Reciben con urries y xiblios a los reis y convidaos a la ceremonia ante un espectacular despliegue policial

Un gran númberu de manifestantes ocuparon esti vienres la Plaza La Escandalera y parte del Paséu Los Álamos pa protestar contra la xestión política de la crisis, la corrupción y la monarquía, y urriaron  a los Reis y a los convidaos, a la so llegada a la ceremonia de los Premios Príncipe.   

A lo último, la concentración, convocada pola estaya sindical del sindicatu CSI en Caxastur, llevóse a cabu, eso sí, ente un espectacular despliegue policial y con un valláu que zarraba la metá de la plaza uvieína, y torgaba que los asistentes a la protesta s'averaren a la cai que da accesu al Teatru Campoamor. Por esti motivu, los convocantes presentaron una denuncia por vulneración de derechu de manifestación. Nun se produxeron incidentes.   

Antes de les cinco de la tarde empezaron a llegar los primeros asistentes. Poco dempués llegaben en manifestación pela cai Marqués de Santa Cruz los participantes nes marches pola Dignidá (los organizadores cifráronlos en 2.500) acompañaos d'unos cientos de persones que tomaron parte de la plaza y el Paséu los Álamos.

Pancartes de CSI, de Podemos, d'Izquierda Xunida, podíen vese ente mensaxes n'asturianu y en castellán contra la monarquía, a favor de la república, y apelativos como 'Fartones' o 'Lladrones'. En primer llinia, tuvieron trabayadores de Caxastur, lo mesmo que de Tennecco o de la Fábrica d'Armes.   

Na zona de La Escandalera, los numberosos axentes de la Policía Nacional, incluyíos esti añu l'per primer vez los miembros de les Unidaes d'Intervención Policial, namás permitieron averase al Teatru Campoamor a los curiosos de la ceremonia y a los favorables a la monarquía. A los qu'acudíen a protestar obligábenlos a ponese tres el valláu, qu'esti añu taba instaláu tras la fonte. De fechu al exconceyal d'Izquierda Xunida n'Uviéu, Celso Miranda, los axentes quitáron-y una bandera de la República, cuando la enseñó a la llegada de los reis, frente a la entrada del centru escénicu uvieín.   

Los asistentes urriaron enforma al coche de los reis, anque la barrera formada poles bandes de gaites valió de pantalla sonora. Tamién xiblaron a munchos de los convidaos a la gala, ente ellos l'alcalde d'Uviéu, Agustín Iglesias Caunedo, el conceyal Jaime Reinares, l'exministru Josep Piqué, o'l periodista Luis del Olmo.

DENUNCIA   

La estaya sindical de la CSI en Caxastur presentó una denuncia nel Xulgáu de Guardia por vulneración del derechu a manifestación. El sindicalista Juan Manuel Martínez Morala esplicó que'l permisu del actu yera pa tola Plaza La Escandalera y non pa la metá d'ella. "Enseñámosla al xefe de Policía pero fizo lo que-y dio la gana; esto ye un estáu de "desfecho", quexóse.   

Otru exsindicalista, Cándido González Carnero, representante de l'asamblea de les Marches pola Dignidá, mostró'l so preste pol resultáu de la convocatoria y mostró la so confianza en que l'actu d'esti vienres valga pa promover una llinia de movilización xeneral.   

Na concentración tuvo presente Diego Cañamero, secretariu xeneral del Sindicatu Andaluz de Trabayadores (SAT), acompañáu por un nutríu grupu de militantes de la so organización llegaos d'Andalucía en dellos autobuses. Consideró "una vergüenza" el gastu económicu que traen estos premios. "A los qu'hai que da-yos un premiu ye a los mineros, a los estudiantes y a los miles de trabayadores que tienen qu'emigrar porque nun hai trabayu", criticó. Espresó tamién el so deséu de qu'esta y otres movilizaciones acaben nuna converxencia política en tol Estáu.   

Tania González, eurodiputada asturiana de Podemos, presente na Escandalera, destacó la numberosa asistencia a la concentración y tamién amosó'l so deséu de qu'esti tipu de movilizaciones acaben desembocando nuna converxencia política, especialmente con vistes a les elecciones autonómiques y a conceyos.