Los escritores qu’embaxo se nomen, con motivu los actos institucionales de la Selmana de les Lletres Asturianes 2007 qu’entama la Conseyería de Cultura, comunicación Social y Turismu del Principáu d’Asturies
MANIFIESTEN:
- Los escritores qu’emplegamos la Llingua Asturiana pa facer lliteratura somos, antes qu’escritores, persones que falamos y escribimos n’asturianu na nuestra vida diaria como ciudadanos.
- Por ello, penrriba de que se mos reconoza’l nuestru trabayu creativu como escritores, queremos que se mos reconozan y garanticen plenos drechos como ciudadanos que falen y escriben l’asturianu.
- Esos drechos como falantes de la nuestra llingua materna tán espresamente recoyíos na Carta Europa de les Llingües Rexonales y Minoritaries (suscrita pol Estáu español) y nel artículáu de la Constitución Española en vigor (mui especialmente nel art. 3.2, qu’afita: “Las demás lenguas españolas –amás del castellán- serán también oficiales en sus respectivas comunidades autónomas”); asina como tamien nel ordenamientu xurídicu asturianu (Estatutu d’Autonomía d’Asturies y Llei d’Usu y Promoción del Asturianu), inda de forma insuficiente.
- Especialmente llamentable vien siendo’l facer de les instituciones del Gobiernu del Principáu d’Asturies. Yá que, arriendes d’incumplir pa col ordenamientu xurídicu de la comunidá autónoma no que cinca a la promoción, difusión y enseñanza de la llingua, nos últimos meses tán propiciando actuaciones direutamente represives (y, polo tanto, illegales) escontra ciudadanos asturianos que quieren utilizar la so llingua propia con normalidá n’ámbitos d’usu distintos a los familiares o puramente lliterarios; situación ésta que nun se da nel restu les comunidaes con llingua propia dende va munchos años.
- Gravísimes son, nesi sen, les recientes actuaciones represives escontra los señores Xurde Blanco y Xosé Nel Comba (funcionarios del propiu Principáu) por usar l’asturianu escritu na alministración; como lo ye tamién l’anuncia del Gobiernu asturianu y la Universidá d’Uviéu nel atropellu al doctorandu Sr. Faustino Zapico, torgándo-y la presentación del so trabayu académicu n’asturianu; la complacencia del Gobiernu énte actuaciones asemeyaes d’instituciones dependientes del Principáu; el tratu dau al asturianu nes emisiones de la recién creada radiotelevisión pública o’l tratamientu dau al asturianu nel recién aprobáu curriculu d’enseñanza; lo que, de por xunto, configura la triste semeya recien de la marxinación y la represión llingüística que sufren la Llingua Asturiana y los sos falantes.
Por ello, los escritores que figuren embaxo, nun actu cívicu, pacíficu y simbólicu de protestas escontra esta inxusta situación, en solidaridá colos ciudadanos enantes aludíos y col pueblu asturianu en xeneral, apauten lo siguiente:
- Refugar los honores que mos ufierta’l Gobiernu del Principáu con motivu de la Selmana de les Lletres Asturianes y encamentá-y al mesmu que los tresllade a la propia llingua, de la que namás somos heriedes y tresmisores; equiparándola social y xurídicamente coles demás llingües españoles, tal como manda la Constitución, y honrando asina la memoria de los nuesos antepasaos y a tola xente que la tuvo y tien como propia dende va más de 1.000 años.
- Denunciar l’actual situación de discriminación y represión de los ciudadanos asturianos no que cinca a los sos drechos llingüísticos; faciendo llegar esta denuncia, per tolos medios de que dispongamos, al conxuntu de la sociedá asturiana y española, asina como a les instituciones asturianes, españoles y europees que seyan competentes pal casu.
- Afalar al conxuntu la sociedá pa desixir, de forma clara y rotunda, la plena oficialidá de la llingua asturiana y la igualdá de drechos de los asturianos colos demás ciudadanos del Estáu español.
N’Asturies, a 26 d’abril de 2007; col preste y la robla de:
- Álvarez García, Lourdes
- Álvarez Llano, Ánxel
- Caldevilla Vega, Nel
- Campal, Xosé Lluís
- Cortina Cortina, Sixto
- Fernández Álvarez, L.luis
- García Oliva, Vicente
- González, Humberto
- López Labrada, Sabel
- Llope, Inaciu
- Marín Estrada, Pablo Antón
- Martino Ruz, Xandru
- Mori d’Arriba, Marta
- Riesgo, Xosé Nel
- Rivas, David
- Rodríguez Alonso, Pablo
- Rubiera Tuya, Carlos
- Sánchez Vicente, Xuan Xosé
- Viejo, Xulio
- Vixil Castañón, Xulio
