Lo que se pretende con ello nun foi honor dalgún, sinon "amarrar a Asturies al poder centralista de la corona de Castiella", desaniciar los movimientos separatistes que se veníen dando nel país dende'l siglu X, con Suero de Bermúdez y Gonzalo Peláez, ya nel sieglu XII, contrarios d'aquella al tovía Reinu de Lleón. Fernández Conde fai tamién comparanza estos movimientos colos que tovieron llugar en Portugal y que llevaron a esti territoriu a la so independencia de Castiella.
Diz Fernández Conde, que Asturies ye heriede de la cultura clásica del Imperiu Romanu, y que la identidá asturiana vieno fraguándose dende'l sieglu VIII col Reinu d'Asturies y medra nel X coles polítiques contraries a la pertenencia a Lleón de los nobles d'Uviéu.
Notes.-
- La Comunidá Autónoma d'Asturies constitúise sigún Llei Orgánica 7/1981 de 30 d'avientu.
- La Llei Orgánica 1/1999 de 5 de xineru, fai desapaecer el nome históricu del país y camúdalu pol de "Principáu d'Asturies", definíu ésti como "territoriu de los conceyos inxeríos dientro les llendes de la provincia d'Asturies". L'amagüestu reconoz el "Principáu" y "la provincia", escaeciéndose d'afechu de la milenaria historia d'Asturies.
- Nin l'Estatutu d'Autonomía nin les postreres reformes foron sometíes al referendu del Pueblu Asturianu nin por tantu aprebaes pol mesmu.
