Unidá presenta a Fernando Ornosa (CAO), nuna candidatura nacional d'Asturies a les europees

Nel día d’ayer Unidá Nacionalista Asturiana (UNA), rexistró na Xunta Electoral Central la so candidatura a les elecciones europees del próximu 7 de Xunu. UNA va dir a estes elecciones en solitario y a lo llargo de la campaña y la precampaña buscará l’apoyu de persones y colectivos que faigan un apueste porque nestes elecciones se sienta una voz asturiana que, dende una perpectiva d’esquierda, presente unes propuestes electorales non sucursalistes y centraes na defensa de los intereses d’Asturies.

• El llicenciáu en Ciencies Polítiques Daniel Fernández Blanco ye’l cabezaleru d’una llista siguida nos puestos 2 y 3 por Yolanda González Huergo y Fernando Ornosa.

• UNA quier ser la voz netamente asturiana nes elecciones integrando una amplia representación del mundu sindical, cultural, ecoloxista y asociativu.

La llista electoral, que conseñó la selmana pasada’l Conceyu Abiertu de la organización, ta encabezada por Daniel Fernández Blanco. Fernández Blanco nació en Xixón en 1978, y vive anguaño nesta mesma ciudá. Ye llicenciáu en CC. Polítiques y de la Alministración y fue becariu d’investigación na Universidá de Santiago de Compostela algamando’l diploma d’Estudios Avanzaos en Procesos Políticos Contemporáneos. Per otru llau cuenta con un máster n’Auditoría financiera y ye especialista en Derechu Tributariu y Llaboral pola universidá compostelana. Anguaño trabaya nun despachu profesional en temes d’asesoramientu. Responsable d’Attac en Santiago de Compostela, militó en dellos colectivos d’esquierda y a la vuelta a Asturies integróse n’UNA, formando parte anguaño de la Executiva Nacional, cuntando coles responsabilidaes d’Ayalguería de la organización y siendo amás voceru de la estaya de Vivienda. La númberu 2 de la llista ye la tamién miembro de la Xunta Executiva Nacional d’UNA la xixonesa Yolanda González Huergo. Huergo, técnica d’urbanismu y nacida en Xixón en 1971, ye llicenciada en Derechu pola Universidá d’Uviéu y funcionaria de l’alministración local. Huergo milita activamente dende los años 90 nel movimientu de vindicación llingüística y participa nos movimientos en defensa de los derechos humanos. El puestu númberu 3 ocúpalu Fernando Ornosa. Ornosa ye carbayón de nacimientu y vive n’Uviéu dende hai 50 años. Llicencióse en Xeografía pola Universidá d’Uviéu nel añu 1982, participando en distintos trabayos como xeógrafu y trabayando darréu d’ello 19 años na Facultá de Xeoloxía de la Universidá d’Uviéu. Dende l’añu 1978 podemos venceyalu a delles asociaciones de folclor y etnografía onde ocupó cargos de dirección y dirixó trabayos de campu de música tradicional asturiana. Dende 2001 ye’l responsable del Archivu de Música Tradicional del Muséu del Pueblu d’Asturies. Tien participao amás en bien d’organizaciones sociales y culturales y, dende 2004 a 2008, exerció como voceru del Conceyu Abiertu pola Oficialidá (CAO). En marzu de 2009 afíliase a UNA. Amás, ente los 50 candidatos y candidates, la llista electoral d’UNA ta compuesta por una amplia representación del mundu sindical, ecoloxista, cultural y asociativu asturianu. Bien llueu UNA va presentar en rueda de prensa la so candidatura y les llinies básiques del programa que la formación va proponer nestos comicios al Parlamentu européu, unes elecciones que pese a los pilancos que presenten pa una fuerza como UNA, tienen la ventaya de que los asturianos y asturianes puedan votar a un partíu asturianu anque nun exerzan n’Asturies el so derechu al votu.

Fonte| Unidá Nacionalista Asturiana