Izquierda Xunida, promotora de la reforma de la Llei del Presidente
pa dexar el votu negativu na investidura -güei solo son válidos el sí' y
l'astención- y llindar a dos los mandatos del xefe del Executivu, mira
con rocea lo que pueda asoceder cola so iniciativa. Los sos responsables
saben del refugu que distintes partes de la propuesta, cuando non la so
totalidá, xenera en Foru y el PP. Cunten col respaldu d'UPyD y creíen
tener tamién el del PSOE, pero l'actitú de los sos dirixentes, la so
negativa a asitiase'n públicu con rotundidá al respective, principia a
espertar barruntos. Aurelio Martín (Izquierda Xunida), reclamó a los socialistes «una postura nidia» nesti alderique y
alvirtió de que diba ser «incomprensible» que se vetara un modelu de
investidura que funciona na práctica totalidá de les comunidaes
autónomes y tamién nel Congresu español.
La fonderada del alderique tien enforma que ver col escenariu
preelectoral y la certidume de que la próxima Xunta Xeneral va presentar
un grau de fragmentación tal que la configuración de mayoríes va
resultar terriblemente complicada. Col sistema actual d'elección del
presidente, al candidatu con más respaldu nes urnes váli-y col aval de
los miembros del so grupu parlamentariu. Si inxerimos la posibilidá de
dicir 'non' eso camudaría y l'aspirante precisaría más votos a favor
qu'en contra, lo qu'obligaría a buscar alcuerdos y aliances. Un
escenariu que favorecería'l diálogu y la negociación, sostien IX. Nel
senu del PSOE y del Executivu asturianu, sicasí, hai molición respecto de
la posibilidá de que pudiera introducise una dosis extra d'inestabilidá
na vida política nacional, con riesgu inclusive de bloquéu institucional
si nun se conformen les mayoríes necesaries pa escoyer un presidente. El
PP, pela so parte, ta frontalmente en contra d'esti cambéu.
IX emplaza al PSOE a mover ficha y definir la so posición, dempués de
selmanes de silenciu. «Esmolezme que nun tenga una posición clara sobre
esta tema cuando sofitó tomar en considerancia de la iniciativa y nun
presentó enmiendes», apunta Martín, que diz duldar de les verdaderes
intenciones de los socialistes. Porque pa IX esti nun ye un asuntu
menor. «Ye una cuestión de rexeneración de la democracia»
Convencíu de que tres los comicios de mayu nengún
partíu va llegar a los 15 escaños, Martín espera que'l PSOE nun tea pensando nun escenariu postelectoral
nel que nengún partíu llogre una mayoría clara y quiera caltener el
sistema actual ante la hipótesis de poder gobernar en minoría. «Non
puede criticase una reforma electoral municipal como la que pretende'l
PP y agora querer ser presidente con un terciu de los diputaos de la
Cámara».
La rocea sobre les intenciones de los socialistes tamién s'instalaron
n'UPyD, favorable a la reforma d'una llei que, diz Ignacio Priendes,
puede favorecer una «falsa estabilidá institucional» na midida na que
dexa que granen gobiernos ensin el sofitu abondu qu'acaben siendo ruinos.
El diputáu ta convencíu de que los socialistes, «ceadores del modelu
actual», tán faciendo «cálculos azotaos y comenenciudos» pa ver qué
alternativa yos convién. «Espero que nun acabe asocediendo como cola
reforma electoral asturiana; fálta-yos coraxe políticu pa entamar
verdaderes reformes».
No hay comentarios:
Publicar un comentario