A caldía, anque nun siamos conscientes d'ello, remanamos munchos datos colos nuesos smartphones. Al traviés de les redes sociales o del saléu por Internet, aportamos a munchos conteníos y apurrimos muncha información.
Como toos sabemos, a la d'utilizar un restolador d'Internet, tolos pasos que realizamos queden rexistraos. Nun mos referimos solo al propiu historial de páxina web, sinón tamién a contraseñes, allugamientos, credenciales… Una cantidá bien grande de datos y d'importancia. La privacidá esmoleznos a toos, polo que ye un asuntu a tener en cuenta.
N'Android esto tamién asocede. Y ye que ca vegada que navegamos, Google rexistra muncha información de nós, yá sía con Chrome, Mozilla o cualesquier otru restolador de Google Play. Ye por eso que vamos cuntavos les ventayes que tien utilizar la manera "salear a escondíes".
Evitar el rexistru del historial
En teoría, la llamada manera d'escondío implica una mayor seguridá a la de restolar. Ye bien amañoso si nun queremos dar pistes de lo que facemos nel nuesu navegador d'Internet.
La primera gran ventaya ye que si navegamos nesta manera, les páxines web que visitemos nun van figurar nel historial, polo que naide qu'intente pescudalo nun va consiguilo. Ye daqué que mos apurre privacidá abondo.
Emplegar delles cuentes al empar nun terminal
De normal, pa utilizar navegadores como Google Chrome, precisamos tener una cuenta que ye la qu'introducimos nel nuesu dispositivu y sirve pa tener guardaos toos nuesos datos.
Si utilizamos el saléu a escondíes, nesa llingüeta qu'abriéramos nueva vamos poder emplegar una cuenta distinta a la qu'usamos nel saléu normal. Enforma amañoso si tenemos delles cuentes y queremos utilizales al empar.
Nun apurrir datos a Google
En cuanto que principiamos a navegar tamos apurriendo datos sobre los nuesos gustos y preferencies n'Internet. Tou esto queda rexistráu por Google y utilízase pa fines variaos.
Un d'estos oxetivos ye ufiertanos publicidá personalizada, esto ye, empobinada a los nuesos gustos. Con éses, si saleamos na manera a escondíes, vamos evitar apurrir estos datos y, poro, recibir esti tipu de publicidá.
En cualesquier navegador d'Android vamos poder añedir esta llingüeta d'a escondíes pulsiando nel menú d'opciones. Va Depender de l'aplicación, pero en toes el procesu ye bien similar, polo que nun vais tener dificultaes.
No hay comentarios:
Publicar un comentario