El Conseyu de Gobiernu dió-y güei el preste, na so reunión selmanal, a la plantiya del profesoráu d'educación pública non universitaria dependiente de l'Alministración del Principáu d'Asturies. Nesa plantiya orgánica nun formen parte los profesores d'asturianu al nun tar, en pallabres de la vocera del Gobiernu Ana Migoya, "reconocida la especialidá pol Ministeriu d'Educación.
La primer reaición nun se fexo esperar y vien del Bloque por Asturies que xunta Izquierda Xunida y Los Verdes participen nel gobiernu col PSOE.
Pablo Fernández voceru del Bloque por Asturies acusa al executivu del que forma parti, de nun cumplir el Pautu de Gobiernu y esíxe-y al Conseyeru d'Educación qu'entaíne "nel estudiu xurídicu, recoyíu nel Pautu, que posibilite la especialidá d'asturianu". Sigún Pablo Fernández darréu debíen sacase les places a concursu, convocar oposiciones, facer concursu de tresllaos y per últimu "unvialo a Madrid pa qu'el Gobiernu central lo reconoza". Pa terminar acusó a la conseyera Migoya d'engañar a los asturianos.
Les declaraciones de Pablo Fernández améstense a les del diputáu per Izquierda Xunida Francisco Javier García Valledor que fai unos díes denunciaba tamién l'incumplimientu del Pautu.
Dotra miente, de la comparecencia de Migoya dempués del Conseyu de Gobiernu espéyase que nel sen del executivu formáu pel PSOE-IX-Bloque por Asturies-Los Verdes nun se reconoz discrepancia dala.
Amás de Migoya, ¿quién ta engañando a los asturianos?.
No hay comentarios:
Publicar un comentario