El Conseyu Escolar del Estáu -nel que ta representada tola comunidá educativa (profesores, padres y madres y alumnáu)- aprobó ayeri la creación de la especialidá docente de Llingua Asturiana, una histórica reivindicación na comunidá autónoma, especialmente del movimientu asturianista. La iniciativa foi defendida pola vocera de Suatea, Beatriz Quirós, dientro de les propuestes de meyora que presentó'l sindicatu al informe que tolos años ellabora esti órganu sobre'l cursu escolar pasáu. El plenu del Conseyu Escolar #refrendó por 34 votos a favor, 26 en contra y seis abstenciónes.
Al so regresu de Madrid, Quirós amosóse bien satisfecha de consiguir el respaldu de los miembros del conseyu, munchos allegaos a l'Alministración estatal. Agora, esti órganu va treslladar esti encamientu al Ministeriu d'Educación por que la especialidá sía una realidá. Hasta la fecha, los profesores qu'imparten la materia cunten con una habilitación o una acreditación y l'inmensa mayoría son interinos. Al nun esistir la especialidá, nunca se convocaron oposiciones nin concursu de treslláu. «Cola especialidá, esta situación arreglaríase», señaló la vocera de Suatea, quien añedió que, d'esta forma, «iguálase al alumnáu de la comunidá autónoma y al profesoráu qu'imparte Llingua Asturiana y Gallego-asturianu nel so ámbitu col restu de llingües propies o oficiales del Estáu». La midida afecta a cientos de docentes.
No hay comentarios:
Publicar un comentario