Picar na semeya pa dir a la páxina del INE.El mes pasáu l'Aconceyamientu de Xuristes pol Asturianu denunciaba que los conceyos y'l Principáu d'Asturies nun taben poniendo'n conocimientu del Estitutu Nacional d'Estadística la revisión de la Toponimia Asturiana a fin de qu'esti muérganu recoyera les denominaciones oficiales aprebaes polos conceyos, refrendaes pola alministración autonómica y les amestara al "Nomenclátor d'unidaes poblacionales".
Paez un "escaezu" de los nuesos rexidores, pero la cosa nun acaba equí.
Nuna güeyada a los distintos decretos aprebaos pola Conseyería de Cultura y recoyíos gota a gota nel Boletín Oficial del Principáu dende cuantayá, espeya que falar de falta d'ínterés y de procuru ye quedase curtios, ya que xeneralmente nun se fan oficiales los nomes de los conceyos que son estremaos del nome castellán y sí se fai referencia y s'oficialicen (déxense como taben), los nomes que ya yeren asturianos. Vamos velo conceyu a conceyu:
Llangréu
El códigu d'esti conceyu nel Estitutu Nacional d'Estadística ye'l 310000. Nun figura nel decretu de revisión topónima del conceyu pola tanto sigue nomándose LANGREO.
Sí se fai oficial el nome de la parroquia y de la capital, LLANGRÉU/LANGREO.
Esti ye'l únicu conceyu nel que figuren les denominaciones billingües de les sos poblaciones (non la del propiu conceyu), nel Estitutu Nacional d'Estadística,y la de la capital, anque col nome trocáu, o seya, Langreo/Llangréu.
Pa facelo mas cenciello: Oficialmente la ciudá de Llangréu/Langreo (nel INE, Langreo/Llangréu), ye la capital del conceyu de LANGREO.
L.lena
Faise oficial el nome de la capital Cód. 331600 La Pola, pero non el del Conceyu, que sigue siendo LENA.
Sariegu
Nun apaez nel Decretu el conceyu (Cód. 650000). Oficialmente ye SARIEGO
Xixón
Apaecen la parroquia y la capital (Cód. 240900 y 240901), pero non el conceyu (Cód. 240000), polo qu'oficalmente ye GIJÓN.
Corvera
Nun apaez na llista de nomes oficiales (Cód. 200000). Oficialmente CORVERA DE ASTURIAS.
Gráu
Oficialízase la parroquia y la capital como Gráu/Grado (Cód. 260900 y 260903). El conceyu ye oficialmente GRADO.
Ribadeva
Oficialmente RIBADEDEVA (Cód. 550000).
Pezós
Otru casu interesante, Faise oficial el nome de la capital como Pezós/Pesoz; el de la parroquia como Pezos/Pesoz (ensín acentu)y el del conceyu nun apaez, polo qu'oficialmente sigue siendo PESOZ.
Casu
El nome oficial del conceyu sigue siendo CASO (Cód. 150000).
A Veiga
Fanse oficiales los nomes de capital y parroquia A Veiga/Vegadeo, pero el conceyu sigue nomándose VEGADEO (Cód. 740000).
Llaviana
Capital y parroquia pasen a nomáse La Pola Llaviana/Pola de Laviana, pero el conceyu: LAVIANA (Cód. 320000).
La Ribera
Ye'l únicu conceyu al que se-y remocica'l nome: Oficialmente LA RIBERA/RIBERA DE ARRIBA.
Carreño, El Franco, Llanes, Gozón, Bimenes, Cabranes, Nava, Colunga, Amieva, Noreña, Morcín y Riosa, caltienen el so nome tradicional, que yera'l oficial, pero asina y too van relacionaos nos distintos decretos.
Llevamos años cola revisión toponímica, y los que queden... una llabor que a otres comunidaes yos llevó dos boletinos oficiales pala aprebación y otru pa los erros y les faltes.
Agora resulta qu'el mio pueblu tien dos nomes separaos por una barruca,ya nin m'alcuerdo si'l nome tradicional va delantre o dempués de la barruca, pertenez a una parroquia que tien otros dos nomes separtaos per otra barruca y a un conceyu col nome castiellanizáu y que va seguir asina fasta qu'apaeza un conseyeru/a que ponga orde onde enxamás lu hebo... o que-y de por manga-y una barruca.
