22/4/09

La crisis ente Valledor ya Izquierda Xunida zárrase'n falso

En rueda de prensa cellebrada esta mañana na se de la Xunta Xeneral del Principáu, Valledor decidió siguir n'Izquierda Xunida d'Asturies y continuar col so trabayu de diputáu dientro de la Estaya Parllamentaria de la coalición IX-Bloque-Los Verdes.

Sicasí, declaró qu'esta situación de tratar d'asumir les directrices de la Comisión Executiva y del grupu parllamentariu
"siendo coherente cola masa social y los votantes d'Izquieda Xunida" , "non implica que llegao el momentu nun pueda siguir col desendolcu del mio trabayu".

Asina, Valledor yá fexo entrega a la organización d'un documentu robláu cola so renuncia a l'acta de diputáu "pa que Izquierda Xunida puea facelu efeutivu cuando-y pete".

Zárrase asina'n falso y con "finiquitu" de por medio, una crisis que nin al diputáu nin a la coalición-yos interesa perpetuar no que queda de llexislatura.

Nesti sen, el futuru políticu de Valledor n'Izquierda Xunida va vese dende agora nidiamente "tocáu". A dos años pa les Autonómiques de mayu del 2011, albídrense movimientos tanto dientro como fuera de la coalición que bien podríen decidir un futuru distintu pa la izquierda y'l nacionalismu n'Asturies.

No hay comentarios:

Publicar un comentario