6/11/08

Filoloxía pidi la pallabra


Comunicáu de la Xunta Moza

Xunta Moza convoca un paru simbólicu de 15 minutos como siguiente pasu na so campaña reivindicativa pola inclusión del asturianu nos planes d’estudios universitarios como títulu de grau.

Con una mesa informativa, pegaes de carteles, repartu de dípticos nos campus universitarios y l’engalane del aulariu del Milán con banderes d’Asturies sigue la campaña pola dignificación de la llingua na Universidá d’Uviéu

Tres de la colocación de delles pancartes y cientos de cartelos y del repartu de los dípticos informativos la pasada selmana, la Xunta Moza, como yá anunciare, sigue alantre cola campaña reivindicativa pola inclusión del asturianu nos planes d’estudios universitarios como títulu de grau. Esta vez, los estudiantes del Campus del Milán tán convocaos a secundar un paru simbólicu que va facese’l llunes 10 de payares a les 12.00 hores y que va tener una duración de 15 minutos. Con esti paru, la organización pro defensa de la llingua asturiana quier reclamar el sofitu que la comunidá universitaria-y tien que dar al asturianu como llingua propia d’Asturies, naguando pola so inclusión nos planes d’estudiu ensin discriminaciones de nenguna triba. L’asturianu tien que tener un encaxe amañosu na Facultá de Filoloxía y, por estensión, na Universidá d’Uviéu.

Arriendes d’eso, hai que falar de los alcuerdos algamaos va muncho na Universidá, y recordar que yá nel añu 1996 la Facultá de Filoloxía demandó la creación d’una llicenciatura de Filoloxía Asturiana. Tamién fai falta mentar la unanimidá algamada na Xunta Xeneral nel añu 2001 que, colos votos del PSOE, PP y IU, reclamó la titulación. Los antecedentes amuesen que cualquier solución que nun sía un títulu de grau dexa al asturianu en una posición de discriminación gratuita y inesplicable que la Xunta Moza y la Xunta pola Defensa de la Llingua Asturiana nun vamos sofitar.