Pedro Sanjurjo considera qu'hai una correspondencia directa ente los votantes de Foru, "qu'agora se mueven escontra esta nueva formación"
El voceru de PODEMOS, Daniel Ripa, almite esa posibilidá "como hai votos del PP, del PSOE y d'IX, porque'l descontentu ye xeneralizáu"
El máximu representante de la cámara autonómica amuésase convencíu de que la formación de Pablo Iglesias va tar na Xunta Xeneral tres los comicios autonómicos de mayu y dá-y 5 diputaos
Ripa asegura que nun se conformen con esi cálculu. "L'enclín ye
irreversible. Los dos partíos mayoritarios yá nun dan más de sigo, tán
tocaos, casi fundíos. Nós queremos ganar les instituciones y echar a la
casta", diz.
Pedro Sanjurjo (PSOE), presidente del Parlamentu asturianu, cree que'l votu de PODEMOS n'Asturies ye ultraconservador, que provién de la mesma cala de votantes qu'en 2011 dio la victoria a Foru Asturies, la formación de Francisco Álvarez-Cascos, dempués de diez meses nel Gobiernu d'Asturies, Cascos convocó de nuevu elecciones y ganó el PSOE con Javier Fernández.
Nuna entrevista pa la televisión autonómica (TPA), Sanjurjo asegura que si s'analiza'l comportamientu electoral n'Asturies, hai una correspondencia bien directa con votos populistes, qu'hasta fai bien pocu yeren votos ultraconservadores y qu'agora se mueven escontra esta nueva formación".
El presidente de la Xunta Xeneral considera que "hai una correlación nesa simplificación del discursu y de la solución, que fai qu'opciones polítiques antagóniques conciten el sofitu de los mesmos ciudadanos", en clara referencia al tresvase de votantes de Foru Asturies escontra PODEMOS nes elecciones autonómiques.
El voceru de la formación de Pablo Iglesias n'Uviéu, Daniel Ripa, almite que "puede haber votos de Foru, como los hai del PP, del PSOE y d'IX, porque'l descontentu ye xeneralizáu". Ripa refuga'l calificativu de ultraconservador y asegura que la mayor cala de votos atópase ente la xente de la colación d'esquierdes y "hestóricos socialistes cansaos pola deriva de los sos dirixentes".
La resultancia electoral de les europees, con victoria socialista n'Asturies, nun alteriara los ánimos de los dirixentes xacobinos. Ye col entamu del últimu cursu políticu d'esta llexislatura cuando'l PSOE reacciona y carga contra PODEMOS, formación a la que mete nel mesmu saco que'l Foru Asturies d'Álvarez-Cascos.
Javier Fernández, presidente del Principáu, marca'l discursu comparativu ente los dos fuerces polítiques, y refuga que'l PSOE pueda plantegase siquier algamar alcuerdos con PODEMOS. Agora, el presidente de la cámara asturiana da otra vuelta de tuerca y avera el perfil de los votantes de la nueva formación al votu ultraconservador. Ripa rellaciona "la reacción bederre d'esta fin de selmana" del presidente del Principáu con encuestes que reflexen la meyora de Podemos n'Asturies, "onde llograríamos los meyores resultaos nes autonómiques", diz.
La dirección socialista asturiana, pel momento, caltién al marxe de cualquier comentariu o analís sobre l'efectu de PODEMOS nos próximos comicios de mayu y de la estratexa p'anular el posible desembarcu de votantes del PSOE escontra la formación de Pablo Iglesias, asina como menguar no posible la so presencia na Xunta Xeneral del Principáu.
El mesmu Sanjurjo almitía va unos díes que PODEMOS va tar presente nel parlamentu asturianu. En círculos socialistes falen de cinco diputaos, que fragmentaria entá más la cámara autonómica, formada nestos momentos por cinco grupos parlamentarios y la imposibilidá de mayoríes.
No hay comentarios:
Publicar un comentario