europa.
Esta primer iniciativa conxunta va valir tamién p’afitar un mecanismu útil qu’informe regularmente a tolos organismos públicos competentes en materia llingüística, especialmente los rellacionaos cola Carta Europea de les Llingües Minoritaries, sobre la situación de marxinalidá llegal y indefensión que carez la llingua asturiana y les persones que la falen, asina como sobre l’incumplimientu n’Asturies del marcu llegal afitáu pol Conseyu d’Europa y pol Estáu Español pa la protección de les llingües minoritaries.
La campaña que güei presentamos ye una reacción defensiva necesaria énte la inhibición que’l Gobiernu asturianu vien demostrando frente a les sos responsabilidaes. La gravedá de los fechos denunciaos pol Aconceyamientu de Xuristes pol Asturianu sobre l’orixe del informe distorsionador que l’Estáu español unvió al Conseyu d’Europa, evidencia una actitú irresponsable y bochornosa de los responsables de la política llingüística n’Asturies, una actitú que concasa cola política llingüística n’Asturies del actual gobiernu de coalición, que nuna política continuista col anterior, conculca tolos díes los derechos llingüísticos de los asturianos y asturianes.
Independientemente d’estes iniciatives, la Xunta pola Defensa de la Llingua Asturiana nun pue dexar de pidir la dimisión inmediata de la Directora Xeneral de Política Llingüística Consuelo Vega, -por mentir y ocultar información sobre les consultes que l’Estáu Español, a iniciativa del Conseyu d’Europa, dirixó al Gobiernu Asturianu pa la ellaboración del últimu informe sobre’l siguimientu n’Asturies de la Carta Europea de les Llingües Minoritaries- y desixir responsabilidaes polítiques d’estos fechos tanto a los cargos políticos, conseyera y viceconseyeru, de los que depende la dirección Xeneral de Política Llingüística como a los partíos del gobiernu firmantes del pautu nel que s’enmarca y que permite la política llingüística nefasta que carecemos.
