El Boletín Oficial del Principáu espubliza los decretos de correición toponímica pa que'l Gobiernu, les Conseyeríes y elli mesmu puedan incumplilos.
L'exemplu tenémoslu nel BOPA de güei. Nesti Boletín, númberu 84 de 13 d'abril de 2009, dase anuncia a dos disposiciones xenerales del Principáu d'Asturies. La primera ye'l Decretu 21/2009 de 25 de marzu de la Conseyería Cultura y Turismu pol que se determinen los topónimos oficiales del Conceyu Yernes y Tameza. La disposición que va de siguío ye'l Decretu 22/2009 pol cual el Principáu acepta una parcela que-y regala l'Ayuntamientu na llocalidá de "Campo de Caso", (topónimu que nun ye oficial dende l'añu 2007, BOPA númberu 129 de 4 de xunu). Sigún el Decretu 52/2007 espublizáu nel citáu boletín, el nome de "Campo de Caso" ye sustituyíu tanto pa la parroquia como pa la llocalidá, pol nome tradicional de "El Campu", circunstancia que paecen esconocer tanto nel Boletín Oficial del Principáu como na Conseyería de Bientar Social y Vivienda cuya titular ye Noemí Martín d'Izquierda Xunida. Bien ye verdá qu'ésti nun ye un casu aisláu, xeneralmente nin el Gobiernu d'Asturies, nin les sos Conseyeríes, nin dengún departamentu de l'Alministración autonómica (casu del BOPA), empleguen la toponimia tradicional d'Asturies anque seya la oficial. Si esta dexadez política pue ser fonte de conflictos llegales, los servicios xurídicos van tener xera abondo.
Dellos enllaces rellacionaos:
- El Principáu marica na Toponimia d'Asturies y convierti'l Nomenclátor nuna llaceria
- Consuelo Vega reconoz que nun se tan oficializando los nomes tradicionales de los Conceyos
No hay comentarios:
Publicar un comentario