Atopen les cámares de gas escondíes polos nazis en Polonia

 

Un grupu d'arqueólogos afayó los restos soterraos que l'exércitu alemán intentó despintar nel campu d'esterminiu de Sobibor.

L'equipu d'arqueólogos que trabaya nel campu de concentración nazi de Sobibor, na Polonia oriental, afayó les cámares de gas que los nazis despintaren a la fin de la Segunda Guerra Mundial. Trátase d'unes instalaciones nes que podíen habese masacrao hasta a un millón de xudíos.

Según esplicó Yoram Haimi, una de les persones que trabaya nes escavaciones, les fuerces alemanes trataron de borrar tolos rastros del campamentu cuando lu abandonaron el 14 d'ochobre de 1943. Los nazis baltaron les cámares de gas y sobre elles construyeron una carretera col enfotu de borrar los rastros cubriendo la zona con asfaltu.

Los arqueólogos escavaron so esta carretera y atoparon delles llínies de lladriyos, que coincidiríen coles parés que soportaben les cámares de gas. Con esti descubrimientu los historiadores van ser capaces de determinar el tamañu d'estes instalaciones y facese una idea del númberu total de persones que sedríen asesinaes nesti campu de concentración.
 

Yoram Haimi amosó la so sorpresa pol tamañu d'estes cámares de gas, asina como poles dimensiones onde los xudíos yeren recluyíos y pol l'estáu de caltenimientu en que s'atopen les parés de la cámara de gas.
 

Haimi recordó que dos de los sos tíos «que vivíen en París mientres la guerra y fueron deteníos polos alemanes, taben ente aquellos que fueron asesinaos en Sobibor».

Amás de los restos de les cámares los arqueólogos atoparon oxetos personales tamién soterraos, como un aniellu de casáu cola inscripción n'hebréu: «hete equí, conságreste a mi».

Los historiadores afirmen qu'esisten pocos datos sobre'l campu de Sobibor precisamente porque los alemanes afaráronlu enantes d'abandonalu, polo que les úniques referencies esistentes hasta'l momentu debíense al testimoniu de dellos sobrevivientes que relataren la so estancia nel campu concentración.

L'arqueólogu polacu Wojciech Mazurek, que tamién trabaya nel descubrimientu, afirma que les escavaciones revelen que «hubo ocho cámares de gas que funcionaben aprovechando'l fumu qu'espulsaba un motor». La muerte de les persones que s'introducíen na cámara producíase nunos 15 minutos.
 

Mazurek declaró a l'axencia Reuters que «los nazis inclusive llegaron a criar gansos p'afogar los gritos desesperaos de los presos».

Según Yad Vashem, del Institutu Israelín Internacional d'Investigación sobre l'Holocaustu, nel campu taben internaos xudíos y prisioneros del exércitu soviéticu. Mientres el llevantamientu del mesmu en 1943 unes 300 persones llograron escapar, pero «la mayoría fueron prindaes y asesinaes, polo que la cifra final de supervivientes quedó en 50 persones».

El proyectu d'investigación en Sobibor llévase a cabu en coordinación cola base israelina Yad Vashem, l'Institutu Internacional d'Investigación sobre l'Holocaustu, la Fundación de Polonia y Alemaña y el Muséu Estatal de Majdanek, averáu a la ciudá polaca de Lublin.