El congresu, tituláu 'Nos orixes del Reinu d'Asturies, causes polítiques y militares', presentóse güei nel salón d'actos del Centru Cultural Caxastur, entidá que collabora cola Asociación d'Amigos de La Carisa, organizadora de les xornaes. Nesti mesmu llugar van celebrase los alderiques y conferencies que completen el programa, a desarrollar del 8 al 11 d'ochobre. Nel actu tomaron parte la presidenta de l'asocación, Yolanda Viniegra, y los arqueólogos Jorge Camino (director científicu del congresu) y Rogelio Estrada (secretariu). Amás, tuvieron presentes el director de Patrimioniu del Principáu, Adolfo Rodríguez Asensio, y el represenante de la Obra Social de Caxastur, José Vega.
Nel Congresu, una serie d'arqueólogos y historiadores van tratar de plantegar posibles llinies d'investigación sobre la rellación d'Asturies cola España visigoda, puesto que los descubrimientos señalaos anteriormente ofrecen dudes sobre les teoríes aceptaes hasta'l momentu.
Según esplicó Camino, la fortificación d'El Homón, una muralla de grandes dimensiones, peslla La Carisa, una vía militar utilizada nel so día polos exércitos romanos, y ta a mediu kilómetru del campamentu romanu del mesmu nome. Lo mesmo pasa cola parede llevantada en La Muria.
De primeres, pensóse que se trataba d'una construcción defensiva escontra los romanos, pero les pruebes de Carbono 14 "indiquen que se trata d'una ocupación posterior", concretamente de finales del sieglu VII y primeros del VIII, ye dicir "a lo cabero del reinu visigodu, y na antesala del Reinu d'Asturies", esplicó Camino.
L'arqueólogu dexó claro que se trata de "fortificaciones ástures de carácter defensivu y contrapuestes al sen d'avance d'una invasión". Añadió amás que s'asemeyen a les utilizaes pola Xunta Xeneral del Principáu nel sieglu XIX escontra les tropes napoleóniques. Lo que se va tentar nel alcuentru va ser d'entender d'ónde proveníen estes invasiones y de qué se defendíen los pobladores llocales naquellos tiempos conflictivos del últimu periodu del reinu visigodu.
Pa ello, van tomar parte nes xornaes dellos espertos n'historia medieval. Les conferencies y alderiques van tratar dellos temes, ente ellos 'Los ástures na época visigoda según les fontes lliteraries', Pelayo y la rebelión de los ástures, la presencia musulmana n'Asturies nel altu medievu y los sistemes defensivos d'aquellos tiempos.
Europa Press
