Les autoridaes españoles mintieron énte’l Conseyu d’Europa pa xustificar lo qu’ésti califica de “resquiebra ente la gran demanda social y el fechu de que la llingua asturiana entá nun tenga la reconocencia de cooficialidá”. Ficiéronlo y la mentira rescampló nel mesmu informe que sobro’l cumplimientu de la Carta Europea de les Llingües Rexonales o Minoritaries iguó’l Comité d’Espertos del Conseyu d’Europa.
La dulda que queda ye si la mentira salió direutamente del Gobiernu español o vieno-y inducida pel d’Areces. Fecha la entruga, el Ministeriu d’Alministraciones Públiques remítemos copia d’un escritu de so, datáu a 29 d’ochobre de 2008 y robláu pel Direutor Xeneral de Cooperación Autonómica, col conteníu darréu:
“Sra. Dª Consuelo Vega. Directora General de Promoción Cultural y Política Lingüística. Consejería de Cultura y Turismo. Principado de Asturias.
Estimada Direutora:
Acompaño a la presente el documento elaborado por el Comité de Expertos sobre lenguas regionales y minoritarias del Consejo de Europa, que contiene sus conclusiones sobre el modo en que las autoridades españolas han seguido las recomendaciones del Comité de Ministros del Consejo de Europa, así como las propuestas que se elevarían para que fueran adoptadas, en su caso, como nuevas recomendaciones de dicho Comité de Ministros.
En relación con dicho documento provisional, si lo considera oportuno, le agradecería nos haga llegar el parecer de esa Comunidad Autónoma en lo que se refiere a aquellos aspectos que le afectan singularmente”.
El día 18 de xineru de 2009, el diariu “ La Nueva España ” recoyía unes declaraciones de la mentada Consuelo Vega nes que, pente otres coses, afitaba que nun-y constaba “ni desde que estoy en el actual equipo, ni antes, ninguna petición de información para la Carta de Lenguas”.
Pa nós, la señora Vega y el cargu qu’ocupa nun se desacreíten al facer eses coses porque dende l’Aconceyamientu de Xuristes pol Asturianu enxamás-yos dimos creitu dalu, nin a la direutora nin a la Direición Xeneral qu’esfruta.
Tampoco vamos pidir el so cese porque a la señora Conseyera de Cultura de la que depende y al señor Presidente del Gobiernu que la nomó dámos-yos el mesmu creitu, a saber, nengún.
Pero vamos siguir xurgando pa descubrir a tolos responsables d’esti impresentable asuntu porque los ciudadanos d’Asturies tenemos drechu a saber nes manes que tamos. Y pa ello entamaremos más reclamos énte’l gobiernu d’España, porque col d’Areces nun hai con quien tratar.
Pola Xunta Direutiva del Aconceyamientu de Xuristes pol Asturianu robla, n’Uviéu a seis díes andaos del mes de febreru de 2009, el so presidente,
Xosé María Estrada Janáriz.
