El Conceyu Abiertu pola Oficialidá vuelve a les sos actividaes pa trabayar pola oficialidá de la llingua asturiana depués de los meses que marcaron un tiempu pal alderique y les propuestes de los partidos políticos. Esta plataforma cívica de más de 250 partidos políticos, sindicatos, entidaes y asociaciones de tola sociedá asturiana, evitó tar presente na campaña electoral por considerar que la llibertá pa falar una llingua ye un derechu civil que tolos partíos presentes na Xunta Xeneral tienen la obligación de defender nuna sociedá democrática.
Depués de cuatro años, el procesu de reforma del Estatutu d’Asturies llega a so fase final. Tal paez que la oficialidá ye’l principal obstáculu pal consensu. Por eso volvemos a pidir con firmeza un marcu llegal que garantice la supervivencia del asturianu y el reconocimientu d’un derechu ciudadanu que posibilite que cualesquier persona pueda emplegar la llingua que quiera ensin torgues: falar llibremente’l castellanu y l’asturianu ensin imposiciones nin obligaciones, garantizando realmente’l derechu a la educación, les rellaciones coles alministraciones, la presencia nos medios de comunicación y la visibilidá y igualdá nel marcu de les llingües del estáu español. Y esto pidímoslo entendiendo que ye un patrimoniu común de tolos asturianos y asturianes. Nun hai llingües nin más nin menos importantes, pero ésta ye la nuestra.
Quien nun firme la oficialidá nel nuevu Estatutu sería corresponsable de:
a) Firmar la sentencia de muerte pa la llingua asturiana.
b) Discriminaría a una parte de la ciudadanía negándo-y un derechu.
c) Rompería’l principiu d’igualdá de los ciudadanos de dos maneres: una, dientro d’Asturies, ente los falantes d’asturianu respecto a los falantes de castellanu; otra, fuera d’Asturies, de los asturianos respecto a los derechos que tienen los ciudadadnos de les demás comunidaes con llingua propia.
d) Frustraría la posibilidá d’un estatutu pa tolos asturianos, falen la llingua que falen y seyan d’onde seyan. Pa toles persones que viven n’Asturies. Asturianos somos toos y l’estatutu tien que ser fonte de derechos y non pa negalos.
Por eso facemos un llamáu a la responsabilidá de los partíos políticos y a la so voluntá p’algamar el consensu. Sobre manera, y por ser el partíu mayoritariu n’Asturies, llamamos al PSOE y a tolos socialistes a modificar la so posición. Lo contrario será negar derechos fundamentales a los ciudadanos que gobiernen y condenar a morrer a un patrimoniu milenariu.
